Курс валют
$
57.51
0.06
67.89
0.04
Курс валют
Меню
Поиск по сайту

Владимир ПОСКАЧИН: «Мин көҥүл сахабын!»

05.04.2017 16:54 9

Күһүн, балаҕан ыйын 10 күнүгэр, Үөһээ Бүлүү улууһун баһылыгын быыбара буолар.

Владимир ПОСКАЧИН: «Мин көҥүл сахабын!»

Муус устар 9 күнүгэр праймериз саҕаланыахтаах. Онно кыттар Владимир ПОСКАЧИН улууһун дьонугар анаан тылын тиэрдэр.

Үтүө-мааны Үөһээ Бүлүүлэр!

Этэҥҥэ сырыттахха, күн-дьыл ааһара сүрдээх түргэн. Төрөөбүт дойдубар Баһылыгынан үлэлээбит иккис болдьоҕум бүтэр уһуга кэллэ. Кэннибин хайыһан көрөбүн. Тугу оҥордум?

Быыбарданаат, хара ааныттан сүрүн болҕомтобун нэһилиэктэр икки ардыларынааҕы суоллары оҥорууга уурбутум. Сырыы-айан сыыдам буоллаҕына, сайдыы түргэнник кэлэр. Чыбыыда муостата тутуллан, киини кытта сылы быһа быстыбат сибээс олохтонно. Боотулуу, Оҥхой, Маай, Мэйик, Балаҕаннаах нэһилиэктэрэ суолланнылар, Боотулуу суолугар 2 улахан муоста, Тыалыччыманы туоруурга 2 муоста тутулуннулар, Кудуга, Балаҕаннаахха барыыга муоста үлэтэ саҕаланна.  Үгүс нэһилиэктэр ис суоллара, уулуссалара оҥоһулунна. “Бүлүү” СУ ФКТ салалтатын кытта күүскэ үлэлэhэн, биhиги улууспут сиринэн-уотунан ааhар федеральнай суолга өрөмүөн үлэтэ ыытылла турар.

Көрө сылдьаргыт курдук, элбэх тутуу барда. Ол иһигэр таас тутуу: 1 балыыһа комплекса, 4 оскуола, 2 детсад – тутулунна. Түргэнник тутуллар матырыйаалынан 3 оскуола, 4 детсад, 6 култуура-спорт дьиэлэрэ тутулуннулар. Дьон олорор усулуобуйатын тупсарыыга, толору хааччыллыылаах дьиэлэри тутууга, газтааһыҥҥа, киин ититиигэ холбонууга, хаарбах дьиэлэртэн көһөрүүгэ былааннаах үлэ тэтимнээхтик барар.

Олохтоох урбаанньыттар, тутуу, суол тэрилтэлэрэ лаппа кыаҕырдылар, улуус иһигэр хайа баҕарар тутууну ылсар кыахтаннылар.

Эр киһи, ыал аҕатын, уол оҕо туһун-тускутун үрдэтиигэ үгүс сугулаан, кэпсэтии барда,  сүбэ-соргу түмүлүннэ, оскуолаларга гендернэй кылаастар арылыннылар.

Спорка улахан болҕомто уурулунна, үбүлээһин биллэ үрдээтэ, анал оскуолалар арылыннылар. Спорт национальнай көрүҥнэригэр муҥутуур ситиһиилэннибит.

Кэнэҕэс толкуй, былаан элбэх.  Ону олоххо киллэрэр туһуттан мин үһүс болдьоххо туруорунар бигэ санааны ылынным.

«2030 сылга дылы Бүлүү бөлөх улуустар социальнай-экономическай сайдыыларын Стратегиятын» бырайыага дьүүллэһиигэ сылдьар, ол олоххо киирэригэр күүстээх үлэ барыа, араас федеральнай, республиканскай программаларга кыттан,  үбү-харчыны, инвестицияны тардыы соруга турар.

