Намҥа кыра оҕону уоттаабыт уол төрөппүттэрэ 3 мөл. солк. ыстарааптаннылар

Иллэрээ сыллаахха ыам ыйын 26 күнүгэр Намҥа улахан алдьархай тахсан турар. Биэс саастаах оҕо таһырдьа оонньуу сырыттаҕына икки сыл аҕа уол кэлэн таҥаһыгар уот аспыта. Кырачаан киһи барахсан этин 25% уот сиэн өр да, өр балыыһаҕа сыппыта.  Төһөлөөх муҥаныммыта, эрэйдэммитэ буолаахтыай. Бу буруйдаах уол төрөппүттэрин эппиэккэ тардарга эмсэҕэлээбит оҕо дьоно суукка биэрбиттэрэ.

Ааспыт сыл ахсынньытыгар бастакы суут  3 мөлүйүөн солкуобайы эмсэҕэлээбит оҕо туһатыгар уураахтаабыт. Онно биллибитинэн, буруйдаах оҕо дьоно арахсыбыттар, үс оҕолоох эбиттэр, ийэлэрэ ханна да үлэлээбэт эбит, аҕалара эмиэ түптээх үлэтэ суох.  Суукка эр киһи “интернеккэ айдааны таһааран элбэх харчыны көрдүүллэр” диэн этиммитин элбэх киһи сүөргүлээбитэ. Суут дьыаланы көрөн баран: бу икки төрөппүт эмсэҕэлээбит оҕо эмтэнэригэр, быһылааны аһарынарыгар 3 мөлүйүөнү кыттыһан төлүүллэригэр быһаарбыт.

Бастакы суут уурааҕын буруйдаах оҕо төрөппүттэрэ Үрдүкү суукка ааһына сатаабыттар да, кыаллыбытах. Бастакы суут уурааҕа олоххо киирбит.

Манна биири бэлиэтээн этиэҕи баҕарыллар. Түптээн үлэлээбэт, дохуота суох дьон ыл да лөкөччү, суут да уураахтабытын иһин, харчыны биирдэ ууран биэрбэттэр. Аны сааһын ситэ илик оҕолоохтор, оҕо босуобуйатыттан харчы тутуллубат, дьиэлээх да буоллахтарына былдьаабаттар. Онон ычык-бычык хаһан ол 3 мөлүйүөнү төлөөн бүтүөхтэрэ биллибэт.

***

Aartyk.Ru