Курс валют
$
70.97
0.2
82.68
0.22
Курс валют
Курс валют
$
70.97
0.2
82.68
0.22
Меню
Поиск по сайту

Дьокуускай куорaт сирин уорууга кими буруйдуу сатыылларый?

15.09.2017 11:36 6
Дьокуускай куорaт сирин уорууга кими буруйдуу сатыылларый?

“Аартык.ру” хаста да төхтөрүйэн Дьокуускай куоракка сабыллыбыт тэрилтэ бэчээтин туһанан сири, баайы-дуолу уоруу барбытын туһунан элбэх ыстатыйаны таһаарда.

Түөкүннээһин барыта кэриэтэ “Амгинское БТИ” диэн Амма улууһугар тэриллэ сылдьан баран 2009 сыллаахха сабыллыбыт муниципальнай унитарнай тэрилтэ бэчээтинэн, урут оҥоһуллубут курдук кэтэх күнүнэн-дьылынан ыытыллыбыт.

Бу улахан хабааннаах сири уорууга “Амгинское БТИ” МУТ бэчээтин илдьэ хаалбыт дьон, риэлтордар, кадастровай инженердэр, Дьокуускай куорат дьаһалтатын Сиргэ кэмитиэтин үлэһиттэрэ, архитектордар, Росреестр, полиция, прокуратура үлэһиттэрэ, судьуйалар о.д.а. дуоһунастаах дьон кыттыгастаахтар. Ол иһин куорат олохтоохторуттан сири, баайы-дуолу былдьааһын барыта “сокуон” иһинэн, ылы-чып барбыт. Итинник махинация Юрий Заболев мэринэн үлэлии олордоҕуна муҥутуур «сайда» сылдьыбыт. Кутуруга-сиэлэ 2012-2013 сс. диэри диэлийбит.

Дьон иҥсэтэ сүрдээх, биир олорон турууга 70-нуу гараһы кытары охсон ылаллар эбит. 70 киһи гараһын биир күн былдьаан ылыы сүрдээх буолбатах дуо?! Дьиэни дьиэнэн, уһаайбаны уһаайбанан дьонтон былдьаан ыла-ыла сымыйа докумуонан приватизациялыы охсон баран атын дьоҥҥо атыылаан киллиргэтии, мөлүйүөнүнэн сууманы эргитии, салгынтан харчы оҥоруу туох да үгэннээн барбыт. Сууттаһа сатаабыттары — кими кырбаан, кими куттаан, кими суутунан мөрөйдөөн, кими баһын хампы сынньан диэн… Иэдээннээх, амырыын дьыала буолбут, буола да турар…

Бүргэһи хааһахха кистээбэккин, ханан эмэ да буоллар, бу айдаан быычалаан тахсыахтааҕа. Ол курдук буолла. Айдаан тахсыбытыгар буруйдаах дьон Саха сириттэн сорохторо куоттулар, оттон баттаһа тыас хомумматах буруйданааччылар, суукка көннөрү “туоһу” эрэ быһыытынан сылдьан “наадалаах” көрдөрүүлэри биэрэн, хата төттөрү туох да буруйа суох дьону буруйдаан кыһалла-мүһэллэ ахан сылдьаллар.

Кэм да буруйдаах моттойо оруолугар эргитиилээх мэйиилээхтэр кими оҥорбуттара буолла, таайыҥ эрэ? Биллэн турар, олохтоох киһини. Саха киһитин аҕалан суут ыскаамыйатыгар чолоччу олордон баран, хара суордуу халаахтаабытынан тула элиэтии сылдьан тобулу тоҥсуйан эрэллэр.

Ким эмэ истибитэ дуу, урбаанньыт Олег Олесов сир дьыалатыгар буруйданан сууттана сылдьарын? Олесов төрөөбүт тылбынан суут истиитин ыытыҥ диэн туруорсубутун? Өссө ону күлүү-элэк гынан нууччалыы тыллаах хаһыат суустаан суруйбутун? Истибит да буоллаҕына аҕыйах киһи истибитэ буолуо.

Тоҕо диэтэххэ, уорганнар хайа маҥнайгыттан Олесов айаҕын баппыысканан хам бүөлээбиттэр. Ол иһин бу киһи кинини туохха буруйдуулларын да, хайдах силиэстийэ, суут барарын кимиэхэ да кэпсиир быраабын эрдэттэн быспыттар.

