Курс валют
$
66.75
0.12
75.78
0.39
Курс валют
Курс валют
$
66.75
0.12
75.78
0.39
Меню
Поиск по сайту

Дьокуускай куорат баһылыга былааска киирэр сиэрэ-туома буолла

17.09.2018 23:29 1
Дьокуускай куорат баһылыга былааска киирэр сиэрэ-туома буолла

Дьокуускай куорат мэриятин Улахан мунньахтыыр саалата ыы-быччары туолла. Олорор миэстэ тиийбэт буолан үгүс дьон сүһүөхтэригэр турдулар.

Киһи бөҕө кэлэ сатаабыт. Саҥа талыллыбыт Ил Түмэн, гордума дьокутааттарын сэргэ «эргэлэр», общественниктар, бэтэрээннэр, быыбарга үлэлээбит ыстаап үлэһиттэрэ, суруналыыстар, чунуобунньуктар кырыы-кырыытынан саалана быччары ылан кэбистилэр.

Инаугурация лоп курдук 40 мүнүүтэ иһигэр ааста. Дьахтар куорат баһылыга буолбута биллэр, сибэкки кэһиилээх дьон толору. Хас биирдиилэрин хомуйдахха остуол сууллууһу, онон дьоро түгэни ыытааччы «сибэккини кэлин биэрээриҥ» диэн эрдэ-сылла сэрэттэ.

Сардаана Авксентьеваны дьон ытыс тыаһынан көрүстэ. Үс өрөгөй ырыата ылланна, куораттааҕы быыбардыыр хамыыһыйа хотуна Самойлова Дьокуускайга 44-тан тахса бырыһыан киһи куоластаабытын, онтон 39-а Авксентьеваны талбытын биллэрдэ уонна дьиҥнээхтик Дьокуускай баһылыгынан талыллыбытын туоһулуур докумуон туттарда.

Саҥа баһылык сахалыы-нууччалыы андаҕар тылын эттэ, куорат ытык кырдьаҕастара моонньуга кэтэр куорат  баһылыгын мэҥэ бэлиэтин кэтэртилэр, куорат күлүүһүн туттардылар, алгыс-соргу тылын эттилэр.

Конституционнай суут бэрэстээтэлэ Александр Ким-Кимэн тыл эттэ. Сардаана сибэкки туттарда уонна Ил Дарханнар бары киин куоракка-Дьокуускайга улахан болҕомтону уураллар этэ, Дьокуускай киин куорат статустааҕа сокуонунан бигэргэтиллэн турар, онон Айсен Николаев даҕаны ол үгэһи салгыа, куораты өйүө диэн улаханнык эрэннэ. «Кини куораттан үүнэн-үрдээн, тыыллан-хабыллан таҕыста, дьокуускайдар Николаевы икки төгүл баһылыгынан талан, итэҕэйэн тураллар, онон киһи буолбут куоратын умнуо суоҕа», — диэн буолла.

Сабыс-саҥа гордума спикеринэн талыллыбыт Альберт Семенов эҕэрдэ тыл эттэ. Дьокуускай сайдыытыгар саҥа эргиир саҕаланна диэтэ. Сардана Владимировнаҕа сэргэх, сонун былааннары олоххо киллэрэригэр күүһү-уоҕу, кыаҕы баҕарда. Семенов сахаҕа улахан, бөдөҥ-садаҥ, арҕастаах киһи эбит, ааспыттааҥҥы спикер эмиэ хайа саҕа этэ, уҥуохтарынан талан бэрэстээтэл оҥороллор дуу диэх айылаах.

Владимир Федоровка тыл биэрбиттэригэр саала иһэ ытыс хабылла түстэ, онно-манна саҥа таһааран уруйдаатылар. Хаҥалас бааһынайа сахалыы саҥаран мустубут дьону айхаллаата, бары ньир күлэн ыллылар.

Владимир Юрьевич  долгуйбута курдат көстөр, хас сыл бу саалаҕа тыл этиэн баҕарбыта буолуой. Билигин атын да статустаах син сыалын ситистэҕэ эбээт. Кини: «Аҥардастыы политиканан үлүһүйбэккэ хаһаайыстыбанан, дьон олоҕо тупсарын туһугар үлэлиэх тустаахпыт, мин кыайбыт хамаанда эрэллээх киһитэбин, куорат олохтоохторун итэҕэлин толорорго сырабын-сылбабын барытын ууруом», — диэн тылын биэрдэ. «Бары көмөлөөн Дьокуускайбытын тупсарыах тустаахпыт, оччоҕо түргэнник баҕа санаабыт туолуо», —  диэтэ.

Дьокуускай куорат саҥа баһылыга Сардаана Авксентьева былааска киирэр сиэри-туому түмүктүүр тылыгар Дьокуускай куорат ааспыт салалтата элбэҕи үлэлээбитин, ситиспитин бэлиэтээтэ. Дьокуускай куорат Уһук Илин сайдыытыгар тирэнэр тирэх былыр да, аны да буолар дьылҕалааҕын тоһоҕолоон бэлиэтээтэ. Уһук Илин региона сайдарыгар судаарыстыба барыта интэриэстээх, онон куораппыт суолтата улахан диэтэ.

Салгыы — билигин салгын кытары дьон эрэлинэн, күүтүүтүнэн туолан ыанньыйа сылдьарын, ол саҥа эрэли боруостуурга бииргэ үлэлиэххэйиҥ, урукку-хойукку мунньуллубут кыһалҕаны тэҥҥэ быһаарыаҕыҥ, куорат тупсарыгар олохтоохтор бииргэ  кыһаллыаҕыҥ, барытын киһи сыһыана, тыла, санаата, дьыалата быһаарар диэн тыл этиитин түмүктээтэ.

 

Сиэр-туом түһүмэхтэрин быыһыгар диктор урукку куорат салайааччыларын, саҥа талыллыбыт Ил Дархан, Дьокуускайы кытары уруурҕаспыт куораттар салайааччыларын, Кытай провинцияларын, куораттарын  салайааччыларын, улахан хампаанньалар, тэрилтэлэр эҕэрдэ суруктарын ааҕан иһитиннэртээтэ.

Инаугурация кэнниттэн хаартыскаҕа түһүү, эҕэрдэлээһин, пресс-конференция буолла.

Сотору кэминэн Сардаана Авксентьева «Аартыкка» анаан биэрбит интервьютун бэчээттиэхпит.

***

Aartyk.Ru

Обсуждение • 1

Добавить комментарий
  1. Байбал

    Эгэрдэ!!

Оставить комментарий