Күндү аҕа көлүөнэ дьоммут, ытыктыыр бэтэрээннэрбит!

Саха Өрөспүүбүлүкэтин Ил Түмэнэ эһигини Аҕа саастаахтар күннэринэн истиҥник эҕэрдэлиир!

Бу күн биһиэхэ көлүөнэлэри ситимниир дириҥ өйдөбүллээх, ураты суолталаах. Дойдубут чэчирии сайдарын туһугар бэйэҕитин харыстаммакка үлэлээбит, олох уйгутун уһансыбыт, үүнэр көлүөнэ кэскилин түстэспит ытык-мааны дьоммутугар сүгүрүйэбит, махтал тылларын этэбит. Эһиги киллэрэр кылааккыт, бэриниилээх үлэҕит, баай уопуккут, үтүө алгыскыт, хас биирдиибитигэр киэн туттуу, ыччаты иитиигэ бастыҥ холобур буолар. Дойдубутугар, өрөспүүбүлүкэбитигэр тахсар уларыйыылары ким хайа иннинэ чугастык ылынаҕыт, өрүү олох үөһүгэр инники сылдьаҕыт, мындыр сүбэҕитинэн өйөбүл буолаҕыт.

Аҕа көлүөнэҕэ кыһамньылаах сыһыан, болҕомтону ууруу, олорор, эмтэнэр усулуобуйаларын тупсарыы, өйөбүл буолуу – барыбыт ытык иэспит. Ил Түмэн өрөспүүбүлүкэ бэтэрээннэрэ, пенсионердара судаарыстыбаттан көмүскэллээх буолууларын хааччыйыыга, социальнай өҥөлөрүнэн толору туһаналларыгар, доруобуйаларын көрөргө-истэргэ кэм-кэрдии ирдэбилигэр эппиэттэһэр сокуоннары ылыныыга үлэлэһэр.

Күндү ытык дьоммут! Эһиэхэ чэгиэн доруобуйаны, чэбдик туругу, сылаас-истиҥ сыһыаны баҕарабыт. Чугас дьоҥҥут тапталыгар, кыһамньытыгар бигэнэн, уһуннук, дьоллоохтук олоруҥ!

***
Саха Өрөспүүбүлүкэтин Ил Түмэнэ