Бу үйэҕэ хаһыаттар ким-туохха буруйданан сууттанарын суруйан-суруйан кэллэхпит. Оттон Олесов дьыалатыгар – уу-чуумпу. Кими ааттаан биэриэ дуу, буруйа суох киһини буруйдуу сатыылларын дьон-сэргэ билэн айдаан тахсыа дуу диэн сэрэхэдийэн хайыҥ охсуммуттара буолуо дуо?

***

Нам уола урбаанньыт Олег Олесов буруйа диэн, 2012 сыллаахха Иван Шклярга (соторутааҕыта сууттанан хаайыыга уураахтаммыт куорат Градостроительнай политикатын департаменын салайбыта) тиийэн, авторынок таһынааҕы сирин докумуоннатааччы буолбут.

Куорат олохтоохторо бары билэллэр – сири докумуоннатыы уһун-киэҥ, сылы-сыллаан, киһини илиһиннэрэрдии барарын.

Сир докумуонун түргэнник оҥорон биэрэр элбэх чааһынай тэрилтэлэр бааллар. Олесов эмиэ сол кэриэтэ, сирин сып-сап докумуонната охсоору бастаан куораттаҕы Сир кэмитиэтигэр тиийэр. Мария Шахурдина диэн кэмитиэт отделын начальнига Олесовы “наһаа билиилээх, кыахтаах юриһы” кытары Иван Шклярдыын билиһиннэрэр. Шкляр оччолорго чааһынай тэрилтэҕэ үлэлиир, мааны бөҕө.

“Отдел начальнига – официальнай дуоһунастаах киһи Шкляры кытары билиһиннэрбит буолан,  Олег  туох да кэтэх санаата суох, туох баар докумуоннарын Шклярга туттаран кэбиһэр. Шкляр докумуон бэлэмниир, кини илии эрэ баттыыр. Туох суруллубутун көрө да сатаабат”, — диэн Олесов кэргэнэ Олеся кэпсиир. Биһиги оннукпут, билиниэххэ наада, саараама илии баттыыр докумуону ааҕан да бэрт. Аахпыт да буоллахха, сыыппара, квадрат, квартал нүөмэрэ эҥин диэн өйдөбүл мэлигир, анал үөрэҕэ суох дьон өйдүө да суохпутун сөп.

“Аны санаатахха, Регпалатаҕа (Росреестр) Олег аатыттан доверенностаах сылдьан Шкляр хаһан да бэйэтинэн докумуон туттарбат эбит. Талон ылар, уочарата чугаһаатаҕына Олегы ыҥырар, окошкаҕа докумуону Олег илии баттаан туттарар. Шкляр эрдэттэн ханна да бэйэтин илии баттааһынын көрдөрбөт буола сатыыр эбит. Ону биһиги кэлин биирдэ өйдөөтөхпүт. Арай, алҕаска биирдэ Шкляр докумуон туттарбыт ыспыраапкатын булан ылан адвокакка биэрбиппит”, — диир Олеся.

Олесов, баҕар, сорохтор билэллэрэ буолуо, Строительнай ырыынак таһыгар баар авторынок сирин сорҕотун бас билэрэ. Авторынок территорията хас да хаһаайыннаах. Олесов киэнэ кытыытыгар, норуокка ааттарынан “саха авторынога” диэн этэ.

“Тоҕо диэтэххэ, киниэхэ үксүн тыа дьоно массыыналарын аҕалан атыылыыллара. Ырыынак килэйбит-халайбыт өттүгэр боростой массыыналаах дьону киллэрбэт этилэр. Ол өттүгэр үксүн автоперегонунан дьарыктанар дьон сыаналаах массыыналара тураллара. Оттон тыа дьоно, бэйэлэрин массыыналарын атыылыыр биирдиилээн дьон Олег территориятыгар турааччылар”, — диэн Олеся кэпсиир.

Авторынокка баар сирдэрин Олесовтар бастаан мэрияттэн арендаҕа ылбыттар. Онтон аренда болдьоҕо туолбутун кэннэ, приватизациялаары Шклярга тиийэн, дьэ онно иэдэйбиттэр.

Шкляр чааһынай юристыы сылдьан кадастровай инженер Наталья Оглезневаны кытары сабыллыбыт тэрилтэ “Амгинское БТИ” МУТ бэчээтин туһанан, элбэх сири, баайы-дуолу түөкүннээбиттэрин туһунан силиэстийэ докумуоннара бааллар. Саамай дьиҥнээх тэрийээччилэрэ Оглезнева диэн ол докумуоннарга туоһулааччылар элбэхтэр.

