Курс валют
$
65.31
74.86
Курс валют
Курс валют
$
65.31
74.86
Меню
Поиск по сайту

Ольга Балабкина: “Праймериз – бэйэ икки ардыгар сэрии буолбатах”

10.04.2018 10:18 1
Ольга Балабкина: “Праймериз – бэйэ икки ардыгар сэрии буолбатах”

Россия партийнай систиэмэтигэр «Биир ньыгыл Россия» партия эрэ быыбар иннинэ кандидаттары сүүмэрдиир аһаҕас куоластааһыны тэрийэр.

Быйылгы — быыбар иннинээҕи сүүмэр, Государственнай Думаҕа курдук, “бастакы моделынан” барыаҕа. Ол аата ким баҕалаах “Биир ньыгыл партия” сүүмэрдиир тэрээһинигэр кэлэн куоластаан, партия аатыттан күһүҥҥү быыбарга киирсэр кандидаты талсыахтарын сөп. Санаттахха, урукку өттүгэр праймеризка партия чилиэттэрэ, эбэтэр эрдэ анал испииһэккэ кэлэн суруттарбыт эрэ дьон куоластыыллара.

Партия иһинээҕи кандидаттары сүүмэрдиир тэрээһин бэйэтэ туспа быраабылалаах. Праймериз кыттыылаахтара хайаан да аһаҕас дебаттарга кыттыахтаахтар – дьоҥҥо тылларын-өстөрүн иһитиннэриэхтээхтэр, араас кыһалҕаҕа, боппуруоска партия сыһыанын, позициятын тиэрдиэхтээхтэр. Ол иһин дебаттарга кыттарга сүрүн тирэнэр докумуонунан – РФ Президенэ Владимир Путин өйөөбүт “Биир ньыгыл Россия” Госдумаҕа кыттыбыт партийнай программата буолуох тустаах.

Дебакка партия олоххо киирбит, киллэриллэ сылдьар, киллэриллиэхтээх программатын, проегын ырытыһыы барыахтаах. Чуолаан бу дебаттартан “Биир ньыгыл Россия” быыбарга кыттар сүрүн программата таҥыллан тахсыахтаах. Ону сэргэ кэнэҕэс биһиги фракциябыт Ил Түмэҥҥэ ол программаны олоххо киллэрэр үлэтин ыытыахтаах. Дебаттартан биһиги, бастатан туран, саҥа сокуон оҥоһуллуохтаах идеятын, санаатын хомуйан ылыахтаахпыт. Мээнэ куолу буолбакка, партия кэнэҕэс үлэлиир программата бу дебаттартан чочуллан тахсыахтааҕын умнубаппыт ханнык.

Праймеризка кыттар дьон, чуолаан партия испииһигэр киирэр сүүмэри ааһааччылар, өйдүөхтээхтэр – сайабылыанньа бэриллибит, регистрация ааспыт кэмиттэн саҕалаан, саамай кырата 2018 сыл балаҕан ыйын 9-гар диэри, кинилэр партияны кытары биир баайыыга киирэллэр.  Хаһыс миэстэни испииһэккэ ылалларыттан тутулуга суох бу дьон бары Ил Түмэн депутатыгар кандидакка кубулуйаллар. Ол иһин испииһэккэ бастакы, иккис, үһүс, төрдүс буолбут дьон бары балаҕан ыйын 9-гар диэри партия аата-суола үрдүүрүгэр үлэлиэхтээхтэр. Бэйэ аатырыытыгар буолбакка – партия аата-суола үрдүүрүгэр күүстэрин түмүөхтээхтэр.

Партия испииһигэр киириэхтээх кандидаттар өстөөхтөр буолбатахтар, кинилэр – партия уонна элбэх киһи интэриэһин көмүскүүр биир санаалаах союзниктар буолуохтаахтар.  Партияҕа биир санааны түмэр, сомоҕолуур, нэһилиэнньэ интэриэһин көмүскүүр, түстүүр, туруулаһар  политическай күүс буолуохтаахтар.

Праймеризка испииһэгинэн барар кандидаттар программалара биир буолуохтаах, хас биирдии киһи тус-туһунан программаламмат. Дебаттарга этиллибит сонун этии, санаа партия биир уопсай программатыгар киириэҕэ. Ол ону учуоттаан туран үлэ ыытыллыахтаах.

Мин саныахпар, быыбар иннинээҕи сүүмэр кыттыылаахтара “үс мушкетердар” бириинсиптэринэн үлэлиэхтээхтэр:  «Биир киһи — барыларын туһугар, бары – биир киһи туһугар!” — диэн. Ол аата хас биирдии кандидат “Биир ньыгыл Россия” партия туһугар үлэлиэхтээх, хардатын партия муус устар 15 күнүттэн балаҕан ыйын 9-гар диэри партия кандидата быыбарга кыайарын туһугар үлэлиэхтээх.

Мин уокурукпар – Томмокко хас биирдии кандидат бэйэтин олорор куоратын, сэлиэнньэтин аатын ааттаан туран праймеризка кытта сылдьар. Бу дьон бары биллэр-көстөр, ытыктанар дьон, кэнэҕэс биһиги партиябыт быыбарга кыайдаҕына, партийнай проект иһинэн муниципалитет кыһалҕатын быһаарсыахтара.

Партия иһинэн быыбар кыттыылаахтара өйдүөх тустаахтар: муус устар 15 күнүн кэнниттэн региональнай политсовет быһаарыы ылыммытын кэннэ хас биирдиилэрэ Ил Түмэн депутатыгар кандидат буолаллар. Бары.

«Одномандатниктар» эмиэ быыбарга партия программатынан кыттыахтаахтарын умнуо суохтаахтар, бэйэлэрэ туспа программа “айбаттар”. Ол иһин, быыбар иннинээҕи сүүмэр кыттыылаахтара бэйэ-бэйэлэригэр ытыктабыллаахтык сыһыаннаһыахтаахтар, биир партия – биир сомоҕо буолалларын умнуо суохтаахтар.

***

Ольга БАЛАБКИНА,

Ил Түмэн солбуйар председателэ, норуот дьокутаата.

 

Обсуждение • 1

Добавить комментарий
  1. фома

    балабкина хасаанныттан сахалыы балкынар буолла ? таатта мас сахатын курдук санарар-суруйар эбит дии!

Оставить комментарий