Ньурбаҕа дьон бэйэтин дьыалатын арынан үлэлээн эрэр

Ньурба улууһун дьаһалтата бэйэ дьыалатын арынар дьоҥҥо көмө харчы көрөр. Бу күннэргэ улуус баһылыга Алексей ИННОКЕНТЬЕВ нэһилиэктэри кэрийэн ким-туох ситиһиилээҕин көрдө-иһиттэ.

Алексей Михайлович Сүлэҕэ уонна Антоновкаҕа сылдьан бырайыактарын көмүскээн үлэлии-хамсыы сылдьар дьон туһунан  телеграм-каналыгар суруйар. Сүлэҕэ алта урбаанньыт туһунан кэпсиир:

Николаева Маргарита Михайловна Сүлэ нэһилиэгин летопиһа диэн интерактивнай музей оҥорон саҕалаабыт.

Филиппов Егор Геннадьевич ууну ыраастыыр станция ылбыт. Ньурбаҕа кэлэн сытар. Кэлэр ыйга үлэҕэ киллэрэр былааннаах.

Андреев Григорий Григорьевич улууска биллэр тимир ууһа. Мастерскойун кэҥэттэн эбии оборудование ылыммыт. Ыйга ортотунан 20-чэ тимир аан (ворота) оҥорор.

Сүлэ оскуолатыттан Григорьев Юрий Анатольевич Горнай-Алтайтан агро-пааркаҕа диэн араас кустарниктары атыылаһан аҕалтарбыт. Ол курдук, облепиха, вишня, сибиир харыйата, яблоня, черемуха онтон да атын араас үүнээйи баар.

Афанасьев Алексей Афанасьевич бэйэтэ хаһаайыстыбалаах. 157.000 солк.суумалаах көмө ылан 25 төбөҕө дьоҕус ураты үчүгэй баҕайы бырайыактаах хотон туттубут.

Бырайыактар бары олус үчүгэйдэр, наадалаахтар, диэн улуус баһылыга түмүк оҥорор.

Баһылык салгыы Антоновкаҕа дьону кытары көрсүбүтүн суруйар:

Захаров Михаил Владимирович оҕо эрдэҕиттэн дьиэ көтөрүн иитиитинэн дьарыктанар. Дьоҕус анал дьиэҕэ, киһи хотон диэҕин тыла тахсыбат тутуута, кууруссалары, кустары, индюктары иитэр. Саас нэһилиэнньэҕэ атыылыыр.

Егоров Егор Альбертович ууну ыраастыыр станция ылан нэһилиэнньэҕэ бытыылкалаах ыраастаммыт ууну атыылыыр уонна массыыналарын бэйэлэрэ сууналларыгар мойка самообслуживания арыйан үлэлэтэ турар. Сайыҥҥы өттүгэр массыыналар уочараттаан турар буолаллар. Салгыы дьыалатын кэҥэттэр былааннаах.

Гурова Евгения Михайловна пельмень оҥорорунан дьарыктанар. Эрдэ кэргэнин кытары барытын илиинэн оҥорор эбит буоллахтарына билигин 500.000 солк. анал оборудование ыланнар үлэлэрэ биллэ түргэтээбит. Бэйэбит ылар кыахпыт суох этэ диэн Гуровтар махталлара улахан.

Салгыы Тарасова Агафья Афанасьевнаҕа сырыттыбыт. Кини сылы эргиччи үлэлиир теплица туттубут. Буорун барытын сиидэлээн бэлэмнээбит, бетон муосталаах. Уотун боппуруоһа кыалынна даҕаны үлэтин саҕалыыр былааннаах.

Федеральнай суол кытыытыгар Альберт Данилов переработка сыаҕын арынан эрэр. Күҥҥэ 200 халбаһыыны оҥорон таһаарар былааннаах үлэтин саҕалаабыт. Билигин тас үлэтэ бүппүт диэххэ сөп. Ханнык баҕарар эти кытары үлэлиибин диир. Барытын ымпыгар-чымпыгар тиийэ толкуйдаан тутта сылдьар.

Ити курдук Антоновкаҕа эрэ буолбакка, бүтүн улуус үрдүнэн эрдэ үлэтэ суох сылдьыбыт дьоммут биһиги көмөбүтүнэн бэйэлэрин дьыалаларын тэринэн үлэлии-хамсыы сылдьалларын көрөр үчүгэйэ сүрдээх.

***

Aartyk.Ru