Дьааҥыга 38 туонна от тиийдэ

Сылы эргиччи нэһилиэнньэни үүт-эт аһынан хааччыйар туһугар бэйэбит фермалаах буоллахпытына ордук буолсу диэн санааттан  2015  сыллаахха „Полюс Холода“ кооператив иһинэн „Алгыс“ диэн кооператив тэриллэн үлэтин саҕалаабыта. Ити кэмтэн ыла номнуо сэттэ сыл ааһа охсубут.

Билигин 224 төбө кыстыкка турар, ол иһиттэн ыанар ынаҕа 100. Барыта 14 киһи үлэлиир. Кооператив тэриллибит сыалын-соругун ситэн кыһыннары-сайыннары нэһилиэнньэни үүт аһынан хааччыйа олорор. Ааспыт сайын курааннаан уонна баһаар буолан, кооператив 200 туонна эрэ оту бэлэмнэммитэ. Бу кэнники күннэргэ чааһынай дьоннортон от атыылаһан олорор. Быйыл от тиэйиитигэр Бырабыыталыстыба, Тыа хаһаайыстыбатын министиэристибэтэ өйөөн от тиэйиитигэр үп-харчы көрүллүбүтэ. Кырдьыктыы эттэххэ, чааһынайдар да төһөнү атыылыахтарай, от бүтэн күн-дьыл ыараан, киирэн барар. Бюджет харчыта сыл саҥатыгар, тохсунньу ыйга хамсыы илик кэмэ буолан оту тиэйэн аҕалыыга дьону кытта иэс аҕаларга кэпсэттэххэ эрэ табыллар буолбута.  „Полюс Холода“ кооператив 2016-2017 сылларга улууска от тиэйтэрбит буолан, Екатерина Алексеевна билэр суоппардарыгар, Чурапчы уолаттарыгар, сибээскэ тахсан, иэс оту аҕалан биэрэллэригэр көрдөспүт. Екатерина Портнягина үлэлээбитин тухары эппит тылыгар турара уонна чиэһинэйэ сүрүн оҥкул буолан, суоппардар иэс аҕаларга сөбүлэһэн, Дьааҥыга муҥутуур тымныы турбут кэмигэр, тохсунньу 27-28 күннэригэр 3 массыынан 37,8 туонна от тиийдэ.

Кооператив аатыттын махталларын тиэрдэллэр, тымныыны, ырааҕы аахсыбакка айаннаан тиийбит суоппардарга: Хоютанов Дмитрий Иосифовичка, Туласынов Иван Анастатовичка, Потапов Егор Александровичка. Ону тэҥэ, кооперативка эрэнэн, көмөлөһөн отун иэс биэрбит Чурапчы олохтооҕор Егор Лукиҥҥа. Бу ыарахан күннэргэ олохтоох бэйэлэрин уоллара Иннокентий Горохов күн ахсын Остуолбаттан, Мачахтан от-мас тиэйэн абыраата диэн эмиэ махталларын тиэрдэллэр.

Бу күннэргэ Эдуард Иванович Макаров 3 массыыната айаннаан иһэр. Уопсайа, 200 туонна от тиэйиллиэхтээх.

Уопсайынан, ыарахан, кытаанах кэмнэргэ киһи хайдаҕа биллэр дииллэр. Екатерина Алексеевна салайааччы уонна киһи быһыытынан сиэрдээх буолан, дьон-сэргэ кини тылын быһа гыммат. «Инникитин да, бэйэ-бэйэҕэ үтүө сыһыан үксүү турдун, киһи киһиэхэ итэҕэйэрэ саамай улахан эрэл. Ыарахан кэмҥэ эйигин киһи эрэ абырыыр. Онон киһилии, сиэрдээх сыһыан үксүү турдун», – диэн бэлиэтиир кооператив дириэктэрэ Екатерина Портнягина.

***

ТХМ пресс-сулууспата