Маҕан кумах уруккуну санатан аныгы уу оҥочолорунан омук моторкаларынан биэрэкпит туола түстэ. Ыалдьыттар да кэлэ сатаабыттар, Дьокуускайтан блогердарга тиийэ мустубуттар, улуус уонна нэһилиэк Аҕа баһылыктара кэлбиттэрэ үөрүүнү үксэттэ. Бырааһынньыкпытыгар бэтэрээн балыксыттарбыт, кинилэр сыдьааннара, кэлэр кэнчээри ыччаттарбыт, олохтоохтор бу үбүлүөйдээх кэрэ күҥҥэ үөрүүлэрэ үгүс буолла.
«Куокуй нэһилиэгэ» тыа сирин тэриллиитин быһылыгын Л.Н. Павлов махтал суруктарынан, бэтэрээн балыксыттар уонна балыкка үлэлэспит аҕа саастаах эбээлэр М.Н. Архипова, М.К. Левина, А.А. Павлова наҕараадаланнылар. Арҕас сэлиэнньэтин бэтэрээннэр түмсүүлэрин салайааччыта Н.Е. Олесова тыл этэн, В.П. Иванованы кытта бэйэлэрин ылбаҕай ырыаларын бэлэх ууннулар.
Тэрээһин чэрчитинэн биэрэктэн күөгүннэн күрэх буолла, 5 хамаанда кыттан аакка-суолга тигистилэр:3 үрдэл анал аатын ылла И.И. Левин хамаандата, 2 үрдэл — А.Н. Петрова хамаандата, 1 үрдэл — И.И. Петухов хамаандата.
Спонсардар анал бириистэрин ыллылар: «Ыйааһыннаах балык» — Андрей Петров И.И. Охлопков дьиэ кэргэнин бирииһэ, «Бастакы балык»номинацияҕа — А.А. Павлова уонна К.К. Никифоров бириистэрэ, “Саамай элбэх балык” номинацияҕа Петухов Иннокентий Петрович аатынан Петуховтар дьиэ кэргэн бириистэрин, «Бастыҥ балык астааччы» номинацияҕа Кэбээйи улууһун экология инспиэкциятын Д.В. Грузных анал бирииһин — кимиэхэ да иннин биэрбэккэ,балыктааһынынан сөбүлээн дьарыгырараҕам саастаах үлэ бэтэрээнэ, Аксиния Николаевна Петрова ылыан ылла, «Улахан балык» номинацияҕа тигистэ Артур Гуляев. Попов Григорий Григорьевич «Эдэр кэскиллээх балыксыт» анал бирииһин оҕолоро — Гуляев Эдикка туттардылар. «Саамай кыра балык» анал ааты Е.Н., Е.П. Гуляевтар анал бириистэрин Лев Павлов тутта. «Бастыҥ балыксыт дьиэ кэргэн» И.Е. Гуляев дьиэ-кэргэнин анал бирииһинэн Игорь Гуляев наҕараадаланна.
Күөгү күрэҕин кэнниттэн төбүрүөннээн олорон эбиэттээтибит, ону тэҥэ олохтоох библиотека үлэһитэ Е.В. Гуляева балыкка эҥкилэ суох үлэлээбит дьоммутугар анаммыт «Күндү дьоммутун үйэтитэн»диэн аймахтара, оҕолоро таһаарбыт кинигэлэрин, фотоальманах, брошуралар, Н.Д. Терехов «Бөргөлөр» саҥа тахсыбыт кинигэ выыставкатындьон сэҥээриитин ылла.
Оҕолорго өй күрэҕэ уонна уруһуй конкурсугар Айна Никифорова, Таптал Федорова анал бириистэри туттулар, улахан дьоҥҥо өй күрэҕэр И.Д. Лазарев иннин кимиэхэ да биэрбэтэ, кыайыылаах үрдүк аатын ылан анал бириискэ тигистэ.
Ол кэннэ спортивнай курэхтэһии саҕаланна. Оҕолорго мас тардыһыыга муҥутуур кыайыылаах Тимур Петухов буолла. Сүрүүгэ уолаттарга бастаата Антон Петухов, кыргыттарга — Виолетта Иванова. Улахан дьоҥҥо абсолютнай күрэхтэһиилэр түмүктэрэ: хапсаҕайга муҥутуур кыайыылааҕынан —Мирослав Петров, мас тардыһыыга — Герасим Азаров, бэрэмэдэй көтөҕүүгэ кыайда Иннокентий Петухов уонна миэстэттэн ыстаныы күрэҕэр кыайда Григорий Попов.
Кальвица сэлиэнньэтин олохтоохторун, балыккка үлэлээбит көмүс хатырыктааҕы өлгөмнүк бултаабыт бэтэрээн балыксыттарбытын бу үөрүүлээх үбүлүөйдээх тэрээһининэн эҕэрдэбит эйэҕэһин аныыбыт, дьоллоох-соргулаах олоҕу, дьиэ кэргэҥҥитигэр бары үчүгэйи, доруобуйаны, или-эйэни. Бу тэрээһини иилээн — саҕалаан тэрийбит Кальвица «Алгыс» сынньалаҥ киинин, олохтоох библиотека үлэьиттэригэр, Л. Г. Поповаҕа сэлиэнньэбит дьоно махтала улахан. Бука бары тэрээһиҥҥэ спонсордаабыт дьоммутугар улахан махталбытын биллэрэбит, кэнэҕэһин даҕаны биир сомоҕо буолан үлэлиэхпит, айыахпыт турдаҕа.
***
Екатерина Гуляева,
Оставить комментарий