Курс валют
$
59.63
0.36
70.36
0.34
Курс валют
Курс валют
$
59.63
0.36
70.36
0.34
Меню
Поиск по сайту

Саҥа бааһынай хаһаайыстыба

14.11.2017 17:50 2
Саҥа бааһынай хаһаайыстыба

Ходоро нэһилиэгэр Марфа Сидорова-Атласова уонна Андрей Сидоров бу күннэргэ Мэҥэ Хаҥалас улууһун бааһынай хаһаайыстыбаларын ахсаанын хаҥаттылар. Быйыл дьыалаларын саҥа саҕалыыр пиэрмэрдэргэ бэриллэр граны ылары ситиһэннэр, Дьокуускайтан көһөн тахсаннар, тыа сиригэр олохтоохтук оҥостон олохсуйарга былааннананнар, үлэлээн-хамсаан эрэллэр.

Биллэрин курдук, былырыыҥҥыттан грант суумата балачча эбиллэн, 2 мөлүйүөн 750 тыһыынча солкуобайга тиийэн турар. Онон, хаһаайыстыба тэринэн тыа сиригэр үлэлиэн баҕалаах саха ыччатыгар улахан тирэх буолла. Судаарыстыба көрөр ити көмөтүн Марфалаах Андрей мүччү туппакка, сэндвич-панель хотон туттаннар кыстыкка номнуо киирдилэр.
‒ Аҕам табаарыстара субуотунньуктааннар тутан таһаардылар, ‒ диэн кэпсиир эдэр хаһаайка. ‒ Тыа сиригэр олохсуйарга Андрей баҕалаах, ол иһин таҕыстыбыт. Бу иннинэ түөрт сыл куоракка олорбуппут. Мин тыа хаһаайыстыбатын техникумун 2009 сыллаахха үөрэнэн бүтэрбитим, Идэбинэн сиргэ, баайга-дуолга сыһыаннарга экэнэмииспин. Оттон идэбин үрдэтинэн, 2011 сыллаахха Байкаллааҕы судаарыстыбаннай экономика уонна быраап университетын Дьокуускайдааҕы салаатын бүтэрбитим. Хомойуох иһин, ол үөрэммит кыһам сабыллыбыта. Андрей буоллаҕына Дьокуускайдааҕы тыа хаһаайыстыбатын академиятын бүтэрбитэ агроинженер идэлээх.
Эдэр хаһаайыттар граннарын аҥарын туттубуттар. Өссө аҥарын ситэри туттуохтаахтар. Грант хайысхаларынан туттуллар барыта ыйылла сылдьар. Бүтэһик отчуоттарын 2018 сыл алтынньытыгар оҥоруохтаахтар. Граннарын харчытынан Уус Алдан улууһуттан 1989 сыллаах «Беларус» тыраахтары, от охсор ротор, мунньары уонна хотоннорун матырыйаалларын, 20 «сахатыйбыт» симменталы ылбыттар. Бэйэлэригэр «Синтай» тыраахтардаахтар уонна «ГАЗ» массыыналаахтар. Сэтинньи 3 күнүгэр сылдьарга, хотонноро электроуокка холбоно илигэ. Сүөһүлэрин Тумултан, Төҥүлүттэн, Тараттан дьоннортон атыыласпыттар. Аҥардара тамыйахтар. Идэһэҕэ диэн улахан оҕустаахтар. Икки ыанар ынахтаахтар. Сүөһүлэри сүрүн көрөөччү-истээччи Андрей Михайлович бэйэтэ. Грант усулуобуйатынан өссө икки үлэ миэстэтин таһаарыахтаахтар. Докумуон, уопсай дьаһалта өртүгэр Марфа Николаевна төбөтүн үлэлэтэр. Кимтэн кииннээхтэрин, хантан хааннаахтарын саха сиэринэн туоҺуласпыкка, Марфа төрүт Чүүйэтин этэр. Ийэтэ Раиса Гаврильевна ‒ нэһилиэккэ оҕо саадын сэбиэдиссэйэ, аҕата Николай Иннокентьевич ‒ судаарыстыбаннай суол иниспиэксийэтин салайар үлэһитэ. Биир балтылааҕа устудьуон эбит. Андрей Үөһээ Бүлүү улууһун Туобуйатыттан төрүттээх күтүөт. Бииргэ төрөөбүттэр төрдүөлэр үһү. Ийэтэ Валентина Петровна эмиэ оҕо саадын үлэһитэ, ньээҥкэ, оттон аҕата Михаил Дмитриевич сүөһү көрөн олорор, уолун кыра эрдэҕиттэн сүөһүгэ сыһыарбыт. Марфалаах иккилээх уонна үстээх икки оҕолоохтор.
Саҥа пиэрмэрдэр кыстыыр отторун хааччыммыттар. Андрей сүрүннээн бэйэтэ оттообут. Аҕыйах борооскуну эбии атыылаһар былааннаахтар. Сырдык араҕас көстүүлээх, 20 миэтэрэ усталаах, 10 миэстэрэ туоралаах хотоҥҥо торбостор иһирдьэ тураллара. Улахан сүөһүлэр саҥа сирдэригэр-уоттарыгар үөрэнэ далга тэпсэҥнэһэ сылдьаллара.

Аркадий ИННОКЕНТЬЕВ. Мэҥэ Хаҥалас

Источник: Пресс-служба Мегино-Кангаласского улуса.

Обсуждение • 2

Добавить комментарий
  1. Ч

    Маладьыастар, маннык эдэр дьон сүөһүгэ сыһаннахтарына сахалар өссө да чыып-чаап диэхпит. Эдэр дьоҥҥо ситиһиини.

  2. Кытаатын!

    УлэЬит, сурэхтээх-бэлэстээх дьон буоларгыт кестер.
    Кытаатан улэлээн-хамсаан, ситиЬиилэнин!

Оставить комментарий