Макар Яковлев кинигэтэ сүрэхтэннэ

Муус устар 9 күнүгэр СӨ Национальнай бибилэтиэкэтин историческай саалатыгар Макар Яковлев «Силиэстийэ уонна бэлиитикэ эридьиэстэрэ» диэн кинигэтин сүрэхтэниитэ буолла.

«Бу кинигэ — мин биһиги дойдубут, Сахабыт сирин историятын биир уһулуччу кэмин туоһутунан уонна кыттыылааҕынан буолбуппунан сибээстээн, ол кэми бэйэм көрүүбүнэн уонна онно сыһыаран, олоҕум кэрдиистэрин туһунан сырдатарга холонуум буолар», – диэн ааптар Макар Яковлев киирии тылыгар суруйар.

Кинигэҕэ ааптар — Арассыыйа үтүөлээх юриһа, Арассыыйа борокуратууратын бочуоттаах улэһитэ, ССРС Үрдүкү Сэбиэтин, СӨ Ил Түмэнин норуодунай дьокутаата, СӨ Бастакы Бэрэсидьиэнин М.Е. Николаев чугас көмөлөһөөччүтэ — М.М. Яковлев ССРС, Арассыыйа, өрөспүүбүлүкэ таһымнарыгар силиэстийэҕэ уонна улахан бэлиитикэҕэ кырдьыгы туруулаһыытын туһунан кэпсиир.

Кинигэ сүрэхтэниитигэр Саха Өрөспүүбүлүкэтин Ил Түмэнин Бэрэссэдээтэлэ Алексей Еремеев эҕэрдэтин норуот дьокутаата Алквиад Тарасов иһитиннэрдэ.

«Макар Макарович, эн ураты дьылҕаҥ, дьоҥҥо-сэргэҕэ болҕомтолоох, үлэҕэ кыhамньылаах, үрдүк эппиэтинэстээх сыһыаныҥ үүнэр көлүөнэ ыччакка бастыҥ холобур буолар» – диэн эҕэрдэтин саҕалаата.

Үтүө-мааны дьонноох Горнай улууhугар төрөөн-үөскээн, аатырбыт Свердловскайдааҕы юридическай институту ситиhиилээхтик бүтэрэн олоҕун сокуоннаhы уонна бэрээдэги харыстааһыҥҥа анаабытын, туох баар күүһүн, билиитин ууран туран буруйу оҥорууну утары охсуспутун. Сэбиэскэй Сойуус араас муннуктарыгар уустук дьыалалары сатабыллаахтык арыйан, буруйдаахтары суут көрүүтүгэр тиэрдэн, дойдубутугар биир бастыҥ силиэдэбэтэл быhыытынан биллибитин бэлиэтээтэ.

Дойдуга уларыта тутуу уустук кэмнэригэр ССРС Үрдүкү Сэбиэтин уонна Саха Өрөспүүбүлүкэтин норуодунай дьокутаатынан талыллан, Саха Өрөспүүбүлүкэтин Судаарыстыбаннай суверенитетын туһунан Декларациятын уонна Төрүт сокуонун бэлэмнээһиҥҥэ уонна чочуйууга сүҥкэн кылаатын киллэрбитин, Саха сирэ олох-дьаhах уонна экэниэмикэ өттүнэн бигэ туруктаах буоларыгар, өрөспүүбүлүкэҕэ парламентаризм сайдарыгар дьаныардаахтык үлэлэспитигэр махталын билиннэрдэ.

Төрүт сокуон суутугар, Саха сирин Бэрэсидьиэнин дьаhалтатыгар үлэлиир кэмигэр өрөспүүбүлүкэбит кэскилин туhугар таhаарыылаахтык, үтүө түмүктээхтик үлэлээбитин тоһоҕолоон эттэ.

Кинигэ ааҕааччы киэҥ араҥатыгар ананар. Эрэдээктэрдэр Владимир Степанов, Людмила Баишева-Федорова.

Кинигэ сүрэхтэниитигэр Макар Яковлев киэҥ далааһыннаах үлэтин, олоҕун кэрдиистэрин сырдатар «Макар Макарович Яковлев — силиэдэбэтэл, бэлиитик, учуонай» кинигэ быыстапката турда.

***

Ил Түмэн пресс-сулууспата