Курс валют
$
69.13
0.17
75.33
0.38
Курс валют
Курс валют
$
69.13
0.17
75.33
0.38
Меню
Поиск по сайту

Хаайыыга өр сылга уураахтаммыт учуутал Николай СИВЦЕВ суруга

23.01.2023 (4 дня назад) 21:15 9
Хаайыыга өр сылга уураахтаммыт учуутал Николай СИВЦЕВ суруга

Бүлүү улууһун Өкүндү интернат-оскуолатын учуутала Николай Сивцев өр сылга хаайыыга ууруллубутун туһунан истэн элбэх киһи айманна.

Биир сылга икки педагог Николай Сивцев уонна Максим Местников ыарахан ыстатыйанан буруйданан хаайыыга уураахтаннылар. Дьон итэҕэйиэн баҕарбат. Өскөтүн статистика эрэ туһуттан бу дьон балыллан хаайыы дьыала тэриллибит буоллаҕына, кырдьык, иэдээн.

Николай Сивцев суруга:

ХААЙЫЫТТАН СУРУК 

Күндү аһыныгас, амарах санаалаах үтүө-мааны дьонум-сэргэм, дорооболоруҥ! Бастатан туран, миигин өйүүр-өйдүүр, убаастыыр, ахтар-саныыр дьоммор-сэргэбэр күүс-көмө, өйөбүл буолбуккутугар улахыын-улахан баһыыба, махтал! Эһиги баар буолаҥҥыт баччаҕа диэри тулуйан, эрэлбин сүтэрбэккэ, ыһыктыммакка, чөл туруктаах тиийдим уонна 16 сыл олоруохтаах сирбэр – Дьокуускай куорат 1№-дээх холуонньатыгар кэллим. Эһиги эппит тылларгыт, үтүө санааҕыт уон оччонон, үтүөнэн, сырдыгынан эһиэхэ бэйэҕитигэр төннөн кэллин!

Ханна да дьоннор олороллор, хаайыыга – эмиэ. Икки сыл түрмэҕэ олорбут кэммэр аттыбар баар дьонум (ордук биир дойдулаахтарым, бу ыстатыйанан түбэспит дьон) наһаа өйөөтүлэр. “Син биир босхолонуоҥ, бу дьыаланы алдьатыаҥ, эн бу көстө сылдьар сымыйаны кыайбат буоллаххына, биһиги хайдах буолабыт”, – дииллэр… Хомойуох иһин, сорох дьон тулуйбакка араас төрүөтүнэн “суох” буоллулар. Киһи уһуннук түрмэҕэ олордоҕуна, чахчы, доруобуйата айгырыыр, түргэнник кырдьар эбит. Сибиэһэй салгын тиийбэт, хамсаныы суох, эгэ, телевизор, интернет кэлиэ дуо, оттон хаайыы диэн оннук буолуохтааҕа буолуо. Бүтэһиккэ диэри эрэллээх сылдьыбытым, кырата, дьыаланы прокуратураҕа, СК-ҕа төнүннэриэхтэрэ диэн… Кэргэним барахсан миигин таһаарыахтара диэн ол күн куоракка кэлбит этэ. 16 сыл диэн – олус уһун болдьох. Быһа холоон эттэххэ, икки киһини сордоон өлөрбүт киһи 15-17 сылга барар дииллэр. Судьуйаларга бириигэбэр кэннэ: “За что?!” – эрэ диэн хаалбытым. Саатар киһи кыһыйыах- абарыах, күһэлэҥ эмтээһиннээх ээ… Биир чаас иһигэр маннык ыарахан диагноһы туруора охсубут дьону бэйэлэрин бырааска дуу, психиатрга дуу көрдөрүөххэ сөп этэ. Аны туран, бу ыстатыйанан хаайылла сытар дьонтон, саамай уһун болдьох – миэнэ. Чахчы маннык буруйу оҥорбут дьон 12-13 сылы ылаллар эбит, аҥардас билиммиттэрин иһин. Манна элбэх киһи сымыйа буруйдааһыҥҥа түбэһэн олорор… Холуонньаҕа бу ыстатыйанан олорор дьону улаханнык сөбүлээбэттэр, сэнээһин, абааһы көрүү, атаҕастабыл баар дииллэр. Бу олорор олохпун кимиэхэ да баҕарбаппын. Арай миигин балыйбыт оҕолор, төрөппүттэрэ, силиэдэбэтэллэр, борокуруордар, судьуйалар хайдах үөрэ-көтө, холкутук утуйа, үлэлии-хамсыы сылдьалларыттан абарабын… Хаһан эрэ Айыы Тойон Таҥара барыбытын тэҥниир ини… Абата, кыһыыта да бэрт!

Оо, дойдум ыраас салгынын аҕыннахпыын! Сибиэһэй сүөгэй, күтүөтүм этэригэр дылы, “парное мясо”, дьиэ аһылыга… Аҕам урукку суруктарын ааҕан, күүспэр күүс, сэниэбэр сэниэ, кыра эрэл кыымын эбинэбин. Кини кырдьыгы өрө тутар, кыаммакка-кыһалҕалаахха өрүү күүс-көмө, сүбэ-ама буолара, ол эрээри үтүө киһи олоххо оҥорбут үтүөтэ улаханнык аахсыллыбат буолар эбит диэн сүрдээхтик хомойобун. Миигин атаахтатар, куруук сыллыы, кууһа сылдьар киһим – ийэм барахсан улаханнык ыалдьан, орон киһитэ буолбута, баҕар, “үчүгэйгэ” буолуо. Мин бу иэдээҥҥэ түбэспиппин истибитэ, өйдүүрэ буоллар, киһи суругунан кыайан тириэрпэт алдьархайа буолуо этэ. Оо, ийэбин суохтуубун даҕаны! Өссө биирдэ кууһан, сыллаан, истиҥ махтал тылларын эппит киһи-и!

