XXI үйэ бастыҥ сурунаала – «ҮЙЭ» 40-с нүөмэрэ!

Аартык.ру партнера – республикатааҕы «ҮЙЭ» сурунаал 40-с “халыҥ” нүөмэрэ бу күннэргэ Новосибирскай куораттан бэчээттэнэн кэлэн, Саха сирин бүттүүнүгэр киэҥник тарҕанан эрэр. Дьиҥ-чахчы норуот кэтэһэр, таптыыр, умсугуйар таһаарыытынан билиниллибит «ҮЙЭ» ахсыс сылын ааҕааччыларыгар тиһигин быспакка тиийэ турар.

Билигин бэчээт эйгэтигэр бүтүн аан дойду үрдүнэн уустук кэм да буоллар, «ҮЙЭ» 8 сыл аннараа өттүгэр ылыммыт үрдүк таһымыттан түспэккэ, аан дойду бары муннугар олохсуйбут саха омугар аныыр дьоһун аналын толорон, айымньылаахтык айа-тута олорор. Бу – биллэн турар, сурунаал төрүттээччитэ, тэрийэн таһаарааччыта – Саха сиригэр киэҥник биллэр ураты суоллаах-иистээх суруналыыс, талааннаах суруйааччы Николай КРИВОШАПКИН айар үлэни бизнес чэпчэкитэ суох эйгэтин кытта чаҕылхайдык дьүөрэлиирин, кыайа-хото тутарын, мындырдык салайарын үтүө холобура.

Сурунаал саҥа нүөмэрин хас биирдии матырыйаала, куруук буоларыныы, олус интэриэһинэй. Аартык. ру «ҮЙЭ» сибиэһэй таһаарыытын кытта чугастык билсэн баран, сайт ааҕааччыларыгар сорох матырыйааллары билиһиннэрэргэ быһаарынна.

“ҮЙЭ” сурунаал сирэйигэр түөрт оҕо күн-күбэй ийэтэ, экономическэй наука кандидата, «Металл Торг» хампаанньа финансовай дириэктэрэ – Кэрэ киһи Мир ДО таҕыста.

«…Олоххо тосхойору, буолары барытын тапталы кытта ылыныы, саҥата суох сөпсөһүү… Маннык турукка айан үгүс тургутуулаах буолар. Көннөрү «үчүгэй”, “куһаҕан” диэн өйдөбүллэр суохтар. Сүрүнэ, киһи бэйэтэ бэйэтин кытта иллээх уонна доҕордуу буоллаҕына эрэ, Сир Ийэҕэ аналыҥ аһыллан иһэр. Хас биирдиибит сыыһата суох эбиппит буоллар, бу дойдуга киһи буолан айыллан кэлбэккэ, үрдүк таһымнаах атын эйгэҕэ олоруо этибит. Мин маны “фитнес для души” диэн ааттыыбын. Бүгүн мин бэҕэһээҥҥи бэйэбинээҕэр ордук буоларга дьулуһабын…»

Николай КРИВОШАПКИН «Редакторын суруга» — олох туһунан анаарыылара, өрүү буоларын курдук, үгүс ааҕааччы болҕомтотун тардар.

«Ол эгэлгэ кэрэһититтэн биирдэстэрэ – мин МАННА уонна БИЛИГИН олоҕум айан аргыстаах. Сир Ийэ алта континенын уһаты-туора сыыйан, бэйэм сааспын икки бүк кэриэтэ куоһарар ахсааннаах судаарыстыбаларга атахпынан бигэтик үктэнэн, харахпынан хайгыы көрөн, сүрэхпинэн долгуйа бигээн, ымыылаах Ыраларбын олоххо хайаан да толорор дьүккүөрбэр, бэйэбэр итэҕэйбит дьоллоохпун. Сэттис континеҥҥа да – саамай уһук соҕуруу Антарктидаҕа – тиийэр суолу сүрэхпинэн да, өйбүнэн да солообутум. Сүрүнэ, ити буоллаҕа эбээт! Онон ол да илэ-чахчы кыаллара саарбахтаммат…”

Франция ыччата Борис Номбо Саха сирин илэ-чахчы таптаабытын, киниэхэ тапталга билинэрин киһи олус сэҥээрэн ааҕар.

