ОТ ҮЛЭТЭ САЛҔАНАР

Быйылгы сайын отчуттарга элбэх мэһэйи үөскэттэ. Ол курдук сайын ортото Өлүөнэ эбэбит сүрдээх улахан хара уутун аҕалан арыыларга баар оттуур сири барытын ылан,ордук өрүс арыыларыгар ходуһалардаах дьон бэрт өр ходуһаҕа киирбэккэ эрэйдэннилэр. Специалистар этэллэринэн от үүнүүтэ куһаҕана суох эрээри уу ылан барыта кумах, буор буолан биэрдэ. Онон отчуттар сир куурарын кэтэһэн окко хойутаан киирдилэр. Ол да буоллар отчуттар кэнники туран биэрбит күннэри биири да көрүппэккэ бары күүһү окко ууран билигин да оттуу сылдьаллар.

“Туймаада” Агрохолдинг хаһаайыстыбаларын сирдэрэ үксэ арыыларга, өрүс кытылынан хочолорго сытар буолан бу ууга улаханнык оҕустардылар. Ол эрээри отчуттар сүөһү аһылыгын бэлэмнээһин уһун кыстыгы туорааһыҥҥа суолтата олус улаханын быһыытынан оту, сүмэһиннээх аһылыгы бэлэмнээһиҥҥэ бары күүһү ууран туран күнү-дьылы аахсыбакка күүскэ үлэлии сылдьаллар.

Атырдьах ыйын 27 күнүнээҕи туругунан агрохолдинг бары хаһаайыстыбалара 3144 тн оту бэлэмнээн былааннарын 52 бырыһыан толорон иһэллэр. Ону таһынан 3500 туонна сиилэһи уонна 523 туонна сенааһы бэлэмнээбиттэр. Ордук таһаарыылаахтык “Бөртө сылгы собуота” ХЭУо отчуттара төһө да күчүмэҕэйдэр баалларын үрдүнэн от үлэтин тэрээһиннээхтик ыытан билиҥҥи туругунан 1500 туонна оттоохтор. Онтон “Туймаада” Экоферма отчуттара Дьокуускайы, Нөмүгүнү уонна мобильнай звенолары холбоон 550 туонна оттоммуттар.

Агрохолдинг хаһаайыстыбалара сүмэһиннээх аһылыгы. сиилэс угуутугар уонна сенаж бэлэмнээһинигэр улахан болҕомтолорун уураллар. Ол курдук сиилэһи хаһаайыстыбалар бары кэриэтэ угаллар. Бу хаһаайыстыбалартан ордук кимиилээхтик Бөртө хаһаайыстыбата 1400 туонна сиилэһи укпут. Онтон “Туймаада” Экоферма 572, “Өлүөхүмэ кыладабыайа” ХЭУо 700 туоннаны уонна “Новай сопхуос” АУо 826 туоннаны уган олороллор.

Сенааһы Экоферманы кытары Өлүөхүмэлэр бэлэмнииллэр. Уопсайа 523 туонна сенаж билиҥҥитэ бэлэмнэммит. Сүмэһиннээх аһылыгы бэлэмнээһин билигин кэмэ, онон бу хайысхаҕа көрдөрүү өссө улаатара буолуо.

Билигин да төһө да күһүн ыктар хаһаайыстыбалар отчуттарын санаалара түспэт. Туруоруллубут соругу толорон кыстыкка наада буолар аһылыктарын бэлэмнээн этэҥҥэ киирэргэ бигэ эрэллээхтэр.

***
Прокопий ХАБАРОВ