Туох диэхпиний? Бу аныгы олохтон, бэрээдэктэн олуһун кэлэйэн, сүрэҕим хаанынан оҕуолуур, дууһам кыланар. Сороҕор сүрэҕим дуома айахпынан тахсаары сордуур – абабыттан, дууһам кыланыытыттан, кырдьык суоҕуттан. Кэргэммин, оҕолорбун, дьоммун-сэргэбин биирдэ эмэ түүлбэр түһээн көрөн баран уһугуннахха, олус даҕаны ыарахан. Бу дойдуга бачча уһун кэмҥэ тыыннаах сылдьыбатым буолуо, онон ол-бу буоллахпына, аҕам таһыгар харайаарыҥ. Саатар онно, аҕам таһыгар сытан, дууһам уоскуйуо.

Ол эрээри сахаҕа “Ойуурдаах куобах охтубат” диэн өс хоһооно баар. Элбэх биир дойдулаахтарым, аймахтарым дириҥ ис хоһоонноох суруктарын, баҕа санааларын тутабын. Ордук училищеҕа бииргэ үөрэммит оҕолорум наһаа истиҥ, сахалыы куттаах, киһи санаатын өрө тардар суруктарыттан үөрэбин. Дьонум-сэргэм, куруутун, ханна да тиийдэрбин күүс-көмө буолаҕыт, сүбэлиигит-алгыыгыт! Эһиги баар буолаҥҥыт – мин баарбын, тыыннаахпын, көҥүл салгынын тыыныам диэн эрэллээхпин.

Онон өссө да олоро, охсуһа сатаабыт киһи! Хайдах эһиги курдук чулуу, үлэһит, чиэһинэй, миигин таптыыр дьонноох сылдьан, охтон, бэринэн кэбиһиэхпиний? Кырдьык кыайарын туһугар, олох очурун, охсуутун тулуйан, өссө да олоруохпун наада! Ытык-мааны сахам дьоно, бэйэ-бэйэбитин сиэһимиэҕиҥ, кырдьык туһугар бииргэ охсуһуоҕуҥ.

Эрэли кытары Николай Сивцев.

***

Источник – Социальнай ситимтэн. 

Обсуждение • 9

Добавить комментарий
  1. Капиталина Алексеева

    Тяжёлое письмо…

  2. Слава

    Дьэ ыарахан сурук. Ким керен турбут уьу. Буруйдаах эрэ буруйа суох. Ама следком диэн баар дии. Син улэлээхпит диир дьон ини… Чэ билбэппин, биллибэт. Местников Максимы эмиэ хаайдылар. Ааьыммытын аахсыбатылар. Итэгэйиэги багарыллыбат… Эмиэ да суут сокуон оннук акаарылара , суобаьа суохтара диэни эмиэ. Местников саастаах киьи, итинтэн тахсара биллибэт. Бу син эдэр киьи санаата тостубут да диэххэ сеп. Уонна учууталлаан эр дьон. Урут онтон уксэ эр киьи учуутал этэ. Билигин уксэ дьахтар. Ол да пенсиялаахтар дииллэр, тыага. Куоракка эдэрдэр бьх. Итини кере сылдьан ким эр киьи учууталлаабыт уьу. Онноогор элбэх хаччыны тутууга онно манна булар ини

  3. Тимир

    Бу муода манна саца кэллэ.Эрдэ дойду урдунэн баара.О5олор а5аларын отчимы онно манна буруйдууллара.Танцыга киинэ5э мэнээх арыгылыы табаахтыы ыыппата диэн иэстэьэн.Биьиэхэ эмиэ кэллэ.Дьицнээх тугэни кистииллэр.Ийэлэр сожитель аймах дьон.Онтон бу аьа5ас.Онон сымыйа буолуо.Иьээччи ыал о5олорго бэйэлэрэ итинник акаары дьиикэй буолаллар.Дьонноро улэ уорэх ой суох деградация.Ону учугэй дьону туьэрэлэр.Олохтоох депутааттар комускэц.Бу хара балыыры.Уолаттары Быыьаац.

  4. Билэр

    ити киhи биир киһини күүһүлээн турардаах урут молодой сылдьан, онон педофил буолуон сөп.

  5. Думаю

    Билэри булан следкомнарынан силиэстийэлиэххэ наада. За ложь- штраф несколько сотни тысяч

  6. Кугдаров

    Ыстаалын репрессивнай систематын тенуннэрэн эрэллэр. Суут-сэлиэстийэ улэьиттэрэ, отутус сылларга дьону хаардыы хаампыттарын суохтаан суоьур5анан эрэллэр. Онон, тумсэн, итинник следователлэри учууталлар тумсэн, ессе хаан таьааран ириигирэ иликтэринэ, систематтан уурдэриэххэ наада. История спиралынан сайдар, онон киьигитин кемускээбэтэххинэ итинник сууттааьыннар эьиэхэ эмиэ тиийэн кэлиэ5э. Ытыллар дьон испээьэгин бигэргэтэ олорбут, аатырбыт кыьыл командирдар Якир, Блюхер, Егоров уо.д.а. кэлин бэйэлэрэ ытыллан елбуттэрэ.

Оставить комментарий