Томпо улууһугар икки саҥа муоста үлэҕэ киирдэ

Саҥа тутуулар ыраах сытар Тополинай  сэлиэнньэтин  сылы эргиччи сырыынан хааччыйыыга улахан суолталаахтар. Эбийиэктэри үлэҕэ киллэрии — эрэгийиэн суол ситимин туруктаах уонна куттала суох оҥорорго туһаайыллыбыт «Олох инфраструктурата» национальнай бырайыагын соруктарын олоххо киллэриигэ эбии хардыы буолла.

«Бу икки муостаны тутууга «Олох инфраструктурата» национальнай бырайыак чэрчитинэн 640 мөлүйүөн солкуобайтан тахса үп ыытылынна. Туһааннаах тутуулар Тополинайга  диэри айан-сырыы  сылы эргиччи олохтоноругар төһүү күүһүнэн буолар», — диэн Айсен Николаев видеосибээһинэн  үөрүүлээх түгэҥҥэ кыттарыгар бэлиэтээн эттэ.

Ил Дархан  тутааччыларга махталын биллэрдэ итиэннэ  бу  — көннөрү инженернэй тутуулар буолбатахтарын, ыраах улуустары кытта бигэ сибээс олохтооһун, экэниэмикэ тэтимнээхтик сайдыыта  буоларын бэлиэтээтэ.

«Дьааҥы» суолу сайыннарыыга «Прогноз-Серебро» хампаанньа киллэрбит кылаатын туспа бэлиэтээтэ: тэрилтэ Тополинай— «Прогноз»  — Барылас хайысханан 350 км уһуннаах массыына кыһыҥҥы суолун туппут.

– «Дьааҥы»  суолу салгыы хоту, Хотугу Муустаах акыйааҥҥа диэри тутар улахан былааннардаахпыт. Эрэнэбин, бары күүһү ууран, туруоруллубут сыаллары барытын ситиһиэхпит. Бүгүн үлэҕэ киирэр муосталарбыт өр сылларга сулууспалаатыннар, арктическай улуустарбыт сайдыыларыгар бигэ тирэх буоллуннар, — диэтэ Айсен Николаев.

Томпо улууһун баһылыгын бастакы солбуйааччы Степан Кривошапкин бүгүн оройуоҥҥа бырааһынньыктыы тыын баарын бэлиэтээтэ. «Манна Томпо улууһун олохтоохторо мустан, уустук суоллаах-иистээх сэлиэнньэни кытта сылы эргиччи сибээс олохтоммутуттан олус үөрэллэрин этэллэр. Саха сирин баһылыгар, бырабыыталыстыбаҕа уонна өрөспүүбүлүкэ салаа биэдэмистибэлэригэр биһиги кыһалҕабытын быһаарбыттарын иһин улахан махтал», — диэтэ кини.

«СтройМост» ХЭТ генеральнай дириэктэрин солбуйааччы Афанасий Титов этэринэн, тиһиктээх үлэ ыытыллан,  искусственнай тутуулар эрэ буолбакка, чугастааҕы  учаастактар эмиэ нуормаҕа эппиэттиир буолбуттар.