Иннокентий Игнатьев аатын үйэтитэн

Кулун тутар 25 күнүгэр Хара нэһилиэгэр өрөспүүбүлүкэ бөдөҥ судаарыстыбаннай уонна политическай диэйэтэлэ, 1965 ‒ 1972 сс. Саха сирин Миниистирдэрин Сэбиэтин бэрэссэдээтэлин бастакы солбуйааччы, 1972 ‒ 1992 сс. РСФСР Бырабыытылыстыбатын Саха сиринээҕи Бастайааннай бэрэстэбиитэлэ, 1989 ‒ 1991 сс. ССРС народнай дьокутаата, «Бочуот Знага» уордьан кавалера, РСФСР култуураҕа үтүөлээх үлэһитэ, Саха АССР норуот хаһаайыстыбатыгар үтүөлээх үлэһитэ, Саха өрөспүүбүлүкэтин, Москва, Дьокуускай куораттар, Алдан оройуонун, Мэҥэ Хаҥалас улууһун, Хара нэһилиэгин Бочуоттаах гражданина Иннокентий Гаврилович Игнатьев үтүө аатын Хара орто оскуолатыгар иҥэрэр устуоруйаҕа хаалар бэлиэ түгэнэ буолла.

Иннокентий Гаврилович аатыгар мемориальнай дуосканы үөрүүлээхтик арыйыыга оройуон дьокутааттарын Сэбиэтин бэрэссэдээтэлэ Андрей Находкин, улуус баһылыгын социальнай боппуруостарга солбуйааччы Иван Птицын, Хара нэһилиэгин баһылыга Дария Назарова, улуустааҕы үөрэх управлениетын салайааччыта Ирина Черкашина, педагогическай наука дуоктара, бэрэпиэссэр, академик, РФ уонна СӨ физическэй култуураҕа үтүөлээх үлэһитэ, Саха ССРС үтүөлээх тириэньэрэ, Иннокентий Гаврилович чугас доҕоро Валерий Кочнев итиэннэ аймахтара, оскуола кэлэктиибэ, үөрэнээччилэрэ, бэтэрээннэрэ, Хара нэһилиэгин олохтоохторо кытыннылар.

«Хара нэһилиэгэ» МТ баһылыга Дария Назарова өрөспүүбүлүкэҕэ уонча сыл иһигэр 100 оскуоланы туттарары ситиспит, Улуу Москва куорат Бочуоттаах гражданина аатын сүгэр киһи өрөспүүбүлүкэҕэ, бука, суоҕа да буолуо, онон маннык сүдү киһи аатын түһэн биэрбэттик үчүгэйдик үөрэниэхтээхпит, күүстээхтик үлэлиэхтээхпит диэн оскуола кэлэктиибигэр уонна оҕолорго туһаайан эттэ.

Андрей Находкин өрөспүүбүлүкэ сайдыытыгар хаһаайыстыбаннай да, социальнай да өртүнэн сүҥкэн кылаатын киллэрбит киэн туттар биир дойдулаахпыт аатын ытыктаан туран үйэтитэргэ Ил Дархан дьаһала тахсыбытын итиэннэ кинини үйэтитии чэрчитинэн бастакы түһүмэҕинэн мемориальнай дуосканы арыйыы буолар диэтэ. Инникитин пааматынньык, искибиэр оҥоһуутугар күүспүтүн түмэн үлэлэһиэхпит диэн эттэ.

1947 сыллаахтан олохтон туоруор диэри эн-мин дэсиһэн алтыспыт чугас доҕоро, РФ уонна СӨ физическэй култуураҕа үтүөлээх үлэһитэ, Саха АССР үтүөлээх тириэньэрэ Валерий Кочнев, Иннокентий Гаврилович быраата Александр Игнатьев уонна балта Надежда Федорова ахтыылары оҥордулар. Аймахтар ааттарыттан кинилэр оскуолаҕа улахан тэлэбиисэри, И.Г.Игнатьев аатынан сэттис өрөспүүбүлүкэтээҕи хайыһар күрэхтэһиитигэр сүрүн бирииһи ‒ ноутбугу уонна «Хара нэһилиэгэ» МТ дьаһалтатыгар өҥнөөх принтери туттардылар.

Иннокентий Игнатьев туһунан сиһилии кэпсиир истиэндэни оскуола иһигэр саамай көстүүлээх сиргэ итиэннэ мусуойга кини олоҕун, үлэтин-хамнаһын сырдатар анал муннугу оҥорбуттарын көрдөрдүлэр, ыалдьыттарга анаан үөрэнээччилэр бэртээхэй кэнсиэри бэлэхтээтилэр.

Бу күн Ураһалаах алааска хайыһарга Саха Өрөспүүбүлүкэтин кубогун сэттис түһүмэҕэ И.Г.Игнатьев сырдык аатыгар ананан ыытылынна.

****
Виктория БЕЛОЛЮБСКАЯ.