Хоһуун уолаттар

Кыргыттар, дьахталлар испэт-аһаабат сулумах  эр киһи лаппа аҕыйаата диэн суҥхараллар.

Кыргыттар, оннук буолбатах! Билсэн кэбиһиҥ – 36 саастаах Денис Иванов Ньурба улууһун Киирэп сэлиэнньэтигэр  олорор эр бэрдин кытары. Төһө да олунньу 23 күнэ эр дьон бырааһынньыга буоллар, Денис бырааһынньык диэн өрөөбөккө үлэлээн тигинэтэ олорор эбит. Биир күн иннинэ эйигиттэн интервью ылыахпын баҕарабын диэн бассааптаабыппар, сарсын эбиэт кэннэ биллээр диэбитигэр испэр саарбахтыы санаабытым.

Болдьоммут чааспар видеозвонок холбообутум, кырдьык, киһим гарааһыгар иистэнэ олорор эбит.

Денис унтуу улларар, сахалыы моһуоннаах атах таҥаһа тигэр дьарыктаах. Чугас эркин нэһилиэктэртэн, бэл диэтэр куораттан сакаас ылан быыстала суох үлэлиир эбит.

Бастакы оборудованиетын икки сыллааҕыта Дьарыктаах буолуу киинин чэрчитинэн граҥҥа киирсэн 250 тыһ. сүүйэн ылбыт. Ол кэннэ улуустааҕы «Год народных инициатив» диэн бырайыакка кыттан эмиэ 250 тыһ. ылар. Ол харчытынан колодка, тирии, өссө биир тириини тигэр массына атыылаһар. Бу курдук туох да иэһэ, кирэдьиитэ суох бэйэтин дьоҕус дьыалатын сайыннаран барар.

Аны туран оҥоһуктарын илдьэ улуус киинигэр быыстапкаҕа кытта барар. Ол тиийбитигэр куораттан кэлбит спикердэр кини үлэлэрин үрдүктүк сыаналаан Москва куоракка А. Н. Косыгин аатынан технология уонна дизайн университетыгар анал кууруска үөрэнэргэ сүүс тыһыынчаттан тахса сыаналаах  сертификаты туттараллар.
Денис баран үөрэнэн кэлэр. Головатый Руслан Анатольевич диэн үөрэтэр маастарынаан үчүгэй сыһыан олохтоон, ол  учуутала өссө кэлэн эбии үөрэн, бу сырыыга буор-босхо үөрэтэбин диэн ыҥыра сытар. Уол билиҥҥитэ толкуйданар.

Урут Денис эбэтэ дьоҥҥо унтуу, ийэтэ бэргэһэ тигэр эбиттэр, аҕата атах таҥаһын улларар буолан, Денис иис эйгэтигэр кыра эрдэҕиттэн сыстан улааппыт. Оскуоланы бүтэрэн баран доҕотторун кытары кучуйсан суоппар идэтигэр үөрэммит да, техникаҕа улаханнык кыайан сыстыбатах. Онон гарааһын иистэнэр мастерскойга кубулутан баран айа-тута сылдьар. Түүн иистэнэр, күнүһүн утуйар бэйэтэ туспа режимнаах эбит.

Денис билигин ийэтинээн иккиэйэҕин олороллор. Гарааспар, баҕар, хаһан эмэ кыыс киирэн кэлиэ дуу диэн саныы-саныы үлэлиибин диэн дьээбэлэнэр. Киһи баҕа санаалаах, ыралаах буолуохтаах. Ол мэлдьи кэриэтэ туолар.

Хоһуун уолга холоонноох доҕору, үлэтэ-хамнаһа туругура турарыгар баҕарыаҕыҥ.

***

Анжелика МОТОСОВА,

Aartyk.ru