Александр Атласов биирдиилээн гражданнары кытта көрсүһүунү ыытта

Тыа хаһаайыстыбатыгар уонна аграрнай бэлиитикэҕэ сис кэмитиэт бэрэссэдээтэлэ Александр Атласов ыам ыйын 28 күнүгэр биирдиилээн гражданнары кытта көрсүһүунү ыытта.

Норуот дьокутаатыгар тыа хаһаайыстыбатын үлэтин бэтэрээнэ, бааһынай хаһаайыстыба салайааччыта И. сырытта.

Кини аҥардас быйылгы төрүөҕэ бүгүҥҥү күҥҥэ 113 төбө буолбутун кэпсээтэ. Маны таһынан, хаһаайыстыба 100 борооскуну кыстатан таһаарбыт. Кини сыллата 460 тонна үүтү туттаран дохуот аахсар. Ыанньыксытынан сүрүннээн эр дьон үлэлииллэр, күн аайы 500-кэ киилэ үүтү таһарга эр дьон кыайар үлэтэ диэн кини быһаарар. Хаһаайыстыба салайааччыта 25 сыл устата бу эйгэҕэ үлэлээн, бэйэтин кыаҕынан атаҕар турбут Бастакы улахан хотонун «Россельхозбаантан» 10 мөл. кирэдиит ылан туттубут, ону быйыл төлөөн бүтэрбит. Кини үлэһиттэрин ыйдааҕы орто хамнаһа 60-100 тыһ. тиийэр эбит. Фермер бэйэтин кыаҕынан мастарыскыай, оборудование, холодильнай камера, комбайн ылынан сүөһү эбии аһылыгын бэйэлэрэ бэлэмнииллэр эбит. Дьиэ кэргэн улахан хаһаайыстыбатыгар оҕолоро, сиэннэрэ үлэлээн тыа хаһаайыстыбатын үлэтин кыраларыттан билэн улааталлара кэскилигэр солбук дьон баар буолалларыгар олук уурар диэн кини санаатын үллэһиннэ.

Фермер хаһаайыстыбатын салгыы хаҥатарыгар 120 сүөһү турар хотонун туттар былааннааҕын кэпсээтэ уонна манна судаарыстыбаттан ханнык көмөнү ылыан сөбүн туһунан дьокутааттан ыйыталаста.

Александр Атласов маннык хаһаайыстыбалар тыа сирэ сайдыытыгар улахан тирэх буолаллар диэн биһириирин биллэрдэ. Бу сылга олохтоох бэйэни салайыныы уорганнарыгар тыа хаһаайыстыбатыгар сыһыаннаах туспа боломуочуйаны биэрии сокуонунан улуустар тыа хаһаайыстыбатын боломуочуйаларын толороллоругар бүддьүөт үбэ үс анал сыаллаах ыстатыйанан тиксэриллэрин: тыа хаһаайыстыбаларын управлениеларын үлэлэрин-хамнастарын хааччыйарга, 14 хайысханан тыа хаһаайыстыбатын үлэтин өйөөһүҥҥэ уонна тыа хаһаайыстыбатын кыра кыамталаах эбийиэктэрин тутууга (саҥалыы сөргүтүүгэ) диэн быһаарда. Үүт ыамын уонна үүттэн астааһыны хааччыйыы ити 14 хайысхаттан биир сүрүннэрэ.

«Бу сокуоҥҥа өссө кыра кыамталаах инвестиционнай бырайыактар тустарынан биир салаа киирдэ. Урукку өттүгэр маннык салаа суох этэ. Онно көрдөххө, кыра кыамталаах эбийиэктэри миэстэтигэр улуус дьаһалталара бэриллибит боломуочуйанан туталларыгар уопсайа 590 мөл. солк. үп көрүлүннэ. 50 төбөҕө диэри хотон, сайылык, сылгы баазаларын уонна 200 туоннаҕа диэри кыра кыамталаах хортуоппуй уонна оҕуруот аһын харайар баазалары тутууга харчы көрүлүннэ. Улуустар бэйэлэрин бүддьүөттэриттэн, хаһаайыстыбалар кыахтарынан көрөн эбии үп угаллара хааччахтаммат. Балары тэҥэ толору хааччыллыылаах улахан комплекстары тутууну өйөөһүн тыа хаһ-н министиэристибэтин сүнньүнэн син биир ыытыллыаҕа. Манна сүрүн ирдэбил – хотон бигэргэтиллибит бырайыага уонна сметата наада», – диэн кэпсээтэ.

Александр Атласов салгыы манна туох докумуон ирдэнэрин уонна ханнык хайысханы тутуһар сөптөөҕүн туһунан сүбэлээтэ.

***

Ил Түмэн пресс-сулууспата