Курс валют
$
66.42
0.08
75.22
0.4
Курс валют
Курс валют
$
66.42
0.08
75.22
0.4
Меню
Поиск по сайту

Үтүө дьон олоҕу киэргэтэр

28.11.2018 23:26 2
Үтүө дьон олоҕу киэргэтэр

Билиҥҥи тимир-тамыр, тыйыс үйэҕэ сороҕор эмискэ, соһуччу, хардатын тугу да эрэйбэт үтүө санаа күлүм гыннаҕына киһи соһуйар буолла. Тиритэ-хорута күүс баарынан атаралыы сиэлэн иһэр олох соноҕоһун сырсар дьалхааҥҥа туох эрэ истиҥмитин сүтэрбит курдукпут.

Соболоҥо суох симик үтүө санаа билигин сэдэх көстүү буолла. Ол туһунан Мэҥэ-Хаҥалас улууһугар сокуоннай саастарын ситэ илик оҕолорго анаан тэриллибит социальнай-реабилитационнай киин дириэктэрин эб. тол. Валерия Баишева «Аартыкка» анаан суруйбут ыстатыйатын бэчээттибит:

«Циркэ, циркэ кэлбит!» — бу нэдиэлэ устата Майа оҕолоругар  улахан үөрүүлээх-көтүүлээх сонун ватсабынан, өҥнөөх реклама кумааҕынан  сэлиэнньэни биир гына тарҕанна.  Үгүс оҕо циркэҕэ сылдьаары, сонун кыылы-сүөлү көрөөрү, көрүдьүөскэ, үөрүүгэ кыттыһаары эрдэттэн турунуу, өрө күүрүү бөҕөтө буолла. Бу күннэргэ хас биирдии оҕолоох ыалга, сэрэйдэххэ, циркэ  түрүлүөнэ эрэ буолуохтаах.

Арай сокуоннай саастарын ситэ илик оҕолорго аналлаах социальнай приютка циркэ эрэ туох эрэ, ийэтэ-аҕата суох барахсаттар күннээҕи  олохторо биир кэм устар. Ким кинилэри ол ыарахан сыаналаах циркэгэ сырытыннарыай? Биир оҕо барар буоллаҕына, 15 оҕону матарбакка барыларын  илдьиэххэ, көрдөрүөххэ наада.

Дьэ, арай, оннук олордохпутуна: «Дириэктэргит баар дуо?»  —  диэбитинэн биир сэмэй багайы эдэр киһи кабинекка киирэн  кэллэ уонна бугун хас оҕолооххутуй диэн  сураспытынан барда.  Мин туһааннаах үөрэх тэрилтэтиттэн кэлэннэр оҕолору ыйыталаһаллар буоллаҕа диэн хап-сабар эппиэттэстим.

Салгыы: «Оҕолору циркэгэ босхо сырытыннарыам этэ,» — диэн соһуччу этиилээх буолла. Алҕас иһиттим дуу, тугуй диэн: «Босхо да?..» — диэн төттөрүтүн ыйыталаһааччы буоллум. «Босхо», — диэн бэрт судургутук хардарда, хата мин ыйытыыбыттан бэркиһээбиттии уонна көрдөһөрдүү көрөн кэбистэ. Аны көҥүллүҥ суоҕа диэбиттии: «Мин уруккаттан эһиги оҕолоргутун босхо сырытыннарааччыбын ээ», — диэтэ.

Маннык дирбиэнэ-дарбаана суох, ис сүрэҕиттэн үтүөнү онорор киһи илэ бэйэтинэн аттыбар кэлэн турарыттан соһуйдум, үөрдүм, сөҕө санаатым. Билинни курдук уустук, ыарахан кэмҥэ атын дьоҥҥо үтүөнү оҥорор дьон сэдэхтэрэ бэрт буолан, кинилэр тугу да харда эрэйбэккэ көмөлөһөр дьаһаныылара үгүс киһиэхэ өйдөммөт. Били, куорат бөҕүн хомуйааччы Антон Васильевы да ылан көрүөх.   Ол иһин киһибин таах ыытан кэбиспэккэ, салгыы токкоолоһон кэпсэтэргэ сананным.

— Мин Жирков Василий Павлович диэммин. Приют оҕолорун босхо циркэгэ сырытыннарбытым үһүс сыла буолла ээ…

— Били «Шапито» диэн саамай чэпчэки билиэтэ 7 мөһөөхтөөх Москва циркэтигэр эмиэ эн сырытыннарбытыҥ дуо?

— Таһырдьа шатердаах циркэни этэҕин да? Ээ, сырытыннаран. Сылга 3-4 цирка кэлэн барар буоллаҕына — барытыгар матардыбакка сырытыннарааччыбын ээ.

— Эн эбиккин дии оччого, ол босхо сырытыннарар үтүө санаалаах киһибит! Хайдах да буолбутун иһин эн курдук дьону дьон-сэргэ билиэхтээх, мин эн тускунан хайаатар да суруйуом — диэн киһим аккаастаммытын үрдүнэн күүспүнэн сөбүлэһиннэрэн хаартыскаҕа түһэрдим.

— Эн бэйэҥ тулаайах улааппытын дуо, ол иһин маннык оҕолорго көмөлөһөр санааҕа кэллэҕиҥ?

— Ээ, суох. Ийэлээхпин-аҕалаахпын. Боруоста киһилии тулаайах оголору ис сүрэхпиттэн аһынабын. Мин оҕолорбун син онно-манна сырытыннаран, үөрдэр-көтүтэр буоллахпына, бу кэмҥэ приют  оҕолоро того оҕо саас дьолуттан матыахтаахтарый? Ол эрэ санааттан бэйэбэр итинник быһаарыныы ылыммытым.

Василий  Жирков Майа ОДьКХ-тыгар операторынан, кэргэнэ Хара оскуолатын остолобуойугар үлэлииллэр эбит. Эдэр ыал үс оҕолоохтор, онтон саамай кыралара — иккилээх. Дьиҥинэн тыа сирин боростуой олохтооҕор ордук харчы диэн суоҕун кэриэтэ буоллаҕа, ону бары да билэбит. Ол гынан баран күннээҕи бэйэ кыһалҕатын туора тутан, атын кыаммат-түгэммэт оҕолору санаан, кинилэргэ анаан үтүөнү оҥоруу — биһиги кэммитигэр чахчы сэдэх көстүү. Онон Василийга, кини дьиэ-кэргэнигэр үтүөнү онорбуккут сүүс төгүл үтүөнэн эргилиннин диэн баҕа санаа бастыҥын аныыбыт!

Маннык дьон баар буоланнар, биьиги оҕолорбут сарсынны күннэригэр улахан эрэллээхпит.

***

Валерия Баишева,

Мэнэ-Ханалас улууһа, Майа сэл.  

 

Обсуждение • 2

Добавить комментарий
  1. Тыый доо!

    Бэрт дии.
    Итинник утуе санаата бэйэтигэр утуенэн эргиллэ турдун.
    Дьин сахалыы утуе санаалаах ыал эбит дии
    👍

  2. Андрей

    Молодец какой! Благополучия Василию и его семье!
    Скромность скромностью, но о таких добрых людях нужно знать, спасибо Валерии!

Оставить комментарий