«Бөртө сылгы собуотун» племенной хаһаайыстыба биригэдьиирэ Ульяна Семенова

Бүгүн «Привет от агрария» рубрикабытыгар «Бөртө сылгы собуотун»  ХЭТ племенной хаһаайыстыба биригэдьиирин Ульяна Степановна Семенова туһунан кэпсиэхпит.

Ульяна Степановна 1983 сыллаахха салайааччылары бэлэмниир Красноярскайдааҕы тыа хаһаайыстыбатын техникумун бүтэрэн , тэрийээччи зоотехник идэтин баһылаабыта. Эдэр исписэлиис Орджоникидзевскай оройуон «Булгунньахтаах» сопхуоһун Улахан Ааннааҕы отделениятыгар ыччат сүөһүнү көрүүгэ биригэдьииринэн ананан үлэтин саҕалаабыт. Эдэр киһи үлэтин эрчимнээхтик саҕалаан, исписэлиис, салайааччы да быһыытынан билиилээҕин, дьону түмэр дьоҕурдааҕын көрдөрөн, отделение социалистическай куоталаһыыларга инникилэр эрээттэригэр сылдьарыгар бэйэтин кылаатын киллэрсэн барбыт.

Кэлин ыһыллыы-тоҕуллуу саҕана хаһаайыстыба материальнай-техническай баазата оннунан хаалыытыгар кини элбэх сыратын биэрбитэ. Ол түмүгэр «Бөртө сылгы собуота» урукку укулаатын ыһыктыбакка өрөспүүбүлүкэҕэ биир бастыҥ хаһаайыстыбаҕа тиийэ үүннэ. Саамай кылаабынайа урут сопхуоска үлэлээбит дьон үрүө-тараа ыһыллыбакка, биир сиргэ үлэлээн, онтон хамнастанан үлэлии-хамсыы сылдьаллара улахан ситиһии. Билиҥҥи туругунан хаһаайыстыбаҕа 120 киһи үлэлиир. Итиннэ барытыгар Ульяна Степановна дьону түмэр дьоҕура, билиитэ-көрүүтэ, сатабыла улахан оруолу оонньообута саарбаҕа суох.

Хаһаайыстыба кэнники кэккэ сылларга сүөһүтүн ахсаанын эбэ турар, үүт ыамын үрдэтэ турар тэрилтэ. Холобурун ылан көрдөххө, 2021 сыллаахха тэрилтэ үрдүнэн барыта 836 ынах сүөһү баар эбит буоллаҕына, 2023 сыл түмүгүнэн 1032 ынах сүөһүгэ тиийэ элбэппиттэр. Онтон үүт валовай ыама 1215 туоннаҕа тиийбит. Хас биирдии ынахтан 3206 киилэни ыабыттар. Ити барыта 2023 сыллааҕы түмүк.

Итини таһынан собуокка 1065 сылгы  баар. 2008 сылтан «Бөртө сылгы собуота» ХЭТ племенной хаһаайыстыба. Бу хаһаайыстыбаҕа Ульяна Степановна 41 сыл үлэлээтэ. Ол тухары исписэлиис, салайааччы быһыытынан дьоҕура сылтан сыл арыллан хаһаайыстыба базата бөҕөргүүрүгэр, производственнай көрдөрүүлэрэ үрдүүрүгэр элбэх кылаатын киллэрдэ.

Ульяна Степановна Семенова ити өр сылларга сыралаах үлэтэ сыаналанан хаһаайыстыба, улуус, «Туймаада Агрохолдинг» АУо грамоталарынан, СӨ Тыатын хаһаайыстыбатын туйгуна бэлиэнэн, РФ Тыатын хаһаайыстыбатын министиэристибэтин махтал суругунан бэлиэтэммитэ.

#мсхиппрся

#приветотагрария

***

“Туймаада Агрохолдинг” АУо пресс сулууспата