Сэгэтэбин ааспыты

Былыргыны, оҕо сааспын сааһыран саныыр үгэстэнним.

Салҕааһыннаах дьиэҕэ элбэх ыал дьукаахтаһан олорорбут, ийэм холкуоска сүөһү көрөрө. Сэрии кэннэ буолан мал- сал, таҥас- сап, ас барыта аҕыйаҕа. Дьон бары холкуоска үлэлээн, үлэ күнүн аахсан үптэнэллэрэ, хайаан да аһы хаһааналлара. Эти, арыыны, туораах бурдугу кыһын түҥэтиккэ тиксэллэрэ ( доход аһы – холкуос саҕана). Ону кэмчилээн, кээмэйдэнэн
уһуннук тиэрдэргэ кыһаллан кичэллик ыраах ууруналлара.

Туораах бурдугу күннэтэ таас суорунаҕа мэлийэн лэппиэскэ, лабырыай оҥостон аһыыллара, эти кырбастаан мииннииллэрэ, сэлиэйдээн хойуннараллара.

Кэтэх сүөһү дьоҥҥо аҕыйаҕа. Сокуон- устаап кээмэйиттэн ордук сүөһүнү тутар быраап, көҥүл суоҕа, ахсаана хааччахтааҕа, сокуон уурааҕын тутуһаллара.

Бэлэм оҥоһук таҥас- сап суоҕа, атах таҥаһа отой көстүбэт этэ. Сүөһү тириитин таҥастааннар атах таҥаһа – этэрбэс тигэллэрэ, кыһын от угунньалаан кэтэрбит.

Саас эрдэ, этэрбэһи устан ууран, сайын атах сыгынньах сылдьан тилэхпит чэрдийэн тоһургуура. Чараас тириинэн түүппүлэ тигэн ыраатарга кэтэрдэр буолаллара.

Оҕо сааһым лоскуй түгэннэрин санааммын долгуйан ылабын. Сэбиэт былааһа иитэн- такайан,  үөрэтэн- үлэлэтэн киһи оҥорто,  дьон тэҥэ сылдьартан үөрэбин!

***

31.01.2023.
Ыас Маайа.