“Уу кэлэн турар кэмэ этэ. Онон оҕолорбун кытта даачабытыгар баран иһэн, манныкка сөтүөлүүр сатаммат диэн көрдөрөр санаалааҕым, — диэн ол күнү Олеся Чабыкина ахтан кэпсээтэ. – Тиийээппитин кытта биир дьахтар сүүрэн кэлэн, быыһааҥ, оҕолор тимирэн эрэллэр диэн хаһыытаабыта. Иһиттим-истибэтим, массыынаттан ойон тахсан онно сүүрдүм. Ачыкыбын эрэ элиппиппин өйдүүбүн. Биир кыыс оҕону эр киһи быыһыы сылдьар этэ да, бэйэтэ эмиэ ууга сүтэ-сүтэ көстөр этэ. Оттон көрбүтүм, биир дьахтар ууга тиэрэ түһэ сытар, хамсаабатын кэриэтэ. Аттыгар уол оҕо тутуһа сылдьан, быыһааҥ диэн хаһыытаахтыыр. Устан тиийбитим, дьахтар хайыы-үйэ көҕөрбүт, хардьыгыныыр эрэ. Баттаҕыттан ылан, кытыл диэки состум. Онно ууттан быган турар мастар бааллар этэ. Биир илиибинэн олортон тутустум, биир илиибинэн дьахтары хонноҕун анныттан ыллым, атаҕым сири тургуйбат, сүүрүк бөҕөтө. Аны бэйэм күүһүм эстэн барда. Оҕолорум кытылтан көрөн тураллар. Ийэбин быыһыыбын диэн кыыһым ууга ыстаныа диэн, ордук куттанным. Кини харбаабатын билэбин. Хата биир эр киһи кэллэ, кинини кытта дьахтары кытылга таһаардыбыт, уутун хачайдаан сүөкээтибит. Ол кэннэ сэниэм олох эстэн, массыынабар нэһиилэ тиийбитим. Даачабар тиийэн түөрт чааһы быһа сытан бэттэх кэлбитим. Олус кутталлаах этэ, билигин да санаатахпына, куттанабын”.
Олеся Чабыкина бэйэтэ үс оҕо ийэтэ. Ол түгэҥҥэ уһуну-киэҥи толкуйдаабакка, дьону быыһыахха диэн санааттан ылбычча киһи соруммат хорсун быһыытын оҥордоҕо. Ийэ диэн дьиэ кэргэн туллар тутааҕа буоларынан, бүтүн дьиэ кэргэни быыһаабытыгар тэҥнээх.Бүгүн “Сахабэчээт” улахан кэлэктиибэ мустан, хорсун санаалаах кэллиэгэбитин ис сүрэхпититтэн эҕэрдэлээтибит. Кини өр сылларга “Якутия” хаһыакка үлэлээбит Ариадна Борисова кыыһа буоларын сорохтор бүгүн саҥа биллибит. Онон бөрүөнү эрэ тутар кыахтаах дьон буолбатахпытын кэллиэгэбит хорсун быһыыта көрдөрдө.
Ыччат уонна социальнай коммуникациялар дьыалаларын миниистирэ Петр Шамаев кэлэн, тус бэйэтин уонна министиэристибэтин аатыттан Олесяны эҕэрдэлээтэ итиэннэ олоҕуҥ устатыгар биир эмэ киһини быыһаабыт буоллаххына, ол аата таах мээнэ олорботоххун, диэн кини хорсун быһыытын ордук тоһоҕолоон бэлиэтээтэ. Уоттаах сэриини ортотунан ааспыт Петр Витальевич киһи олоҕун, киһини быыһааһын суолтатын быдан дириҥник өйдүүрэ саарбаҕа суох.
Биһиги Олесянан киэн туттабыт, киниэхэ уһун дьоллоох олоҕу, чэгиэн доруобуйаны баҕарабыт, дьону, киһини быыһыыр-харыстыыр майгыҥ хаһан да уостубатын диэн алгыыбыт.
Оставить комментарий