Ол гынан баран Оглезнева айдаан тахсаатын кытары, өйүнэн өйдөөх Санкт-Петербурга көһөн сус гынан хаалар. Онно тиийэн эмиэ сир докумуонун оҥорор чааһынай тэрилтэ астар. Хата, “Амгинское БТИ” бэчээтэ Ленинградскай уобалас сирин билигин “түҥэтэ” сылдьар да буоллаҕына көҥүлэ.

Тиһэх уһугар, билигин Оглезнева оннугар, буруйдаах моттойо буолан олохтоох киһи Олег Олесов сууттана сылдьар. Оглезнева элбэх “наадалаах” дьоҥҥо сир-уот түҥэппит буолан харатыттан туттарара саарбах. Оттон силиэстийэлиир, кэтиир-маныыр, сууттуур уоргаттар кими эмэ  буруйдуохтарын наада буоллаҕа. Онон буруйу барытын Олесовка түһэрэн баран “Дьокуускайга аферистар тойоннорун туттубут, дьыала сабылынна” диэн дакылааттыахтара турдаҕа.

Тоһоҕолоон бэлиэтээтэххэ, Олесов дьыалатын бастаан саха силиэдэбэтэлэ силиэстийэлээн, ким кимин-тугун барытын бадараантан хостоон ыраас мууска лөһүгүрэтэн испит. Дьиҥнээх махинатордар ааттара тахсыталаан барбыттар. Оглезнева онуоха саанан – ханнык үрдүк сололоохтор кини “өҥөтүнэн” туһаммыттарын этэттээри гыммыт. Онуоха бастакы силиэдэбэтэли дьыалаттан туораталлар, уонна айдааннаах Александр Каркавины аныыллар.

Каркавин ийэтэ – Ирина Каркавина Чиряев уулуссаҕа турар гаражтары бэйэтин аатыгар оҥотторбутун туһунан Оглезнева «ыйан» биэрбитэ биллэр. Оглезнева айаҕа аһыллаары гыммытыгар, Каркавин буруйу атын киһиэхэ – Олесовка көһөрө охсубута буолуо дуо?

Аны дьиҥ дьыаланы билээччилэри ким эрэ анаан бултаһар курдук. Османов диэн Оглезнева, Шкляр биир куомуннаахтара «аһаҕас айах» буолан баһын аҥаара хампы охсуллан инбэлиит буолла дииллэр. Аны, аҕыйах хонуктааҕыта Каркавин ийэтигэр гарааһын былдьаппыт Ольга Карнаухованы эмиэ кэнниттэн кэлэн кэтэххэ битанан саайдылар. Дьолго өлбөтө. Ити киһи билэринэн. Тулаайах, дьоно-сэргэтэ суох сордоохтор туох-туох буолбуттарын ким да билбэт.

Онон баай-дуол туһугар киһи тыыныгар да турартан туттуммат түөкүттэр буулаатылар быһыылаах.

(Салгыыта бэчээттэниэ).

***

Aartyk.Ru

Обсуждение • 6

Добавить комментарий
  1. Оо

    Аата ынырыгын!!

  2. Петр

    Ол сагана Тресков, Доржиев элбэхтэр этэ.
    Били молочное братство сагана

  3. Оттон

    Ол оглезнева ханнык тойотторго сир оноробутун испииьэгин таьаарын ээ. Керуехпут этэ ким дьиннээх уоруйагын! Сааппат сирэйдэр!

  4. Лаахы

    Кэм сахалар акаарылар киирэн биэрэн иьэллэр ээ(( кыьыыта ол баар. Михальчук губерантор буолан барта, Николаева, Стальевич олорон тахсыбыттара. Мелтех дьоммут. Хаьан ейденер омукпутуй??

  5. куораччыт

    Верховнай суут коррупция быЬа сиэбит сирэ, дьон онно кырдьыгым тахсыа диэн да онно барыта харчыга атыыланан олорор. Онон тусанан суут, прокуратура, милииссийэ, адвокаттар норуоту сулэллэр. Ол исин амма бтита кыайтарбат

  6. 123

    бэрт баайы киинэ баар эбит Ганди диэн. Хайдах норуот сомо5олоспутун туhунан.

Оставить комментарий    

АЯМ