Сайдыы бырайыактарынан балысханнык барар туруктаах. Суол тутуута Сургуулук, Далыр, Кырыкый, Маҥаас хайысхатынан Бүлүүнү, Түүкээни туоруур муосталары тутуу, уҥуоргу нэһилиэктэр ититиилэрин боппуруоһун быһаарыы, цеолиты таҥастыыр собуоту тутуу курдук дьоһун соруктар тураллар, олус интэриэһинэй үлэ күүтэр.

Биһиги өрөспүүбүлүкэҕэ бастакынан тыа хаһаайыстыбатын сайыннарыыга 5 сыллаах бырагыраама ылынан, сууккаҕа 10-15 т үүтү астыыр комбинат, Намҥа сүөһү өлөрөр сыах, Ороһуга 120 миэстэлээх хотон тутулунна. Тыа хаһаайыстыбатын улууһа буоларбыт быһыытынан, өссө туох эрэ сонун ньыманы көрдүөххэ, тугу эрэ тобулуохха наада буолла.

Бырамыысыланнаска олохтоох ыччаты сыһыарыы ситэ кыаллыбакка турар, ол инниттэн профориентационнай үлэ , идэҕэ уһуйуу оскуола аайы cаҕаланыан наада.

Сүрүн хамсатар күүс — киһи хаппытаала, сайдыы төрдө- киһиэхэ!

Эргиччи сайдыылаах, билиилээх-көрүүлээх киһини иитэн таһаарыахтаахпыт. Ол туһугар доруобуйа харыстабылын, үөрэҕирии, култуура, спорт тэрилтэлэрэ, салалта — бары бииргэ, биир тускулунан үлэлиирбит ирдэнэр.

Итини этэн туран, бу дьыл муус устар 9 күнүгэр «Биир Ньыгыл Россия» баартыйа ыытар барыллаан куоластааһыныгар (праймериһигэр) мин кандидатурабын өйүүргүтүгэр ыҥырабын.

Эһиги итэҕэлгит, эһиги эрэлгит – мин көтөр кынатым.

Мин көҥүл сахабын – мин дойдум уолабын!

Биһиги күүспүт – түмсүүгэ!

 

Владимир Поскачин.

 

Обсуждение • 9

Добавить комментарий
  1. Ч

    Билбэт киьим гынан баран, салайа уорэннэ быьыылаах. Иннигэр элбэх соругун олоххо киирдин, дойдун-дьонун туьугар улэлээ, кыаххын толору туьан.

  2. Бандьыыт

    Оттон бу мин кенул бандьыыппын!

  3. Андыкай

    Уеhээ Булуугэ улахан промышленность, улахан капитал интэриэhэ киирдэ5инэ кенул саха буоларын наада. Уеhээ Политика ирдэбилигэр, партийнай дисциплина5а кенул дайаргар ыарахан буолуо. Эрдэ дьыбардаахха санардын дуу? Мунур ыраахтаа5ы да5аны кенул буолбат.

  4. Тангара

    Оттон мин кенул танарабын (ыраахтаа5ы кенул буолбат буолла5ына)

  5. инн

    Владимир Семенович,дьонун-норуотун туhугар кытаат,ессе улэлээ.

  6. Сыымах

    Молтох киъи

  7. Сыымах

    Харчы баарын тухары тутуу баар онно бэйэлэрэ оностоллор. Манча ары буолар ол иъин спортка улэлииллэр. Дьону тумпэтэ.

  8. стрелок

    Этэннэ улэлээтин.Владимир Поскачин дьиннээх конул Саха.Билинни кэмнэ оннук дьон оhуоба наадалар.Уонна уопсайынан Уоhээ-Булуулэр конул санаалаах бэйэлэрэ мнениялаах дьон.Кинилэртэн атын улуустар холобур ылыахтаахпыт

  9. Тарааьап

    Владимир Семенович Поскачин диэн аат Уеьээ Булуу улууьун историятыгар кыьыл кемус буукубуннан суруллар киьи буолла. Дьиннээх патриот. Улуус эрэ буолбакка республиканскай масштабтаах салайааччы буола ууннэ. Хаьан да Саха буоларын умнубат, утуе киьи! Дьокуускай куорат мээринэн кэлэрэ буоллар диэн ба5а санаалаахпын!

Оставить комментарий    

!