ТХМ: Бэс Күөлгэ тус-туһунан хотон тутуллар буолла

Тыа хаһаайыстыбатын министиэристибэтэ биллэрбитинэн, Бэс Күөл олохтоохторугар тус-туһунан хотон тутуллар буолбут. Бастаан ТХМ биир уопсай хотон туттан, бары кыттыгас сүөһүгүтүн онно кыстатыҥ диэн эппит – дьон сөбүлэспэтэх.

“Онон хотонноро уокка былдьаммыт дьоҥҥо саҥа хотон тутталларыгар көмө оҥоһуллуоҕа. Маны сэргэ, сүөһү, сибинньэ, куурусса уонна техника ороскуотун эмиэ толуйуохтара” – диэн ТХМ сайтыгар биллэрэллэр.

Арааһа “ороскуоту министиэристибэ уйунуо” диэн этэ сатаабыттар быһыылаах. 

ТХМ кыстык оту бэйэтэ атыылаһан, тиэйэн аҕаларга үлэни саҕалаабыт.

Министиэристибэ:

Бу күннэргэ хорумньу ааҕыллан түмүктэннэ. Ол түмүгүнэн, 13 тыа хаһаайыстыбатынан дьарыктанар ыалга хорумньу таҕыста:

• 9  сүөһү, ол иһиттэн 8 быйылгы төрүөх ньирэй уонна биир тыһаҕас;

• 8 сибиинньэ;

• 19 куурусса;

• 10 хотон;

• 1 сибинньэ уйата;

• 3 техника (МТЗ-82, синтай, уу баһар массыына).

Тыа хаһаайыстыбатын миниистирин бастакы солбуйааччыта Татьяна Осипова хорумньуну, үбү-харчыны ааҕар, онтон миниистир солбуйааччыта Николай Афанасьев Бэс Күөлүгэр миэстэтигэр үлэлиир эбит.

Баһаарга эмсэҕэлээбит 13 ыалтан сэттэтэ – фермердэр, алтата – кэтэх ыал.

2012 сыллаахха «Дьиэ кэргэнинэн ынах сүөһүнү иитии» диэн конкурска кыттан грант  ылбыт Алексей Петров Атамай нэһилиэгин биир улахан фермера буолар. Бу дьыл атырдьах ыйын 1 күнүнээҕи туругунан 335 сүөһүлээх, ол иһиттэн ыанар ынаҕа 132 төбө. Алексей Алексеевич 100 миэстэлээх хотоно уокка былдьанна.

Тыа хаһаайыстыбатын министиэристибэтэ, хотону 100% чөлүгэр түһэрэргэ үлэни саҕалаата уонна ороскуотун 100%  уйунар диэн ТХМ пресс-сулууспата суруйар.

***

Aartyk.Ru