Курс валют
$
75.03
0.16
88.96
0.33
Курс валют
Курс валют
$
75.03
0.16
88.96
0.33
Меню
Поиск по сайту

Михаил Никифоров Мэҥэ Хаҥаласка 5 хаһаайыстыба салайааччыларын кытта көрүстэ

08.08.2020 15:28 0
Михаил Никифоров Мэҥэ Хаҥаласка 5 хаһаайыстыба салайааччыларын кытта көрүстэ

Бэҕэһээ СӨ Бырабыыталыстыбатын Бэрэссэдээтэлин солбуйааччы эбээһинэһин толорооччу Михаил Никифоров Илин эҥэр үс улууһугар оробуочай сырыынан үлэлээбит иккис оройуонунан Мэҥэ Хаҥалас улууһа буолла.


Михаил Викторовиһы кытта СӨ Тыа хаһаайыстыбатыгар миниистирэ Александр Атласов уонна министиэристибэ үүнээйини үүннэриигэ, мелиорацияҕа, материальнай-техническэй хааччыйыыга уонна тыа хаһаайыстыбатын информатизациялааһыҥҥа департаменын салайааччыта Василий Чичигинаров, Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин үлэлэстилэр. Бырабыыталыстыба Бэрэссэдээтэлин солбуйааччы эбээһинэһин толорооччуну көмөлөһөөччүтэ Геннадий Сергеев арыаллаан сырытта.

Оройуон баһылыгын социальнай боппуруостарга солбуйааччы, баһылык эбээһинэһин быстах кэмҥэ толорооччу Мирон Свинобоев уонна улуустааҕы тыа хаһаайыстыбатын управлениетын начаалынньыга – оройуон баһылыгын тыа хаһаайыстыбатын боппуруостарыгар солбуйааччы Иннокентий Семенов үлэлэстилэр.

Уус Алдан уонна Мэҥэ Хаҥалас улуустарын кыраныыссаларыгар Бырабыыталыстыба Бэрэссэдээтэлин солбуйааччыны Мөҥүрүөн нэһилиэгин баһылыга Иннокентий Андросов көрүстэ, нэһилиэгин олоҕун-дьаһаҕын кэпсээтэ, кыһалҕаларын билиһиннэрдэ.

Салгыы, Михаил Никифоров “Тумул” тыа хаһаайыстыбатын оҥорон таһаарар кэпэрэтиибэ Мөҥүрүөн нэһилиэгэр арендалыыр 44 гаалаах Бэһэр бааһынатыгар таарыйда. Манна кинини кэпэрэтиип салайааччыта Таисия Десяткина көрсөн, хаһаайыстыба иннигэр турар соруктары сырдатта.

Бурдук үүнүүтэ мөлтөх буолбутун Михаил Никифоров бэйэтэ көрдө. Өссө бу кэм үүнэ сатаабыт бааһыналара буоларын Таисия Васильевна уонна хаһаайыстыба кылаабынай агронома Тимур Десяткин эттилэр. Кэпэрэтиип салайааччыта от уонна сүөһү аһылыгар барар бурдук саппааһын булунууга кураанынан сибээстээн боппуруостар үөскээбиттэрин эттэ. Өрөспүүбүлүкэ таһыттан аҕалыллар бурдугу, комбикорму, эти, үүт аһылыктары кытары олохтоох бородууксуйаҕа күрэстэһэр кыаҕын үрдэтэргэ сыана араастаһыытыгар субсидия көрүллэрэ наадатын уонна кииннээн батарыыны туруоруста.

Салгыы Михаил Никифоров былааннаммытынан Мэҥэ нэһилиэгэр кэлэн, нэһилиэк оттонор биир саамай улахан Чандаҕаайы алааһыгар таарыйда. Күүстэрин-сүбэлэрин холбоон алааһы барытын күрүөлээн тураллар. Чандаҕаайыга Бырабыыталыстыба Бэрэссэдээтэлин солбуйааччы эбээһинэһин толорооччуну нэһилиэк баһылыга Александр Куприянов уонна улууска дьон сүөһүтүн көрүү-истии өҥөтүн саҕалаабыт “Хаххах” кэпэрэтиип салайааччыта Маргарита Скрябина көрсөннөр, санааларын үллэһиннилэр.

Манна ходуһаҕа үүнүүтэ эмиэ мөлтөх буолбутун, биир 40 гаалаах өртүттэн икки эрэ кэбиһиини ылбыттарын кэпсээтилэр. Кэпэрэтиип салайааччыта үүтү, эти субсидиялааһын саҥа бырагыраамата олоххо киллэрилиннэҕинэ, кэпэрэтиип онуоха сөп түбэһэр үлэ тутулун талыныытыгар мунаарар боппуруостарыгар ыйыталаста. Ити сүрүннээн биирдиилээн үүт туттарааччылар иннилэригэр салгыы үүтү туттара сылдьыыны эбэтэр ийэ сүөһүгэ субсидияны ылыыны талыы боппуруоһа турар буолбутун кытта сибээстээх. Иккис түгэҥҥэ үүт туттарааччы соҕотуопкаһыттыын үүтүн харчытын үүккэ субсидията суох аахсар буолар диэн дьоҥҥо быһаараллар. Үүтү астыыр-үөллүүр тэрилтэ төлүүр харчыта эрэ хаалар.

