Ньурбаҕа элбэх оҕолоох ыаллар оҕолоро оптуобуһунан 5 солкуобайга айанныахтара

Балаҕан ыйын 10 күнүттэн саҕалаан, Ньурбаҕа элбэх оҕолоох ыаллар оскуолаҕа үөрэнэр оҕолоро Антоновка-Ньурба-Ыраах Убайаан маршрутунан 5-тии солкуобайга айанныахтара. Улуус баһылыгын атырдьах ыйын 13 күнүнээҕи дьаһалынан куонкурус биллэриллэн, нэһилиэнньэ көмөҕө наадыйар араҥатыгар бу чэпчэтиини олохтуурга оройуонтан 4999 тыһ. солк. көрүлүннэ.

Ньурба улууһун дьаһалтатын экэниэмикэҕэ управлениетын кылаабынай исписэлииһэ Анжела Иванова иһитиннэрэринэн, «Алмаасэргиэнбааны» кытта «Дорожнай каарта» оҥоһуллан турар, үлэ былаана бигэргэтиллибитэ. Балаҕан ыйын 2 күнүттэн улуустааҕы үөрэх управлениета оскуолаларга элбэх оҕолоох ыаллар оскуолаҕа үөрэнэр оҕолорун хаартыскаҕа түһэриини тэрийиэхтээх уонна анкеталары хомуйуохтаах. «Алмаасэргиэнбаан» үлэһиттэрэ кэлэн үөрэх управлениетын кытта үлэлэһэн, анкетаны толорорго, хаартыскалары уонна анкеталары электроннай бырагырааманан хайдах ыытарга үөрэппиттэр. Оскуолаларга хаартыскаҕа түһэрэр аналлаах миэстэлэр баар буолаллар. Элбэх оҕолоох ыаллар ийэлэрэ оҕолорун кытта кэлэн, оҕолоругар анкета толоруохтарын наада. Бу кэнниттэн аналлаах бырагырааманан хаартыскалар уонна анкеталар «Алмаасэргиэнбааҥҥа» ыытыллыахтара. Балаҕан ыйын 5 күнүттэн саҕалаан, бааҥҥа чэпчэтиилээх транспортнай каарталар оҥоһуллуохтара. Оскуолалар 10-с чыыһылаҕа диэри бу каарталары ылыахтаахтар. Оҕолор баан каарта оҥоһуутун ороскуотун 100 солк. төлөөн каарталарын ылыахтара.

Оптуобустарга автоматизированнай төлөбүрү ылар терминаллар туруоруллан бэлэмнэр. Чэпчэтиилээх транспортнай каартанан элбэх оҕолоох ыаллар оскуолаҕа үөрэнэр оҕолоро ыйга 96-та, ол эбэтэр күҥҥэ ортотунан 4-тэ айанныахтара.

Улуустан элбэх оҕолоох ыаллар оҕолорун бырайыастарын араастаһыытын толуйарга анаан, «2013-2021 сс. Ньурба улууһун тырааныспарын комплексын сайыннарыы» тосхолунан улуус Сүбэтин сиэссийэтинэн бигэргэтиллэн 4999 тыһ. солк. көрүлүннэ. Куонкурус биллэриллибитигэр Ньурбатааҕы АТП кыайыылаах тахсыбыта. Бу үптэн аҥара киниэхэ абаансанан номнуо ыытылынна. Хаалбыт үп тэрилтэ хас оҕону таспытынан көрөн, ыйдааҕы отчуотугар олоҕуран графигынан барыаҕа.

***

Ааптар: Геннадий Антонов