Курс валют
$
92.37
0.1
99.53
Курс валют
Курс валют
$
92.37
0.1
99.53
Меню
Поиск по сайту

Василий НИКОЛАЕВ: Кыраҕы харах саха хааныгар баар

08.07.2021 13:23 1
Василий НИКОЛАЕВ: Кыраҕы харах саха хааныгар баар

Норуот көҥүлгэ талаһыытын мэҥэ бэлиэтэ буолбут Манчаары Баһылай аатынан национальнай спорт көрүҥнэригэр күрэс былдьаһыы улахан түһүлгэтэ Горнай улууһугар саҕаланна. Саха сирин араас хонноҕуттан кус быһыйдар, ат бөҕөлөр, бэргэн ытааччылар улуустарын аатын ааттатаары кэллилэр.

Дьаҥ ааҥнаан көрөөччү бу спорт улахан дьоротун, хомойуох иһин,  илэ хараҕынан көрөр кыаҕыттан эмиэ матта. Ол да буоллар “Саха” НКИК быһа эфирдэри көрдөрө турар.

Национальнай спорт көрүҥүн XXI-с спартакиадыгар барыта 11  араас күрэхтэһии тэриллэр. Хапсаҕайтан, мас тардыһыытыттан саҕалаан оҕунан ытыыга тиийэ.

Саха былыргытын кэпсиир номохторго бэргэн ытааччылар ойуччу тутан хайҕанан ахтыллаллар. Кыргыс кэминээҕи дапсы тыаһын, көтөн кэлбит оноҕоһу хабан ылар сылбырҕа боотурдары, уохтаах-тэбиилээх ох сааны, хамсаабат бэгэччэги, кытаанах тарбаҕы уустаан-ураннаан хоһуйаллар. Кэлин уоттаах сэрии сылларыгар дэлэҕэ даҕаны саха снайпердара аатырыахтара дуо?

“Кыраҕы харах, бэргэн ытыы саха хааныгар иҥэ сылдьар. Саха эр дьоно (сороҕор дьахталлар даҕаны) бары булчуттар, үҥэр-сүктэр Баай Байанайбыт саха итэҕэлин биир тутаах иччитэ буолар. Дьиҥинэн, оҕунан ытыыны суолталаан сайыннарарбыт эбитэ буоллар, сахаларга олимпийскай  көрүҥ буолар толору кыахтаах көрүҥ. Паралимпиадаҕа да кыттар кыргыттарбыт ону туоһулууллар”, – диэн Оҕунан ытыы СР федерациятын салайааччыта, меценат, урбаанньыт Василий Николаев этэр.

Василий НИКОЛАЕВ, руководитель Федерации по стрельбе из лука  РС(Я)

Василий Николаев ааспыт сыл алтынньытыттан Оҕунан ытыы федерациятын салайааччытынан талыллыбыта.

“Дьарыктаныан баҕарар оҕо да, улахан да дьон баар. Ол гынан баран инвентарь чааһыгар кэлэн иҥнэр – сыанатыгар.
Талыы ох саа сыаната 30 тыһыынчаттан саҕаланар. Профессиональнай ох – 300 тыһыынчаттан тахса солкуобай буолар”, – диэн Василий Николаев кэпсиир.

Аны дьарыктанар сир эмиэ күчүмэҕэйдээх.

“Мин саныахпар, улуустарга тутуллар саҥа спортивнай саалалар хара ааныттан ох саанан ытыыга дьарыктанар курдук суоттанан тутуллуохтаахтар. Холобур, бүрээттэр, забайкалельар бу көрүҥҥэ олохтоохтук оҥостон дьарыктаналлар, онон бастыҥнар ахсааннарыгар сылдьаллар. Биһиги даҕаны оннук ситиһиигэ тахсыахпытын сөп буоллаҕа. Бэл, бэрт кыра кэмҥэ дьарыктанан баран ситиһиилэммит охчуттардаахпыт”, – диир Николаев.

Саха сиригэр оҕунан ытыы  2010 сыллаахха саҕаламмыта. Бу көрүҥү пропагандалыыр олус бэриниилээх дьиэ кэргэттэр бааллар. Холобур,  Тимофеевтар, Алексеевтар, Стасовтар.

“Оҕунан ытыынан дьарыктаныан баҕарар дьоҥҥо усулуобуйа тэрийиэххэ эрэ наада. Киһини үлүһүтэр, эргиччи сайыннарар спорт көрүҥэ, онон элбэх киһи кэлиэх этэ. Элбэх киһи дьарыктанар буоллаҕына, күрэстэһии баар буолар, оччотугар кыахтаахтан кыахтаах, чулууттан чулуу чочуллан тахсан иһиэх этэ буоллаҕа”, – диэн Федерация салайааччыта санаатын үллэстэр.

Василий Николаев онон оҕунан ытыыны республика таһымыгар таһааран, син биир тустууну өйүүр курдук государственнай таһымҥа таһааран өйүөххэ наада диир:

“Холобур, айаммыт сыаната атын регионнарга холоотоххо таһыччы ыарахан. Күрэхтэһиигэ барарга-кэлэргэ спонсор көрдөөһүнүн түбүгэ буолар. Биир-икки киһини тэрийэн-бэрийэн ыытыахха сөп. Оттон хамаанданы?.. Спортсмен бэйэтин иһигэр эрэ буһа сылдьыа суохтаах. Хайаан да араас таһымнаах күрэхтэһиилэргэ кыттар эрэ буоллаҕына сайдар”.

Ону таһынан Василий Николаев предпринимателлэри, бизнеһи спорду өйүүллэригэр, сайыннаралларыгар ыҥырар. Кини бэйэтин кыаҕынан 2016 сыллаахтан саҕалаан”Хотой” диэн спортивнай кулууп аһан үлэлэтэр. Василий салайар “Талакан” тэрилтэтэ  спортсменнар күрэхтэһиигэ баралларыгар өрүү спонсор быһыытынан сылдьар. Маннык спорду, чөл олоҕу пропагандалыырга бизнес эмиэ эппиэттээх буолуохтаах диэн кини бигэ санаалаах.

Манчаары оонньууларыгар спортсменнарбытыгар ситиһиилэри баҕарыаҕыҥ, чулууттан чулуу, бастыҥтан бастыҥ, бэргэнтэн бэргэн кыайдын!

***

Гаврил КОРЯКИН. 

Обсуждение • 1

Добавить комментарий
  1. албас

    сахаларга о5унан ытыы хааммытыгар баар буо. онон, былаас ейуех тустаах.

Оставить комментарий