Борис ПАВЛОВ телеграмыттан…

ЧУУМПУ ДЬОЛ 

Бүгүн дьиэбитигэр кими да  

ыҥырыахпыт  

суоҕа 

Балаҕаммыт иһин  

үчүгэй баҕайытык 

хомунуохпут, 

Оргууй сэлэһэ, чэй иһэ 

Оһох иннигэр олоруохпут. 

Тыал – куус, 

силлиэ буурҕа барыта 

Биһиги балаҕаммытын 

таарыйбакка  

ааһыахтара 

Хоп – сип, ордук санаа, 

өһүргэс, 

Мин халыҥ халҕаммар 

иҥнэн үлтү барыахтара. 

Биһиги олоруохпут  

Аан дойдуну кытта 

атааннаспакка, 

Баары кытта сүрэхтиин 

сөпсөһөн, 

Холумтан иһиттэн 

күөдьүйэр 

уоттан 

Чуумпу дьолу төрөтөн…

      ***

КҮНҮ УҺУГУННАРЫЫ

Сарсыарда ким да иннинэ 

уһуктуом, 

Оргууй туран үүттээх 

кофе оҥостуом, 

Саҥа күнү сүрэхпинэн 

кэтэһэ 

Эргэ кириэһилэбэр 

олоруом. 

Халлаан сиигэ арыллыа 

тыаһа суох, 

Сырдык туран кэлиэ 

миигиттэн 

көҥүллэппэккэ 

эрэ, 

Уһуктан кэлиэхтэрэ 

аан дойду бары 

чыычаахтара, 

Көҥүл ырыалаахтара, 

чуор бэлэстээхтэрэ. 

Ону кытта уһуктуохтара 

мин саамай 

таптыыр  

дьоннорум, 

Хаһан эрэ, ханна эрэ 

көрсүөхтээх 

доҕотторум. 

Кинилэр бары туспа 

түбүктээх 

буолуохтара, 

Эн бааргар отой да 

кыһаллыахтара 

суоҕа, 

Арай эн күлүккэр 

үөрэ имнэниэҥ 

Бу күнү мин  

уһугуннардым 

диэн. 

***

СУРУЙУОҔУ…

Суруйуоҕу

баҕарыллар хоһоону чуумпуну.

Тыаһа- ууһа, омуна- төлөнө, албына-көлдьүнэ суох нууралын,

Саха сирин бары сэттэ уон саастаах оҕонньотторун,

Саас кэлэн күөлгэ түһэрбит мас куйуурдарын,

Ууттан хостообут көмүс курдук күлүмүрдүүр мундуларын,

Туохтан да астынан,

Үөрэн-көтөн, ымманыйан туралларын…

Суруйуоҕу баҕарыллар хоһоону сэмэйи.

Эн ааҥҥар сатаан батан киирэри,

Сүрэхтэргэ оргууй хааман тиийэри,

Сонун ыйаан, бэргэһэтин устан 

ыксаабакка сэһэргэһэри,

Киэһээни быһа күн-дьыл туһунан кэпсэтэри…

Суруйуоҕу баҕарыллар хоһоону тыаһаабаты.

Тэлэбииһэртэн, араадьыйаттан хаһыытаабаты,

Оҥосто оҥосто арбаабаты,

Сымыйа сүрэҕинэн таптаабаты…

         ***
Источник – Борис Кэм