Айанньыттарга сүбэ
Телеграм-каналбар «сахалар-чукурушка народтарбыт» диэн биир сурутааччым күллэрбит этэ. Кырдьык чукурушкаларбыт. Саҥаттан саҥа саҕахтары арыйарбытын, боруобалыырбытын, кэлэрбитин-барарбытын сөбүлүүбүт, сонун сүүрээннэри түргэнник ылынар уратылаахпыт.
Төһө да элбэх дойдуга сылдьар билигин уустук да буоллар, дьон кэлиитэ-барыыта тохтообот.
Кэлии-барыы билигин үксүн Кытай, СНГ дойдуларын нөҥүө барар. Москванан, Питеринэн эргийэн көтүү, бастатан туран, сылаалаах, балаһыанньа уустук – портар сабыллаллар-хайыыллар, иккиһинэн, сыанабыт ытырар. Россияттан омук сиригэр быһа маршруттар лаппа аҕыйаатылар. Дальнай Восток куораттарынан эмиэ эргийиэххэ сөп да, бириэмэтэ эмиэ уһуур-кэҥиир.
Билигин Дьокуускайтан тас дойдуга Кытай Харбиныгар эрэ көтөр. Международнай терминалбыт эргэрбит, кондиционер да үлэлээбэт буолбут. Өһүөтүн куйахы сабыылара субу саккырыах иҥнэн тураллар.
Кытайга тахсыыга россияннарга билигин визата суох эрээри, интернетинэн миграционнай карта толорон Куйаар-Код ылаҕын. Кытайдар кыраныыссаларыгар ону улаханнык көрбөттөр, пааспаргын бэрэбиэркэлээн баран ыыта тураллар. Ити Харбиҥҥа. Атын куораттарга баҕар ирдииллэрэ буолуо, онон Кытайга тахсыах иннинэ толорбут көнө.
Харбинтан Пекиҥҥэ, Шанхайга, Гуаньчжоҕа көттүҥ да аан дойдуга ханна баҕарар көтүөххүн сөп. Россия иһигэр сөмөлүөт билиэтин сыаната, гостиница сыаната наһаа үрдүк. Элбэхтик айанныыр да, хонор да кыаҕыҥ суох. Холобур, Кытай куоратыгар 3 тыһ. солк. (өссө да чэпчэкигэ) икки киэҥ-куоҥ оронноох, сымнаҕас тэллэхтээх, 100% хлопок бельелаах, соттордоох, суунар тэриллээх, халаттаах, тапочкалаах хоһу гостиницаҕа устуохха сөп. Оттон, Красноярскайга саамай кырата порт таһыгар 7-8 тыһ. солкуобайга синньигэс оронноох, синтетикалаах бельелаах нүөмэри устуоххун сөп. Онон сервис уонна сыана уратыта олус араастаһар. Элбэх харчылаах эрэ буоллаххына Россияҕа туристыаххын сөп.
Кытай – цивилизация дойдута буолан бүппүт. Кытай иһинээҕи эргиэн-урбаан билигин хаачыстыбаҕа күүскэ үлэлиир. Астара-таҥастара олус хаачыстыбалаах. Киһитэ элбэҕэ бэрт буолан конкуренция үрдүк, онон хаачыстыбата суох өҥөнү оҥорооччу тута сыыйыллан иһэр быһыылаах.
Уу кутар станциялар. Гуаньчжоу авиапорда.
Өҥө киһиэхэ (клиеҥҥэ) туһуланар буолбут. Хас биирдии порка хонтуруолу ааһаргар уугун былдьаан ылаллар дии, кытайдар ону эмиэ толкуйдаабыттар – хонтуруол кэнниттэн көтөр терминалга киирдиҥ да – тымныы, итии, сылаас уу кутар станциялар тураллар. Хас хардыы аайы, барыта босхо. Иһиттээх эрэ буолларгын куттан ылаҕын.
Сынньанар сирдэр. Гуаньчжоу авиапорда.
Аны таһаҕас таһар тележкалара, эрдэ суруйа сылдьыбытм курдук, вай-файдаах, оттон кириэһилэлэрэ – телефон ииттэрэрдээх. Сынньанар, утуйар сирдэр бааллар – сымнаҕас кириэһилэлэр, диваннар. Массажнай кириэһилэлэр тураллар.
