Бүтүн Арассыыйатааҕы «Сыл учуутала-2026» күөн күрэскэ Чурапчы гимназиятын учуутала кыттар
Бүтүн Арассыыйатааҕы «Сыл учуутала – 2026» күөн күрэс түмүктүүр түһүмэҕэ Белгородка саҕаланна. Дойду бастыҥ учууталын аатын иһин Арассыыйа араас эрэгийиэннээҕи түһүмэхтэрин кыайыылаахтара күөн көрсөллөр.
Дойду сүрүн педагогическай күрэһигэр Саха сирин аатын С.К. Макаров аатынан Чурапчы гимназиятын аангылыйа уонна кытай тылларын учуутала Юлия Мироновна Макарова көмүскүүр.
Юлия Макарова эрэгийиэннээҕи күрэс кыайыылааҕынан буолан, Бүтүн Арассыыйатааҕы түмүктүүр түһүмэххэ киирбитэ. Белгородка кини идэтигэр уопутун көрдөрүө, бэйэтин ньымаларын билиһиннэриэ уонна учуутал быһыытынан сатабылларын үллэстиэҕэ.
Күрэс балаҕан ыйын 10-15 күннэригэр ыытыллар. Кыттааччылар «Педагогическай интервью» тургутугу ааһыахтара, аһаҕас уруогу ыытыахтара. Ол чэрчитинэн кинилэр идэлэригэр маастарыстыбаларын, мэтиэдикэҕэ билиилэрин уонна үөрэнээччилэри сэҥээрдэр кыахтарын көрдөрүөхтэрэ.
Балаҕан ыйын 16 күнүгэр үөрүүлээх сиэргэ-туомҥа лауреаттар ааттарын биллэриэхтэрэ. Кинилэр салгыы Арассыыйатааҕы «Сыл учуутала» аатын иһин иккис түһүмэххэ — Москва уобалаһыгар кыттыахтара.
Өрөспүүбүлүкэбит аатыттан кыттар Юлия Мироновна Макароваҕа ситиһиилэри баҕарабыт.
***
Ааптар: Людмила Попова
Хаартыска: Үөрэх уонна билим министиэристибэтин МАХ-ханаалыттан
Оставить комментарий