Ньурбаҕа дьоҕус уонна орто урбаан үлэһиттэригэр 7 мөлүйүөннээх грант көрүлүннэ

Бэс ыйын 10 күнүгэр, Норуот көҕүлээһинин сылын чэрчитинэн, урбаан бырайыактарынан иккис түһүмэҕинэн сөбүлэһиилэр түһэрсилиннилэр диэн Ньурбаттан биллэрэллэр.

Эрдэ ыам ыйыгар маннык сөбүлэһии 40 урбаанньыты кытта илии баттаммыта. Бу сырыыга улуус бүддьүөтүттэн грант быһыытынан 23 урбаанньыкка 7 мөл. солк. тахса үп ананна.

Ньурба улууһун баһылыга Алексей Иннокентьев киирии тылыгар 2027 с. Ньурбаҕа СӨ Норуоттарын IX Спортивнай оонньууларын көрсө 5 сыллаах үлэ былаана ылыллыбытын билиһиннэрдэ, манна сыһыаннаан дьоҕус урбаан иннигэр турар соруктарга тохтооото. Арҕаа дойдулар өттүлэриттэн сааҥсыйалар усулуобуйаларыгар үлэ ханнык хайысхаларынан барыахтааҕар сыал-сорук туруорда, олохтоох табаары, аһы-үөлү оҥоруу сайдыахтааҕын бэлиэтээтэ. Норуот көҕүлээһин сылын чэрчитинэн нэһилиэнньэттэн 300-тэн тахса бырайыак киирбитин, баһылык бэйэтэ хас биирдии бырайыактаах дьону кытта көрсүбүтүн, улуустааҕы экспертнэй хамыыһыйа көрөн үгүс бырайыактары өйөөбүтүн иһитиннэрдэ. Дьон дьарыктаах-дохуоттаах буоларга былааннара олоххо киирэригэр, мантан тирэх ылан күүстээх урбаанньыт, фермер тахсалларыгар баҕа санаатын эттэ. 3 сылы быһа урбаанньыттары кытта куратордар үлэлэһиэхтэрэ, ханнык эмэ түгэҥҥэ боппуруос үөскүүр буоллаҕына, кинилэргэ улуус дьаһалтата уонна тустаах управлениелар, департаменнар көмөлөһүөхтэрэ. Маннык хайысхалаах үлэ өссө кэҥэтиллэн, салгыы сайыннарар сорук турар.

Улуус дьаһалтатын саалатыгар мустубут урбаанньыттар бырайыактарын олоххо киллэрэр туһунан сөбүлэһиилэргэ илии баттаатылар. Улуустааҕы урбааны өйүүр киин гендириэктэрэ Нюргуяна Михайлова урбаанньыттарга сүбэ-соргу биэрдэ. Урбаанньыттар грант харчытын балаҕан ыйын 15 к. диэри туһаныахтаахтар, бу түгэҥҥэ итинтэн нолуок тутуллубат. Сөбүлэһии усулуобуйатын быһыытынан, урбаанньыттар 3 сыл устата бырайыактарын олоххо киллэрэргэ эбээһинэс ылыналлар, сылын аайы муус устар 1 к. диэри сыл устата биисинэс-былааннара туолуутун туһунан улуустааҕы урбааны өйүүр кииҥҥэ отчуоттуур буолаллар, бэриллибит үп тус аналынан туһаныллыахтаах.

Нюргуяна Михайлова 24.08.22 с. Ньурбаҕа Бүлүү улуустара кыттыылаах урбаанньыттар регионнааҕы Форумнара ыытыллыахтааҕын иһитиннэрдэ, 50 киһиэхэ федеральнай бүддьүөттэн 2 күннээх үөрэх ыытылларынан сибээстээн, баҕалаах дьон манна сайаапкаларын биэрэллэригэр сүбэлээтэ.

Урбаанньыттар киллэрбит биисинэс-бырайыактара элбэх хайысхалаах: эт полуфабрикаттарын, сыры, туортары, кондитерскай оҥоһуктары астааһын, тимири уһаныы, таҥаһы уонна түүлээх таҥастары тигии, миэбэли уонна национальнай иһиттэри оҥоруу, автомойка, химчистка, фотоателье, грузовай автотранспорт, косметологическай кабинет, парикмахерскай өҥөлөр, тепличнай хаһаайыстыбаны сайыннарыы уо.д.а. Улуус салалтата быйыл аан дойдутааҕы быһыы-майгы, экэнэмиичэскэй балаһыанньа хайдах буолуохтааҕын эрдэттэн өтө көрбүт курдук, быйыл Норуот көҕүлээһин сылын биллэрэн дьон дьарыктаах уонна дохуоттаах буоларын курдук үлэни-хамнаһы тэрийиитэ улуус нэһилиэнньэтин олоҕо туруктаах буоларыгар туһуланар, диэн “Огни Нюрбы” интернет сайт  суруйар.

***

Источник –  https://xn--90adptbcs3gya.xn--p1ai/article/60511