Табахтыыр сир. Табах уматар тэрил. Зажигалка порка көҥүллэммэт. Гуаньчжоу авиапорда
Холобур, биһиги Харбинтан Гуаньчжоуга көтөн тиийэн баран сарсыныгар Бангкокка көтүөхтээх этибит. Биир авиакомпаниянан көтөр буоллаххына, уонна рейстэриҥ икки арда 12 чаастан элбэх буоллаҕына – бу авиакомпания эйигин босхо автобуһунан илдьэн гостиницаҕа хоннорор, аһатар, онтон рейскэр эмиэ автобуһунан төттөрү аҕалан биэрэр. Кими да сарылаппытынан хаалларан кэбиспэттэр, тиһэх пассажирга диэри кэтэһэллэр.
Кытай стюардессалара
Итини барытын интернетинэн уолум эрдэ билэн-көрөн, Кытай авиакомпаниятын рейсигэр регистрациялаан, ханнык стойкаҕа баран гостиница ыларбытын эҥин барытын ыйан-кэрдэн биэрбитэ. Дьиэҕэ зумердар бааллара үчүгэйин! Биллэн турар, ол стойкабытын көрдөөн балайда квестээбиппит да буоллар булбуппут.
Билет сыанатыгар тохтуохха наада. Кытай иһигэр сыана (биһиэхэ холоотоххо) уопсайынан чэпчэки: гостиница да буоллун, ас-үөл, такси, таҥас-сап уонна саамай кылаабынайа – билиэт. Харбин-Гуаньчжоу-Бангкок көтөргө биир киһиэхэ 17 тыһ. иһинэн барда.
Айанньыттар билэллэрэ буолуо – Trip.com диэн китайскай сыһыарыы баар. Онно сөмөлүөккэ, поезка билет, такси сакаастыахха, гостиница уһулуохха сөп. Алипейдаах буоллаххына тута онтон төлөөн кэбиһиэххин сөп. Ханнык баҕарар дойдуга үлэлиир электроннай симка ылыахха сөп, ону Россияттан тахсаары туран активируйдуохха наада. Оччотугар сибээскэ, интернеккэ кыһалҕа суох буолар.
Букинг, уопсайынан, олус дьаабы буолбут. Сымыйа отзывтар, хаартыскалар буолунайдар. Сыһыарыылар гостиница сыанатын наһаа ыарытыннараллар. Сороҕор икки-үс бүк. Ол иһин гостиницаны элбэх хонукка олох устубат буолуҥ, биир хонук сөп. Сөбүлээтэххитинэ уһатыаххытын сөп, сөбүлээбэтэххитинэ атын сиргэ барыаххытын сөп. Дьэ онно миэстэтигэр тиийэн бастаан чуҥнаан баран олохсуйуохха сөп.
Самет арыыта. Таиланд
Холобур, Самет арыытыгар бара сырыттыбыт (Таиланд). Буоларын курдук биир хонукка гостиница уһуллубут. Хаартыскаҕа көрбүппүтүнээҕэр олох атын. Түөрт хонуохтаахпыт. Чугастыы кырасыабай баҕайы отель турар. Онно баран ыйыттыбыт – биир хонуга 3,5 тыһ. солк., өссө сарсыардааҥы аһылыктаах, сарсыҥныттан кэлиэххитин сөп диэтилэр.
Самет.
Онтон Трипка уонна Букинга ол көрбүт отельбытыгар биир хонуктарын сыаната 7,5 тыһ-ттан 17 тыһ. диэри. Сүрдээх араастаһыы буолбат дуо? Онон атаххытынан тиийэн ыйытыаххытын эмиэ сөп, приложениелар «онлайн бронь» эрэ ылаллар диэн этэллэрэ сороҕор сымыйа буолар. Ол гынан баран сорох отель сыаната приложениеҕа төттөрү чэпчэки буолуон эмиэ сөп. Итини барытын тэҥнээн көрөн баран лаппа ороскуоккутун аҕыйатыаххытын сөп.
Онон, ыраах дойдуга барар буоллаххытына Кытайынан эргийэн барыаххытын сөп – сыаната удамыр буолар, уонна Кытай авиакомпанияларын өҥөтүнэн туһанан – гостиницаҕа түһүөххүтүн сөп, босхо илдьэн-аҕалан биэрэллэр. Trip.com сыһыарыынан электроннай симка ыллаххытына сибээскэ эрэйи көрүөххүт суоҕа.
***
Туйаара НУТЧИНА,
Aartyk.Ru
😍