Курс валют
$
57.51
0.06
67.89
0.04
Курс валют
Меню
Поиск по сайту

Булчут күнүнэн ситимнээн…

02.04.2017 12:19 0

2012 сыллаахтан, Саха Республикатын Президенин Ыйааҕынан муус устар бастакы өрөбүл күнүгэр БУЛЧУТ күнэ бэлиэтэнэр.

Булчут күнүнэн ситимнээн…

Чыҥ кыаһаан дойдубут Баай Барыылаах Байанайа үтүмэн үйэлэр тухары саха саҥалааҕы салҕаан, тыынын уһатан кэлбитэ. Хара тыа иччитэ оҕолуу үөрүнньэҥ, соннук өһүргэс, оонньуулаах, көрдөөх-нардаах диэн саха өйдөбүлүгэр иҥэ сылдьар.

Амарах, көҥөһө суох, сиэри-туому тутуһар, булду имири эспэккэ эрээри бэйэтин өлүүтүн эрэ ылар, айылҕаҕа, сиргэ-уокка, булка харыстабыллаахтык сыһыаннаһар булчукка Байанай мичик гынар. Төттөрү киһиэхэ өһүргэнэр, хомойор, антах хайыһар. Былыр Байанайы хомотуу, өһүргэтии – күн сириттэн симэлийиигэ тэҥнээҕэ. Билигин тыаҕа бултаабакка да айах ииттэн олоруохха сөп эрээри, аныгы олоххо Байанай – дьолуо тосхойорун иччитэ курдук ылыныллар буолла. Ким эмэ тугу эмэ булан-талан, сонордоһон, эбэтэр сыратын тоҕон сырсыбытын, эккирэппитин ситистэҕинэ – Байанайдаах булчукка тэҥнэһэр. Маннык, өбүгэ төрүт өйдөбүлүн, аныгы олохпут хаамыытыгар киллэрии – сахалыы өйбүтүн ыһыктыбакка аныгы олоххо киирбиппит туоһута.

Саха сирин салайааччыта Егор БОРИСОВ, 2012 сыллаахха Президент дуоһунаһыгар олорон, омук төрүт биир дьарыгын үйэтитэн эрэ буолбакка, саха төрүт өйдөбүлүн судаарыстыбаннас таһымыгар үйэтиппит кылааттаах. Ким даҕаны, хаһан да саха итэҕэлигэр сыһыаннаах өйдөбүлү судаарыстыба таһымыгар таһааран үйэтитэ илигэ.

Саха уус-уран литературатын төрүттээччи, бөлүһүөк, улуу киһи Өксөкүлээх Өлөксөй, 1900 сыллаахха, аан бастаан суругунан айымньыта – “Байанай алгыһыттан”саҕаламмыта. Ити даҕаны чахчы – норуоппут олоҕор Байанай суолтата сүдүтүн туоһулуур.

Саха саргыта үгүс үйэлэргэ Байанайдаах буола турдун!

***

Прасковья НИКАНОРОВА,

“Аартыкка” анаан.

Оставить комментарий    

!