– Максим, Уус Алдантан төрүттээххин истэн сэҥээрдибит, дьонуҥ кимнээҕий, туох үлэһиттэрий, ханна олороллоруй?
– Ийэм Алена Степановна, аҕам Анатолий Николаевич Татариновтар, урбаанньыттар, Москваҕа олорбуттара иккис сылыгар барда.
– Аҕам Уус Алдаҥҥа төрөөбүтэ, эһэм Николай Николаевич Татаринов Бэйдиҥэттэн төрүттээх, эбэм Саргылана Семеновна Өспөхтөн төрүттээх. Бэйдиҥэҕэ оҕо сылдьан дьоммутугар, аймахтарбытагар сайын аайы тахсан сынньанааччыбыт. Уонна урут ийэм төрөппүттэрэ аах Степан Степанович учууталынан, Любовь Борисовна бырааһынан, Алексеевтар дьиэ кэргэнинэн Курбуһахха үлэлээбиттэр, онно олорбуттар.
Мин Дьокуускайга төрөөбүтүм, оҕо сааһым онно ааспыта. Бэрт кыра эрдэхпиттэн, 3,5 сааспыттан «Эллэй Боотурга» хоккейга сылдьан саҕалаабытым.
– Хоккейга хайдах кэлбиккиний?
– Хоккейга бастаан эһэм уонна эбэм илдьибиттэрэ.
– Хоккей туһунан тугу этиэҥ этэй?
– Мин 12 сааспар диэри Дьокуускайга «Полярные волки» диэн хамаандаҕа оонньообутум. Онтон Новосибирскай уобалас Бердск куоратыгар сайыҥҥы сборга сырыттахпына, бэлиэтии көрөннөр Новокузнецкайга «Металлург» хамаандатыгар ыҥырбыттара. Манна үс сезон оонньообутум. Онтон Новосибирскайга «Сибирь» кулуупка ылбыттара. Бу кэмҥэ элбэх араас таһымнаах үгүс куоракка күрэхтэһиилэргэ кыттыбыппыт. Салгыы 2023 сыллаахха Москва уобалаһыгар Подольск к. «Витязь» диэн хамаандаҕа ыҥырбыттара. Бу Россия биир саамай үчүгэй хамаандата буолар. Ханнык да кулуупка оонньооторбун, куруук Сахам сирин хамаандатын өйүүбүн, ыҥырдахтарына үөрэ-көтө кэлэн оонньуубун. Ол курдук, 2023 сыллаахха Кузбасска ыытыллыбыт «Азия оҕолоро» норуоттар икки ардыларынааҕы кыһыҥҥы иккис оонньууларга Сахам сирин сүүмэрдэммит хамаандатын хапытаана буолбутум. Былырыын «Полярные волки» састаабынан Владивостокка буолбут «Дети Приморья» диэн норуоттар икки ардыларынааҕы кыһыҥҥы бастакы оонньууларга «фиджитал хоккей» диэн көрүҥҥэ кыттыбыппыт.
– Максим, оттон Америкаҕа хаһан барбыккыный, онно олорор, үөрэнэр хайдаҕын кэпсии түһүөҥ дуо?
– Америкаҕа 2024 сыл күһүнүгэр кэлбитим. Сааскыттан саҕалаан көрүүнү ааһаммын, «Atlantic Coast Academy» диэн хамаандаҕа ылбыттара. Биир сезон оонньоотум. Уруккуттан баҕа санаам буолан, наһаа үөрбүтүм, долгуйбутум. Америка ураты, олус сайдыылаах дойду. Кампуска олоробут, онно аһаталлар, дьарыктанабыт, оскуолаҕа үөрэнэбит уонна нэдиэлэҕэ үстэ-түөртэ атын куораттарынан, штаттарынан кэрийэ сылдьан оонньуубут. Син биир Америкаҕа барыам диэн билэр этим, ол иһин 8-с кылаастан английскай тылы үөрэтэн саҕалаабытым. Дьокуускай куораттан саҕалаан Москваҕа Россия биир саамай үчүгэй хамаандатыгар оонньоон кэллим, салгыы АХШ дойдутугар хоккейдыам.
– Үөрэххэр хайдаххыный?
– Үөрэхпэр кыһаллабын, үчүгэйдик үөрэнэбин, былырыын ОГЭ-ны этэҥҥэ туттаран аттестат ылбытым. Быйыл икки оскуолаҕа тэҥинэн үөрэнэбин, Америкаҕа 11-с кылааска уонна Москваҕа кэтэхтэн 10-с кылааска үөрэнэбин. Сатанар, кыайабын.
– Сахалыы саҥараҕын дуо?
– Сахалыы саҥарабын, өйдүүбүн. Дьиэбитигэр дьонум сахалыы кэпсэтэллэр.
– Өссө туох дьарыктааххыный?
– Бириэмэ көһүннэҕинэ компьютерга оонньуубун, кинигэ ааҕабын. Наар дьарыкка сылдьар буоламмын, иллэҥ кэм эриэккэстик көстөр. Сайыҥҥы бириэмэҕэ сбордарга баран дьарыктанабын.
– Инникитин тугу ситиһэр баҕалааххыный уонна оҕолорго анаан тугу этиэҥ этэй?
– Этэҥҥэ оскуоланы бүтэрэн, университекка киириэхпин, хоккейбынан үрдүк ситиһиилэрдэниэхпин баҕарабын. Оҕолор, баҕа санааны толорор иһин туохтан да толлумаҥ, үөрэниҥ, үлэлээҥ, бэйэҕитин сайыннарыҥ!
Дьулустаххына – ханнык да баҕа санаа туолар.
Мария АРГУНОВА
санаалаахт, дьулуурдаах уол. Урдук ситиhиилэри ба5арабыт.