Дьокуускай театрдарa көрөөччүнү хайдах көрсөллөр

Театр үлэлиир саҥа болдьоҕо аһыллара бу тиийэн кэллэ.

Aartyk.Ru ааҕааччылара, театр искусствотын сүгүрүйээччилэрэ,  маныаха түбэһэ хас да боппуруоһу көтөҕөллөр.

Бастатан туран, “театрдарга тоҕо сибэкки атыылыыр киоска суоҕуй” диэн ыйыталлар:

-Биһиги курдук тымныы сиргэ хантан эрэ атын чиэски турар маҕаһыынтан сибэкки атыылаһан ылан аҕалар уустук, кыаллыбат даҕаны. Киһи эрэ барыта массыынанан театрга кэлбэт.  Үксүн туос бөтөрөҥүнэн, үлэттэн үргүлдьү театрга сүүрэн кэлэбит. Театр иһигэр ама сибэкки атыылыыр дьоҕус муннугу тэрийэр кыах суох муҥа дуу? Биһиги да артыыстарбытыгар сибэкки биэрэр култуураны тутуһуохпут этэ. Артыыстарбыт да үөрүөх, үлэлэрин, сыраларын көрөөччү сыаналаабытыттан дуоһуйуох этилэр. Сибэкки бэлэхтээһин – култуура таһымын биир туспа көстүүтэ. Култуура храмыгар хайаан да ол үгэһи киллэрэр наада.

 Ону сэргэ дьон гардероб үлэтин туһунан суруйар:

-Опера уонна балет театрын гардеробщиктара, уларыйа сылдьаллар быһыылаах, наһаа бутукаайдар, мичээр диэни билиммэт дьон. Сыаналаах үрүҥ саҥыйаххын сиринэн соһон илдьэн ыйыахтарын, аҕалан тар курдук быраҕыахтарын сөп.  Онуоха холоотоххо, Саха театрын кыргыттара үөрүнньэҥнэр, истиҥнэр, туттунуулара сып-сап, таҥаскын-сапкын кичэйэн, харыстабыллаахтык туталлар-хабаллар.

Хайа да театрга саамай ыарыылаах миэстэ – туалет:

-Кыраан, раковина, сиэркилэ хайа да театрга ньаҕай. Туалет наһаа кирдээх, киһи сиргэнэр. Биир да театр туалетыгар кумааҕы суох, эгэ салфетка кэлиэ дуо? Доҕор, туалетнай кумааҕыны тоҕо кэмчилииллэрэ буолла, наһаа да дьикти, 90-с сыллар буолан. Театрга – искусство дьиэтигэр, киирбит дьон гардеробтан туалетынан эргийэн саалаҕа киирэр эбээт. Сиэркилэҕэ көрүнэн, атах таҥаһа уларыттан, бүрүчүөскэ көннөрүнэн, уос-тиис оҥостон. Онтубут ол оннук дьаабы.

Театрдар салалталара көрөөччүнү хомотор итэҕэс-быһаҕас баарын туоратыахтара диэн эрэнэбит. Искусство храма таһа эрэ буолбакка, иһэ эмиэ сырдык, ыраас буолуохтаах, ис хоһоонугар дьүөрэлэһиэхтээх. Сөбүлэһэр инигит?

***

Aartyk.Ru