Хас биирдии киһи олохпутугар дьайар

Билбэт нүөмэрбиттэн хаста да эрийдилэр. Ылбаппын. Онтон маннааҕы нүөмэрин көрөн үһүс-хаһыс эрийиилэригэр ыллым. “Неустроева Надежда Васильевнаны кытары билсэр этиҥ дии, иллэрээ күн бараахтаабыт, бээһээ биллибит”, – диэн эппиттэригэр тута өйдүү охсубакка мух-мах буоллум. Иллэрээ күн тоҕо эрэ: “Надя хайдаҕа буолла, эрийэ сылдыбыт киһи”, – диэн испэр санаам ылбытым да, күннээҕи түбүк быыһыгар соннук санаа утаҕа буолан умнуллан хаалбыта.

Тиһэҕин быйыл саас көрбүтүм. Булт этин олус сөбүлүүрэ, бэристэххэ үөрүү бөҕө буолааччы. Ол сиэринэн кус булдун саҕана төлөппүөннээн: “Надя, кус ылаҕын дуо?” – диэн ыйыппыппар: “Ылан бөҕө буоллаҕа. Мин үчүгэй аҕайдык кинини түүтүн үргүөм”, – диэн күлбүтэ.  Кэлиҥҥи сылларга олох хам-түм эрэ төлөппүөннүүрэ уонна наар санааргыыр этэ: “Дьон-норуот, республика туһа диэн үлэлиир тойон-хотун суох буолла… Хайдах манныгый, ээ?! Иэдээн…”.

Надежда Васильевна АГИП Ис политика департаменыгар өр үлэлээтэ. Сүрдээх киэҥ билиилээх, элбэҕи билэр-көрөр, ааҕар, ырытар, анаалыстыыр дьоҕурдааҕа. Государственнай интэриэс, политика иһэ-таһа, идеология – кини тиэмэтэ буолара.

Урут Надежда Неустроева уонна Лариса Анисимова диэн ааттары суруналыыс идэлээхтэр бары билэллэрэ. Дьокуускайга СТВ диэн 90-с сылларга сүрдээх сытыы биэриилэри бэлэмнээн көрдөрөр телеканал баар буола сылдьыбыта. Бу канал “сулустара”  саха кыргыттара – Неустроева уонна Анисимова этилэр. Коррупцияны саралыыр, кутталлаах баҕайы биэриилэри усталлара. 90-с сылларга киһини өлөрөр бырдаҕы өлөрөр кэриэтэ судургу кэмҥэ хорсун, сытыы санаалаах суруналыыс кыргыттар баар буолбуттара туһугар туспа сөҕүмэр көстүү этэ.

Онтон сэрэйбит курдук, СТВ сытыы биэриилэрэ сабыллыбыттара, каналга өр кэмҥэ биллэрии эрэ тахсара, онтон сыыйа бэйэлиин да сүппүтэ.   Лариса Анисимова куоракка баара, хаалбыта, быстах-остох биэриилэри бэйэтэ оҥоро сатыыра, оттон Надежда ханна барбытын ким да үчүгэйдик билбэтэ. Кэлин кинини кытары чугастык билсибитим эрэ кэннэ ол кэмҥэ хайдах-туох быһылаан буолбутун кэпсээбиттээх. Дьэ, дьулаан: былаастаах, чыыннаах-хааннаах дьон хайдах курдук сойуоласпыттарын, оҕотунан киирбиттэрин, ол онтон Москваҕа аспирантураҕа баран быыһаммытын ахтара. Ол ааттаабыт дьоно билигин да далбарга сылдьалларын көрөбүн ээ.  Өссө дьалхааннаах 1990–с, бутуурдаах 2000 сыллар саҕаланыыларыгар суруналыыстаабыт буолан туох да үтүмэн элбэх информацияны билэрэ.

Надежда Васильевна 2000 сыллар саҕаланыыларыгар “Эхо столицы” хаһыакка политическай обозреватель, аналитик быһыытынан үлэлии сылдьыбыт кэмнээҕэ.  Кини оччолорго Москваҕа политологка үөрэнэрэ, диссертациятын суруйа сылдьар быһыылааҕа. Редакцияҕа хам-түм көстөн ааһара. Биһиги, саҥа саҕалаан эрэр суруналыыстар ыраахтан “били, СТВ Надежда Неустроевата” эрэ диэн билэрбит.  Эн-мин диэн билсибиппит  Виталий Басыгысов Ил Түмэн бэрэссэдээтэлинэн үлэлиир кэмиттэн саҕаламмыта. Ити 2010 сылтан эбит, Надя киниэхэ көмөлөһөөччүнэн үлэлээбитэ. Виталий Николаевыһы олус ытыктыырын, киэҥ билиилээҕин, улахан толкуйдааҕын бэлиэтиирэ. Көҥүл суруналыыс тыыннаах буолан тапсар, убаастыыр эрэ киһитин кытары бииргэ үлэлиирин ордороро.