«…Борис кылгас стажировкатын кэмигэр Нам, Туймаада ыһыахтарыгар кыттыыны ылар чиэскэ тиксибитэ. Саха норуота төрүт үгэстэрин уонна кэрэхсэбиллээх таҥаһын-сабын билиҥҥээҥҥигэ диэри харыстаан үйэтиппититтэн сөхпүтэ-махтайбыта. «Аан дойду үрдүнэн маннык дьаһаныы букатын сэдэх», — диэн этэрэ оруннаах. Ол иһин төрүт таҥаспытын атыылаһан, стажировкатын, үлэтин түмүгүн кэрэһилиир курдук, дойдутугар илдьэ барбыта.

Оҕо эрдэҕиттэн ойуун кыырарын көрөргө дьулуспут. Сибиир ойууннарын туһунан биэриини кытта билсэн баран, “хаһан эрэ, улааттахпына, мин бу хаар-муус дойдуга тиийиэм, аптаах-хомуһуннаах ойууннардыын илэ алтыһыам” диэн баҕа кылам гыммыта. Ол ымыылаах ырата айылҕа маанылаах күөнүгэр туолбутуттан наһаа астыммыта…”

“ҮЙЭ” редакциятыгар Саха сирин иккис дойдуларын кэриэтэ истиҥник саныыр Турцияттан Хасан Хайырсевер, Венгрияттан Чаба Мэсорош уу сахалыы тылынан сурук ыытан соһуттулар да, үөртүлэр да, Хасаны бар дьон сахалыы ылбаҕайдык ыллыыр, хомустуур киһи быһыытынан киэҥник билэр. Оттон Чаба, этэргэ дылы, бэйэ киһи буолбута быданнаата. «Сэргэлээх» сериалтан үгүс дьон кутун туппут Чаба Мэсорош – «ҮЙЭ» сурунаалга.

Норуот сурунаалын «Сахалар – аан дойдуга» түһүмэҕэ мэлдьи биир тыынынан ааҕыллар. Канада Ванкуверыгар олохсуйбут Алаастар дьиэ кэргэн ийэтэ Кэтириис дириҥ ис хоһоонноох, киэҥ кээмэйдээх сэһэнэ-сэппэнэ үгүстэргэ үтүө холобур буолара саарбахтаммат.

 Хаартыскаҕа: Кэтириис, От Алаастар сиэннэрэ Арчылаан эбэлээх эһэтин туһунан «ҮЙЭҕэ» долгуйа ааҕарга бэлэмнэнэр.

Уруккута «Мисс Якутия» чаҕылхай кыттыылаахтарыттан биирдэстэрэ, билигин элбэх оҕолоох ийэ, бизнесвумен, «Саха чэй» хамсааһын олоххо бигэтик киллэрбит Ньургуйаана Заморщикова олоххо ситиһиитин кистэлэҥин «ҮЙЭҕэ» сэгэттэ. Сэргээҥ!

Биллиилээх суруналыыс Туйаара Нутчина туһунан дьон-сэргэ бэрт аҕыйаҕы билэр. Көҥүл куттаах, ураты көрүүлэрдээх биир идэлээхпитин кытта аһаҕас сэһэргэһии Олох, Саха сирэ, Кэм, аныгы Суруналыыстыка туһунан анаарарга төрүөт, кэрэһит буолуо.

“(…) — “Аартык. ру” бырабыыталыстыба сайта» диэччилэр эмиэ бааллар, политика оонньуута араас буоллаҕа дии. Онон «соруйан тургутан көрөргө анаан арыйбыт сайтара» дииллэр. Ол кырдьык дуо?

— Оппозицияны тыыттахха – правительство гиэнэ буолабыт, правительствоны тыыттахха – оппозиция гиэнэ буолабыт. Чуолкай “кимиэнэ” буоларбытын быһаараллара буоллар, “эһиэнэ үһүбүт” диэн баран сыҥаланыа этибит. (…)”

“ҮЙЭ” сурунаал саҥа нүөмэрин ааҕыҥ, кэрэхсээҥ, сурутуҥ!

Сурутуу индексэ: 54890

Хаартыскаҕа: СР үтүөлээх артыыстара Байбал Сэмэнэп, Баһылай Еремеев «ҮЙЭ» сонун таһаарыытын «Саҥа күн» биэриигэ бэлэх тутан үөрдүлэр-көттүлэр.

***

Aartyk.Ru