Курс валют
Курс валют
Меню
Поиск по сайту

ЭН

03.01.2013 04:07 0

Эн онно дьэ өйдөөбүтүҥ тугуҥ эйиэхэ тиийбэтэҕин, ханнык санаа эйигин эрэйдээбитин.

ЭН
Эйиигин көрө түһээт дэлэй, уйгу-быйаҥ олоххор туох эрэ алдьархай ааҥнаабытын сэрэйдим. Онтон атын эн мин диэки хайыһыа да суох этиҥ, миигин киһи баар диэн аахайыаҥ да суоҕа этэ. Баай-талым эйгэҕэр чалҕарыйбыт атастарыҥ-доҕотторуҥ ортотугар миэхэ биир миэстэ суоҕа…

Мин суоҕум – эн өрөгөйдүүр, дьол тохтоло суох субуллар хонуктаргар. Мин суоҕум эн саамай үөрүүлээх-көтүүлээх күннэргэр. Мин суох буолуом этэ, өскөтүн эн олоххор алдьархай ааҥнаабатаҕа буоллар.Онтон мин сылайбытым. Бу сиргэ букатын кэлбиттии сананан, оруо маһы ортотунан дохсуннук сылдьар кэмнэргэр араҥаччылыырбыттан. Сылайбытым, эн үтүө бэйэҕин, өркөн өйгүн күүһүм-кыаҕым тиийэринэн көмүскүүрбүттэн. Сылайбытым, хаһан эрэ олоҕум үтүөтүн былдьаабыт салгымтыалаах, сындааһыннаах күннэрбиттэн ороон илдьэ бараргын кэлтэйдии кэтэспиппиттэн. Сылайбытым уонна атын аартыктары арыйбытым.

Барыта мин сэрэйбитим курдук буолбута. Бэйэм эйигиттэн аккаастанан барыахпыттан саргы-сатаҕай олохпун саамылыы сатаабытым. Эн да миигиттэн ордубатаҕыҥ, олоххор тугуҥ эрэ тиийбэт курдугун сэрэйэрим. Үөрүү-өҥнөнүү, бэйэни астыныы албын мүнүүтэтигэр эмискэ сылтаҕа суох соҥуоран саҥата суох барарыҥ, тас өттүттэн көрдөххө эрэ кылабачыйар көлдьүн олоххун саҥа өйдүү сатыырдыы тулаҕын көрүнэриҥ. Ол эрээри тугуҥ тиийбэтин билбэт буолаҥҥын саҥата суох хаардаах хайалары одуулууруҥ ыраах Альпаҕа, күп-күөх киэҥ дуолга ымсыырарыҥ тымныы Канадаҕа, ип-итии сырылас куйаас күн тоҥон дьигиһис гынарыҥ Индияҕа.

Онтон кэлиэхтээх барыта кэлбитэ, буолуохтаах барыта туолбута. Ымсыы-мэнэгэй иччилэрэ эйигин тула илбис үҥкүүтүн үҥкүүлээн күөрчэхтэммиттэрэ. Эн кутуҥ соһуйан ыалдьыбыта, түүлгүн да, илэҕин да араарбат гына босхо барбытыҥ. Олох икки өлүү икки охсуһуутугар түлэкэччийэн түҥ-таҥ барар түүннэргэр мин сырдык, санаам эйиэхэ Араҥаччы буолан көстүбүтэ, үтүө санаа эрэ олоҕу уһатарыгар эрэли укпута.

Эн онно дьэ өйдөөбүтүҥ тугуҥ эйиэхэ тиийбэтэҕин, ханнык санаа эйигин эрэйдээбитин. Ол — мин этим. Тугу да эрэйбэт, хаһан да арбаммат мин араҥаччылыыр күүһүм эйигин үйэҥ тухары арыаллыан, өйөбүл буолуон баҕарбытыҥ. Ол эрээри эн биири эрэ аахсыбатаҕыҥ. Ол мин эйиэхэ төннөр баҕабын билии этэ.

Оттон мин эйиэхэ төннүөхпүн баҕарбатаҕым уонна олоҕум үлтүркэйдэрин саамылыырбын ордорбутум.

Надежда ПЕТРОВА. 

Источник: old.aartyk.ru

Оставить комментарий    

!