Кэлин, Басыгысов политикаттан барбытын кэннэ, Ис политика департаменыгар киирэн бэркэ табыллан үлэлээбитэ.  Онтон… Буолбут, буола турар уларыйыылары олус чугастык сүрэҕэр ылынара. Култууралаах, чиэһинэй киһи быһыытынан, госслужащай этикатын да тутуһан үлэтин ымпыгын-чымпыгын букатын кэпсээбэт этэ. Арай: “Хайдах-хайдах буолабыт, туохха-туохха тиийэбит”, – эрэ диэн наһаа санаарҕаан этэрэ. Улаханнык ыарытыйар буолбута. Кэпсэтии, урукку курдук сэлэһии сүппүтэ. “Надя, эн уларытар, дьайар кыаҕа суох процесстаргар санааҕын уурума. Ити барыта эйигиттэн тутулуга суох, харыстан, доруобуйаҕын көрүн, хоргутууну хоннорума”, – диирим. Ону: “Оттон наһаа кыһыылаах, ээ, тулуйа сатыыбын…” – диирэ. Этэргэ дөбөҥ, ис-иһигэр туох буурҕа-холорук ытылларын хантан билиэххиний.

Надежда Васильевна бэйэтин кэмин киһитэ буоллаҕа – норуот, республика, дьон интэриэһин өрө тутуу иһин олорбут, өйдүүн-сүрэхтиин ол туһугар бэйэтин да харыстаммакка үлэлээбит көлүөнэ тиһэх дьонун бэрэстэбиитэлэ.

Көҥүл суруналыыс куттаах, төрөөбүт Сахатын сирин, дойдутун туһугар ис сүрэҕиттэн кыһаллыбыт, үлэлээбит-хамсаабыт, сыратын уурбут, киһилии сиэри өрө туппут үтүө  санаалаах киһибит – Надежда Васильевна бу түһүмэх олоҕуттан таҕыста.  Киһи кута өлбөт, хаттаан төрүү турар дииллэр. Аныгыс олоххо, баҕар, бу олоххо алтыспыт куттарбыт эмиэ хаттаан билсиһэн-көрсүһэн ааһыахтара.

…Надежда Васильевна кыыһыгар, сиэнигэр, аймахтарыгар, доҕотторугар дириҥ кутурҕаммын тиэрдэбин. Хас биирдии киһи биһиги олохпутугар хаһан да халтай киирбэт. Хас биирдии киһи биһиги олохпутугар дьайар күүстээх, туохха эмэ үөрэтэр, ханнык эмэ санааҕа тиэрдэр. Надежда Васильевнаны кытары алтыһыы наар саҥа билиини биэрэрэ, санааны угара, ону сэргэ киһи сүрэҕэ уйанын, аһаҕаһын көрдөрөрө. Быдан дьылларга бырастыы, үтүө киһи Надя, Надежда Васильевна…

***

Туйаара НУТЧИНА,
Aartyk.Ru

Неустроева Надежда Васильевна родилась в 1961 году в с. Чурапча Чурапчинского района. Закончила Якутский государственный университет по специальности «Русский язык и литература». Кандидат политических наук. В кандидатской диссертации «Качественные характеристики электоральной коммуникации в условиях изменения политической системы России» исследована сущность и особенности электоральной коммуникации, ее роль в обеспечении легитимности власти.
Неустроева Н.В. имела большой опыт работы в журналистике, работала репортером, корреспондентом, редактором, главным редактором в печатных изданиях и на телевидении. Многие запомнили ее как одного из ярких политических обозревателей на якутском телевидении, освещавшим насыщенные событиями 1990-е годы. Её острые, актуальные телерепортажи зрители ждали с нетерпением. Надежда Неустроева внесла неоценимый вклад в развитие якутской политической телепублицистики.
С 2010 по 2013 год Неустроева Н.В. работала в Государственном Собрании (Ил Тумэн) Республики Саха (Якутия) в Секретариате Председателя.
С 2013 года работала в Департаменте внутренней политики Администрации Президента и Правительства Республики Саха (Якутия). Неустроева Н.В., имея большой опыт в работы в средствах массовой информации, участвовала в организации информационно-разъяснительной работы среди населения по вопросам государственной политики в сфере социально-экономического и общественно-политического развития. Неустроева Н.В. активно взаимодействовала с руководителями государственных и негосударственных СМИ по вопросам информационной и внутренней политики.
За время работы в Департаменте внутренней политики Неустрова Н.В. зарекомендовала себя как ответственный, добросовестный и грамотный сотрудник, обладала организаторскими способностями, большим кругозором, глубоким знанием общественно-политических процессов, имела большой авторитет и уважение коллег.
За многолетний высокопрофессиональный, добросовестный труд и значительный вклад в развитие Республики Саха (Якутия) Неустроева Надежда Васильевна была награждена Знаком отличия «Гражданская доблесть», Благодарностью Председателя Государственного Собрания (Ил Тумэн) Республики Саха (Якутия) и Грамотой Правительства Республики Саха (Якутия).
В семейном кругу Надежда Васильевна останется в памяти любящей и заботливой мамой, бабушкой, сестрой.