Курс валют
$
63.72
0.09
70.76
0.03
Курс валют
Курс валют
$
63.72
0.09
70.76
0.03
Меню
Поиск по сайту

Үөһээ Бүлүү аннынан сылдьар паром араллаана

02.08.2018 23:40 5
Үөһээ Бүлүү аннынан сылдьар паром араллаана

Саха сиригэр төгүрүк сыл суол-иис айдаана. Кыһын өрүспүт туран биэрбэт, сайынын уу түһэр-тахсар, аны паром айдаана бассаабы ылан кэбиһэр.

Өрүстэри туоратар паром тиийбэтэ, массыына элбээн иһэрэ кылгас сайыммытын аймыыр. Айан дьоно күнү күннүктээн, сороҕор күнүн-түүнүн эргитэн кытылга хоройон олорор.  Аны паромҥа киирэн баран киһи барыта кыйытта сылдьар, инньэ гынан кыраттан да уот начаас сата баһа тардыллар.

Үөһээ Бүлүү аннынан Бүлүү эбэни туоратар паром сырыыта сотору-сотору бассаап аһа буолар. Хас да сылааҕыта бэйэм айаннаары эмиэ айдааҥҥа хапсан ылбытым. Анараа туоруурга — биир сыана, кэлэргэ  — атын сыана этэ. Ону туоһулуур туох да чек-тайма биэрбэтэхтэрэ, онуоха «тоҕо манныгый» диэн токкоолоһооччу буолан ууга быраҕылла сыспыттаахпын.  Куруубай хааннаах оройунан көрбүт бөтөс «хаһан да массыынаҕын уонна туоратыахпыт суоҕа» диэн сырыһыннара сааныылаах этэ. «Ол кэнниттэн уонна «онно» барбатаҕым», — эҥин диэм этэ да, сымыйа буолуо, сылдьан бөҕө. Хата «Үөһээ Бүлүү дьоҕус мафията» диэн ыстатыйа кэнниттэн си дьүгээр ол паромщик «үлэтин сирэн» атын сиргэ баран хаалбыт этэ.

Оскуола аһыллара чугаһаан, үөрэх, үлэ саҕаланан айан-сырыы хойунна. Ону сэргэ күһүҥҥү быыбардарга кыттар кандидаттар, агитациялыыр ыстааптар үлэһиттэрэ, араас чыыннаах-хааннаах куратордар кынаттара кууран төттөрү-таары уокуруктарыгар тиэстэллэр. Ол сылдьан эмиэ Үөһээ Бүлүүтээҕи паромнары  мөҕүттэллэр.

— Кассовай аппарааттара суох, туоратан испэттэр, карточканан төлөбүрү ылбаттар, — диэн.

Улуус кулубатын Вл. Поскачины элбэх киһи «паромунан» киирэн ньиэрбинэй систиэмэтин сорунуулаахтык тургуппут быһыылаах. Бастаан «мин хонтуруоллуур уорган буолбатахпын, онто да суох уорган арааһа элбэх» диэн Владимир Семенович «Аартык.ру» сураһыытыгар хоруйдаата.

Салгыы кэпсэтэн билбиппит, паромнар бары кэтэх бас билиилээхтэр эбит. Хонтуруол диэбиккэ дылы, араас уорган бары кэлэн бэрэбиэркэ бөҕө ыыппыт. Ол түмүгүнэн хас да паром үлэтэ тохтотуллубут. Сэрэйдэххэ, ол иһин уочарат эбии уһаатаҕа.

«Арыыны эргийэр буолан чаас кэриҥэ паром устар, онон уочарат үөскүүр», — диэн олохтоох дьаһалта этэр.

Оттон кассовай чек 4 паромҥа охсуллар, карточканан төлөбүрү ылыы интернет суоҕуттан диэн паромщиктар быһаарбыттар.  Бу күннэргэ Үөһээ Бүлүүтээҕи паромщиктары Ньурбаттан нолуогабай кэлэн бэрэбиэркэлиэхтээх үһү. Ол түмүгэр өссө хас паром хаалыа биллибэт.

***

Соторутааҕыта Ил Дархан эб.тол. Айсен НИКОЛАЕВ «Вилюй»  ФКУ суол управлениетын начальнига Николай АНДРЕЕВЫ кытары көрсүһүүтүгэр, Дьокуускайтан Таас Үрэххэ диэри айан аартыгар өрүстэри, үрэхтэри туоруур муоста тутуутугар болҕомтолорун хатаатылар диэн хаһыаттар суруйбуттара. Үлэ 2020 сылга диэри барыахтаах. Аны икки сылынан саатар биир-икки үрэҕи, өрүһү туоруур муоста тутуллара буоллар…

***

Туйаара НУТЧИНА,

Aartyk.Ru

 

Обсуждение • 5

Добавить комментарий
  1. Петя

    Уеьээ Булуу аннынан Эбэни туоруурга муоста наада. Оччо5о Дьокуускай — Мииринэй федеральнай суолунан сырыы дьэ сыыдамсыйыа этэ. НАС Уеьээ Булуу аннынан муоста туттарара буоллар абырыа этэ Булуу сунньунээ5и улуустары, нэьилиэктэри.

  2. Паромҥа биирдэ айанньааччы

    Дьэ, сүрдээх наглай дьон үлэлиир сирэ! Ама да буолбутун иһин, паромнарыгар биирдии массыынаны тиэйэн баран хаһыытаппытынан атын дьону хаалларан баран туоруу тураллар. Харчыга наадыйбат дьон! Туох да култуура, эбээһинэс, дьоҥҥо көмө диэн өйлөбүл диэн суох сирэ. Бэйэ сирин олохтоохторо үөрэммиттэр бһх, саҥарбаттар, атын сиртэн ааһан иһэр дьоҥҥо наһаа сүөргү! Ону өссө астыналлар, ьиһиги манныктарбыт дьэ диэн! Хаһан сааһыланыах дьон эбитэ буолла!?

  3. Биир дойдулаах.

    Элбэхтик айаннаан билбит чахчыларбын Аартык табатык суруйбут. Федеральнай суолу ситимниир уу суолугар үлэлиир тэрилтэлэр таһар-тиэйэр үлэлэрэ бары өттүнэн ирдэбилгэ эппиэттиэхтээх, дьоҥҥо оҥорор өҥөтүн хаачыстыбатын олохтоох дьаһалта хонтуруоллаһыахтаах, ирдиэхтээх.

  4. 1

    Федеральнай суолга баар өрүһү, үрэҕи туорааһыны тоҕо федеральнай суол тэрилтэтэ хааччыйбатый? Федераллар хас да парому аҕалан туруортаатахтарына проблема тохтуо этэ. Паромнара тиксэр сирдэрин да элбэх улахан техникалаах тэрилтэ үчүгэйдик оҥостуо этэ. Үөһээ Бүлүү парома особенно дьаабытык үлэлиирин сөпкө бары бэлиэтээбиттэр. Кыһын мууһунан суолу, сайын паромунан туорааһыны республика салалтата федераллартан туруорсуохтаах дии саныыбын. Чааһынайдар эбии бэйэлэрэ сылдьар буоллахтарына бэйэлэрэ причал оҥостон сырыттыннар ээ. «Доруобай» конкуренцияны туораан хааллахтарына үлэлээтиннэр. Култуура, хааччыйыы таһыма тупсуо этэ дии саныыбын.

  5. Тыа уола

    Уелээ-Булуугэ оптоволокно киирэрэ буоллар сорох проблема ке5уруе этэ. Картаннан безналичнай расчет энин баар буолуо этэ.

Оставить комментарий