Өрүскэ быһылаан

Халлаан сылыйан халтараан бөҕө. Айаннаан иһэн урукку түбэлтэбин санаатым.

Аан бастааҥҥы массыынабын сорун сордуур этим.  Аҕыйах ый уруулга олороот аны Аммалыыр буоллум. Санаам модьутун билигин сөҕөбүн. Куорат иһигэр аҕыйахта ыытаат өрүс уҥуор айаҥҥа туруннум. Икки кырбас оҕолорбун кэннигэр быраҕаттаатым, аҕам инники сидиэнньэҕэ олорор – бардыбыт. Этэҥҥэ сылдьан, хонон, төнүннүбүт. Биирдэ кыратык суолтан туораан хаарга батылла сырыттыбыт, чэ ничего. Үтүө дьон соһон биэрдилэр.

Кулун тутар эргэтэ. Төннөн куораттаан иһэбит. Эбэ мууһа кип-килэгир. Аҕам: «Сэрэн-сэрэн, бытааннык-бытааннык», – дии иһэр. Итинник саҥара олордохторуна илииҥ-атаҕыҥ бааллан хаалар. Иннибэр биир массыына баран иһэр, ситэн ылыахпын наһаа баҕарталыыбын да, аттыбар олорор аҕам: «Ыксаама-ыксаама». Мин истигэнэ суох киһи бу сырыыга тоҕо эрэ дух-дах буола истим. Иннинээҕи массыына бастакы  полосаттан мин айаннаан иһэр иккис полосабар киирдэ уонна туоруур суолу көрдөөн бытаарда, онтон тохтоон турунан кэбистэ. Мин тормастаабытынан  сыыллан кэлэн кэннигэр кэтилинним. Ппц.

Массыына иһиттэн биэс дьээдьэ тахсан кэллэ. Мин эмиэ таҕыстым. Кинилэр массыыналара «Филдер», миэнэ туох эрэ эргэ «морковник» этэ. Анарааҥҥылар кэннинээҕи ааннара наһаа да улаханнык буолбатар син хомулуйбут. Мин бамперым барбыт, капотум – зигзаг.

Дьээдьэлэр дэлби кыыһырдылар. Мин эмиэ: «Кэннигитин көрбөккө эрэ тугу туораан оонньуу сылдьаҕыт, мууска тохтуу сылдьаҕыт?!» – эҥин диэтим.

-Тоҕо уруулгун туора туппатыҥ?! Миэстэ суоҕар дылы кэлэн саалла сылдьаҕын?!

-Туора тута сатаатым да халтарыйда дии…

Этиһэн баран массыынабар киирэн олорунан кэбистим. Үс дьээдьэ массыынабын тула хаама сылдьаллар. Иккитэ массыыналарыгар олордулар. Кимниин эрэ төлөппүөннэһэллэр.

Арай өрүскэ быһылаан буоллаҕына ГАИ кэлбэт эбит – нейтральная зона, бэйэҕит быһаарсыҥ диэн гаиларга эрийбиппэр эттилэр. Кэргэммэр эрийэбин: «Этиһимэ, харчылааххын дуо, харчыта биэр, кэннигэр түспүт киһи хаһан баҕарар буруйдаах буолар», – диир.

Биир киһи кэлэн түннүкпүн тоҥсуйар: «Таҕыс, быһаарсыахха!» –  диир. «Тахсыбаппын!», – диибин. Иккис киһи төлөппүөннэһэ турар, кэлэн массыынаҕа ким баарын өҥөйөн көрө сатыыр. Оҕолорум ол араллааны шоу курдук көрөллөр быһыылаах, үөрэн хаалан баран мэлтэһэн олороллор уонна инники сидиэнньэҕэ ыксаан хаалбыт оҕонньор олорор.

«Төлөө!» – диэн буолла, маатыры-куутуру эҥин буолаары гынна. 15 тыһ. диэтилэр. Ол сахха элбэх этэ, бардачокпар 6 эрэ тыһыынчалаахпын. Мин 3 тыһ. диибин.

Биир киһи: «Хантан сылдьаҕын?!» – диэ да, диэ буолар. «Дьиэбиттэн сылдьабын». «Дьиэҥ ханна баарый?! – Куоракка». Былыр 90-с сылларга «хантан сылдьаҕын» диэн боппуруос актуальнай этэ. Арааһа оччолорго куоракка элбэхтик чаардаабыт  ыччат быһыылаах. Ык да, ык буолбутугар: «Ньурбаттан сылдьабын! Онно туох баарый?!», – диэтим.  Киһим хайдах эрэ ах барда, саарбаҕалаата. Бээ, «Ньурба»  диэнтэн саллар эбит ээ, диэн эрдийдим. Аны мин киэбирэн бардым😎. Дочь Карлеоне, мать драконов. Ол да буоллар наһаалаатым быһыылаах😂. Испэр кутуйах хаамар да буоллар, таспар көрдөрбөппүн.

«Кырбаан биэриҥ»,  – дииллэр быһыылаах төлөппүөннээн. Ону: «Ээ, ынырык баҕайы чүөчэ, бэйэбитин кырбыах курдук», – дэһэллэр. Онтон түһэрсэн-түһэрсэн 5 тыһ. диэри торгуйдастыбыт.

Куорат кытылын булбуппар аҕам дьэ һуу гынан баран: «Биэс киһини көрөн туран хайдах этиһэҕиний ити?!» – диэн сэмэлээтэ. «Ээ, чэ наһаа да кырбаабатар, көннөрү куттуу сатаатылар дии. Ама да оҕолору, оҕонньору көрөн туран кырбаатахтарай, сахалар дии». «Дьон араас буолан турар билигин», – диир. Чэ, ол да буоллар, син быһаарсан араҕыстахпыт дии😅.

Не знаю к чему это я, вдруг вспомнилось.

***

Источник – телеграм-канал Туйаары НУТЧИНОЙ