Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

«Ньургуһуннаах кырдалга…»

17.05.2019 17:22 0
«Ньургуһуннаах кырдалга…»

Аан дойдуга сааһы көрсө бастакынан тыллар сибэккигэ сүгүрүйэн, 1984 сыллаахха муус устар 18 күнэ Ньургуһун күнүнэн ааттаммыта. Саха сиригэр биллиилээх журналист Иван Ушницкай төрүттээбитинэн, 2004 сылтан ыам ыйын 18 күнүгэр бэлиэтэнэр, уһун кыһын кэннэ сандал сааһы уруйдуу көрсөр, сылааһы, сырдыгы бэлэхтиир Ньургуһун буолан, хоһооҥҥо хоһуллар, ырыаҕа ылланар, кэрэ кыыска аат буолар.

Ыам ыйын 16 күнүгэр Өксөкүлээх Өлөксөй аатынан норуоттар доҕордоһууларын Дьиэтигэр «Ньургуһуннаах кырдалга…» Дьоро киэһэ буолла.

Бу күн саха үгэһинэн сайыны көрсө Күөххэ үктэниини алгысчыт Михаил Винокуров түһэрдэ. Арчылааһын сиэрин-туомун Галина Федорова салайааччылаах «Тойук» бөлөх ыытта. Дьон-сэргэ бөҕөргөтүнүү ылынан дуоһуйда.

СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ ньургуһуну харыстыыр соруктаах ыытар үгэс буолбут өрөспүүбүлүкэтээҕи «Ньургуһун мин сүрэхпэр» куонкуруһа түмүктэннэ (тэрийээччилэр Нь.С. Гуринова, С.А. Слепцова). Миниистири солбуйааччы А.Н. Агеев бары мустубут дьоҥҥо истиҥ эҕэрдэтин этэн туран, кыайыылаахтарга наҕараадалары туттартаата. Бу күн министиэристибэ бэлэмнээбит Ньургуһуҥҥа аналлаах остуолга ууруллар өйдөбүнньүктэрэ, значоктара үтүө бэлэх буолла.

Поэт Александр Гоголев-Сатал Уус, эдэр дьоммут Ираида Коркина-Чугдаара, Диана Сутакова-Дайаана Куо кэрэ сибэккини хоһуйан хоһооннорун аахтылар. «Ньургуһун – таптал сибэккитэ» хомуурунньугу Өксөкүлээх Өлөксөй аатынан норуоттар доҕордоһууларын Дьиэтин издательствота таһаарда (бэлэмнээтилэр Ульяна Флегонтова, Елена Протодьяконова, Ираида Коркина-Чугдаара). Манна саха поэттарын ньургуһун туһунан хоһоонноруттан уонна бүгүҥҥү эдэр көлүөнэ ньургуһуну хоһуйуута киирдэ.

Ньургуһуну уруйдуур улахан кэнсиэргэ Дьокуускай куораттааҕы «Арчы Дьиэтэ» духуобунай култуура Кииниттэн «Күн дьоно» фольклор (сал. Евдокия Павлова), «Күн ситимэ» үҥкүү (сал. Маргарита Самсонова), «Саһарҕа» этноырыа (сал. Любовь Константинова), Оҕо айымньытын Дьиэтиттэн «Сэргэчээн» үҥкүү (сал.Римма Григорьева), Өксөкүлээх Өлөксөй аатынан норуоттар доҕордоһууларын Дьиэтиттэн «Махтал» үҥкүү (сал. Екатерина Новикова, Иннокентий Птицын) курдук бөлөхтөр кыттыыны ыллылар. Ырыаһыттар Варя Аманатова, Намыына, Кыталы-Куо, Константин Мохначевскай, «Тойук» бөлөх, о.д.а. ньургуһун туһунан ырыаларын бэлэхтээтилэр. Кэнсиэр Сиэн Чолбодук тылыгар, Василий Протодьяконов матыыбыгар «Ньургуһун» норуот ырыатын Люлия Николаевна Григорьева, Валерий Иванов, Михаил Шамаев уонна кырачаан Рада таһаарыыларынан, көрөөччү барыта кыттыылаах күргүөм ырыанан түмүктэннэ. Кэнсиэри Индира Софронова, Георгий Белоусов иилээн-саҕалаан ыыттылар.

Ньургуһуну бэйэ тиэргэнигэр үүннэрии туһунан М.К. Аммосов аатынан ХИФУ ботаническай садыттан биол.н.к., доцент С.З. Борисова ыыппыт маастар-кылааһа, көрдөрбүт презентацията улахан сэҥээриини ылла. Оҕо айымньытын Дьиэтиттэн туруоруллубут быыстапка бастыҥ оҥоһуктара дьон хайҕабылын ылла (сал. М.П. Попова). Киэһэҕэ кэлбит дьоммут үүттээх чэйинэн, арыылаах алаадьынан күндүлэнэн астыннылар, киирии билиэтинэн оҥоһуктар, сыаналаах бэлэхтэр оонньонон үөрүүлээх түгэннэри бэлэхтээтэ, түмүгэр түһүлгэлээх оһуохай буолла.

***

Ульяна Флегонтова, СӨ норуоттарын

култуурунай нэһилиэстибэлэрин Киинэ.

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»