Федор Охлопков аатынан турнирга сахалар бэргэнник ыталларын бигэргэттилэр

Бүгүн Дьокуускайга «Сулус» полигоҥҥа Федор Охлопков кэриэһигэр анаммыт бэргэн ытыыга IV Норуоттар икки ардыларынааҕы турнира түмүктэннэ.

Үһүс күн ытааччылар «Күнүс» түһүмэххэ 2 уонна 3 миэстэ иһин киирсиилэриттэн саҕаланна. «Дантес» — «Велес» уонна «Ридик» — «Физрук» пааралар 2300-2500 м күрэстэстилэр. Эбиэккэ диэри ытыалаһан кэмниэ кэнэҕэс кыайыылаахтар быһаарылыннылар.

Ол кэннэ тута бэргэн ытааччылар турнирдарын сабыллыытын үөрүүлээх сиэрэ-туома буолла. Дойду уонна тас дойдулар күүстээх снайпердарын түмпүт күрэхтэһии полигон рекордунан уонна кэккэ чаҕылхай ааттарынан түмүктэннэ.

Кыайыылаахтары Ил Дархан Айсен Николаев, Арассыыйа Дьоруойа, РФ Оборуонаҕа миниистирин солбуйааччы, Аармыйа генерала Юнус-Бек Евкуров, РФ Бэрэсидьиэнин Уһук Илиннээҕи боломуочуйалаах бэрэстэбиитэлин солбуйааччыта Роман Алисенов, Арассыыйа Дьоруойа, турнир кылаабынай судьуйатын солбуйааччы Ярослав Якубов эҕэрдэлээн тыл эттилэр.

«Бастакы, иккис, үһүс турнирдар ситиһиилээхтик ааспыттара, бүгүн күрэхтэһии үгүстэргэ күннээҕи олоххо кубулуйда. Итиэннэ «Күнүскү» ытыыга 3 км ситиһиллибит рекорд эмиэ ханна баҕарар дьоһуннаахтык тахсыан сөп. Тоҕо диэтэххэ, Саха сирин усулуобуйатыгар бу полигоҥҥа өссө ытылла илигэ. Онон бары кыайыылаахтары, ытааччылары эҕэрдэлиибит. Аны V Аан дойдутааҕы турнирга барыгытын ыҥырабыт», — диэтэ Айсен Николаев.

РФ Оборуонаҕа миниистирин солбуйааччы Юнус-Бек Евкуров ханнык баҕарар улахан тэрээһин элбэх сыраны-сылбаны эрэйэрин, онуоха бу турнир үрдүк таһымнаахтык тэриллибитин бэлиэтээн туран тэрийээччилэргэ, чуолаан Айсен Николаевка махталын биллэрдэ.

«Маннык үрдүк таһымнаах күрэҕи тэрийбиккитигэр махтанабын. Бу бастатан туран, уопут атастаһыыта, ытыы оскуолатын сайдыыта буолар. Иккиһинэн, эдэр көлүөнэни патриотическай иитии буолар. Быйыл элбэх ыччат, «ВОИН» киин курсаннара кэлэн кытыннылар. Ф.М. Охлопков бэйэтин кэмигэр сорудаҕы толороругар, кини аатынан турнир тэриллиэ дии санаабатаҕа чахчы. Бүгүн манна дойду бастыҥ снайпердара, бэйэлэрин хайысхаларыгар чулуулар, бэйэлэрин эргимтэлэригэр биллэр-көстөр дьон түмсэн турар. Кинилэр бэйэлэрин уопуттарын эдэрдэри кытары үллэстэллэр. Үсүһүнэн, маннык полигон чугаһынан ханна да суох, онон Росгвардияны, Бэрэсидьиэн куттал суох буолуутун сулууспатын, ону тэҥэ силовой структуралары кытары бииргэ аан дойду таһыманаах снайпердары бэлэмниир киини тэрийэргэ бырайыагы толкуйдуохпут. Манна кыттыбыт ытааччылар бары кыайыылаахтаргыт, онон барыгытын эҕэрдэлиибин», — диэн Юнус-Бек Евкуров эттэ.

РФ Бэрэсидьиэнин Уһук Илиннээҕи боломуочуйалаах бэрэстэбиитэлин солбуйааччыта Роман Алисенов Юрий Трутнев аатыттан эҕэрдэ тылы эттэ.

«Уһук Илиннээҕи боломуочуйалаах бэрэстэбиитэлэ Юрий Трутнев биһигини кытары турнир хаамыытын кэтээн көрдө уонна саҥа рекордартан үөрэрин биллэрдэ. Кини турниры ыытарбытыгар туруорбут сыалбытын – биһиги снайпердарбыт таһымнарын үрдэтэри уонна бу көрүҥү кэҥэтэри тиһиктээхтик сайыннарабыт диэбитэ. Мин өйбүүбүн бастакы турниры, онно 78 киһи кыттыбыта, бүгүн номнуо 190 кэриҥэ буолла. Ол бастакы сылга рекорд 2000 м. буоллаҕына, бүгүн 3000 м. тиийдэ. Онуоха саха снайпердара рекорду олохтообуттара эмиэ элбэҕи этэр, олус үөрүүлээх», — диэтэ Роман Алисенов.