Төҥүлү нэһилиэгэр Михаил Никифоров “Хоту” кэпэрэтиип үрүҥ аһы астыыр кэмбинээтигэр сырытта. Алта нэһилиэк үүтүн тутар кэпэрэтиип салайааччыта Иван Максимов кэмбинээккэ туох аһы-үөлү астыылларын саҥа сылдьар үрдүкү салайааччыга кэпсээтэ, наадалаах тэрилинэн-тээбирининэн толору хааччыллан олороллорун көрдөрдө. Үрүҥ ас арааһын оҥороллорун таһынан сир аннынааҕы ыраастаммыт ууну куталлара атыыга хамаҕатык барар. Иван Ильич эмиэ соҕотуопка бородууксуйатын кииннээн батарар тэрилтэ наадатын ыйда.

Мэлдьэхси нэһилиэгэр Михаил Никифоровы Афанасий Борисов бааһынай хаһаайыстыбата нэһилиэккэ арендалыыр 200 гаалаах Мээккэ бааһынатыгар сырытыннардылар. Бырабыыталыстыба Бэрэссэдээтэлин эбээһинэһин толороччуну нэһилиэк баһылыга Валерий Никифоров уонна хаһаайыстыба баһылыга Афанасий Борисов көрүстүлэр. Бааһынаҕа сенажтааһын үлэтэ көрөн турдахтарына түмүктэннэ. Бурдук үүнүүтэ олох мөлтөх буолан, хаһаайын сүөһү аһылыгар суһаллык көһөрөргө күһэллибит. Тиэхиньикэлэрэ эргэрэннэр, сатаан оҥостуу күүһүнэн үлэлииллэр. Сиэмэни атыылаһыыга көрсөр ороскуоту толуйуу суох буолбута хаһаайыстыба салайааччытын долгутар.

Ходоро нэһилиэгэр Михаил Никифоров өрөспүүбүлүкэ биир улахан сүөһү комплексыгар – “Чүүйэ” муниципальнай хаһаайыстыба истиэп кыһыл боруодата сүөһүлэри туруорар комплексыгар сырытта.

Хаһаайыстыба салайааччыта Святослав Кириллин үлэлэрин-хамнастарын кэпсээтэ. Сиилэс угуута салҕана турара. Бурдук курааннаан, 700-түү туонналаах икки траншеяларын толорбот буолбуттар. 500 туоннаны угар соруктаахтар. Орто ыамнара 2700 киилэ. Ол гынан, сүөһүлэрэ сааһырбыттар. Уоннуу саастаах ынахтар. Онон, эдэримситии эбэтэр олох да хааны уларытыы соруга турбут. Орто хамнастара 36 тыһыынча солкуобай. Хамнаска, нолуокка иэстэрэ суох. Эдэримситээри, сыл аайы түөрт уоннуу ыччат сүөһүнү хааллара сатыыллар. Сайылыгы саҥардыахтаахтар. Түөрт кыбартыыралаах дьиэтэ бүтэн, титиигэ тутуллуохтаах.

Михаил Никифоров Мэҥэ Хаҥалас улууһугар сылдьан тугу көрбүтүн-истибитин сыаналыырыгар, “кэнники кэмҥэ тыа хаһаайыстыбатын министиэристибэтин билиҥҥи салалтата ыытар бэлииикэтин учуоттаатахха, чуолаан, үп-харчы өртүнэн чэбдигирдии да бырагырааматын ыллахха, хаһаайыстыбалар туруктара балачча тупсан, инники сайдыы туһунан толкуйдуулларын чопчу бэлиэтээтим, – диэн эттэ. – Кураан буолан, оттооһуҥҥа былаан аҕыс уонча бырыһыан туолуох курдук буолбут диэн өйдөөтүм. Ол иһин көһө сылдьан оттуур биригээдэлэри тэрийиигэ көмөнү тууорсаллара өйдөнөр. Итиниэхэ сүрүн боппуруоһунан таһыыга көмө буолуоҕа. Улуус иһигэр таһыыга-тиэйиигэ көмөнү туруорсаллара эмиэ оруннаах. Бурдук үүнүүтэ эмиэ мөлтөх.

Мэҥэ Хаҥалас улууһа өрөспүүбүлүкэҕэ саамай бөдөҥ тыа хаһаайыстыбатын улууһа буолар. Үүтү астааһыҥҥа-үөллээһиҥҥэ “Хоту” кэпэрэтиип ырыынагын толору баһылаан олорор тэрилтэ диэн сыаналанар. Үүт соҕотуопкатын былаана Мэҥэ Хаҥалас улууһугар туола сатыыр чинчилээх диэн көрдүм. Инникитин тыа хаһаайыстыбатын өйөөһүҥҥэ саҥа механизмнарга сыһыаннаах этиилэр киирдилэр”.

Бырабыыталыстыба Бэрэссэдээтэлин солбуйааччы эбээһинэһин толорооччу Михаил Никифоров, бириэмэтэ төһө да ыгым соҕус буоллар, кыраапыгынан толору сылдьан хаһаайыстыбалар салайааччылара тугу туруорсалларын, туох кыһалҕалаахтарын сиһилии истэн, үлэлэрин көрөн, Мэҥэ Хаҥалас улууһун тыа хаһаайыстыбатын эйгэтин кытта бастакы билсиитэ үчүгэйдик, көнө сүрүннээхтик барда диэн этиэххэ сөп.

***

Аркадий ИННОКЕНТЬЕВ

Оставить комментарий