Дьэ ол кэннэ Федор Охлопков кэриэһигэр анаммыт аармыйа бэргэн ытыыга IV Норуоттар икки ардыларынааҕы турнир кыайыылаахтарын эҕэрдэлээтилэр, сыаналаах бириистэри туттардылар.

Ол курдук наҕараадалааһын күнүскү түһүмэх түмүктэриттэн саҕаланна. Үһүс миэстэни 2700 миэтэрэ дистанцияҕа сыалы таппыт федеральнай харабыл сулууспатын хамаандата – снайпер «Ридик» уонна корректировщик “Физрук” ыллылар. Бириистэри Роман Алисенов туттарда: Чороону уонна 50 грамм кутуллубут кыһыл көмүһү ыллылар.

Иккис миэстэ – Оборона министиэристибэтин хамаандатыгар: снайпер “Дантеска”, корректировщик “Велескэ” тигистэ. Наҕарааданы чороону уонна 100 грамм кыһыл көмүс кутууну Аармыйа генерала Юнус-Бек Евкуров  туттарда.

Күнүскү түһүмэх кыайыылаахтарынан Саха сирин ытааччылара: снайпер Василий Яковлев уонна корректировщик Сергей Яковлев буоллулар. 3000 миэтэрэ сыалы табан рекорд олохтообуттара. Кинилэргэ наҕарааданы: чороону уонна 250 грамм кыһыл көмүс кутууну Ил Дархан Айсен Николаев туттарда.

«Түүҥҥү» түһүмэххэ 2300 м сыалы таппыт кыайыылаахтар эмиэ итинник наҕараадаланнылар.

3 миэстэни «Маэсто» уонна «Пересвет» пааралара ылан, Арассыыйа Дьоруойа Ярослав Якубов илиититтэн чороону уонна 50 г кыһыл көмүс кутуутун туттулар.

2 миэстэлээх Максим Гуменюкка уонна Максим Резниковка Арассыыйа Дьоруойа Юнус-Бек Евкуров чороону уонна 100 г кыһыл көмүс кутуутун туттарда.

Онтон 1 миэстэни ылбыт «Рязань» уонна «Прыткий» паараларыгар Саха сирин баһылыга Айсен Николаев чороону уонна 250 г кыһыл көмүс кутууну туттарда.

Итини таһынан турнирга рекорду олохтообут, Беларусь хамаандатын уонна анал байыаннай дьайыыттан сылдьар снайпердарыгар анал бириистэр туттарылыннылар.

Итини сэргэ турнир кылаабынай судьуйата, РФ Бырабыыталыстыбатын бэрэссэдээтэлин солбуйааччыта – Уһук Илин боломуочуйалаах бэрэстэбиитэлэ Юрий Трутнев үс анал бирииһи олохтообут.

Бастакы бириис – полигон рекордун олохтооһун иһин. Бу бирииһи, биһиги биир дойдулаахтарбыт, 3000 миэтэрэҕэ сыалы табан бырааттыы Сергей уонна Василий Яковлевтар 250 грамм кыһыл көмүс кутуутун ыллылар.

Иккис бириис – бастакытын аан дойдутааҕы турнирга кыттыбыттарга: «Клим», “Зубр”, “Белый”, “Серб” састааптаах Беларусь Өрөспүүбүлүкэтин хамаандата кыттыыны ылла. Кинилэргэ «Аркуда» 375 CheyTac калибрдаах снайперскай комплексы атыылаһарга сэртипикээт туттарылынна.

Үһүс бириис – анал байыаннай дьайыы зонатыттан кэлбит бастыҥ снайпер пааратыгар, кинилэргэ тепловизионнай прицельнай комплекс туттарылынна.

Федор Охлопков аатынан турнир чэрчитинэн быйыл дьоҕус турнир буолан ааста. Кинилэргэ наҕараадалары Арассыыйа Дьоруойдара – Андраник Гаспарян, Ярослав Якубов уонна Александр Колесов туттардылар.

Үһүс миэстэни Бурятия Өрөспүүбүлүкэтин хамаандата (Ронис Артем, Ксения Воронецкая, Любовь Февралева) ылан, пневматическай бэстилиэтинэн наҕараадаланнылар.

Иккис миэстэни Амур уобалаһын хамаандата (Варвара Брылева, Роман Штегман, Михаил Казаков ылан, пневматическай бинтиэпкэнэн наҕараадланнылар.

Онтон бастакы миэстэни Магадаан уобалаһын хамаандата (Юлия Терезюк, Николай Грищенко, Софья Гороховская) ылан, ЭДган Леший 2 снайперскай бинтиэпкэнэн наҕараадалннылар.

Саамай ыраах түмүктээх ытыыга (200 миэтэрэ) анал бирииһи Амур уобалаһын хамаандата ылла: снайпер Варвара Брылева уонна корректировщик Роман Штегман. Снайперга – прицелы, корректировщикка – биноклы Юнус-Бек Евкуров туттарда.