Икки өттүттэн кимнээх-кимнээх илии тутуспуттар диэн ыйытар буоллаххытына, дьокуускайдартан – баһылык солбуйааччыта Георгий Гаврильев уонна киин куорат дьокутааттарын бас-көс киһитэ Альберт Семенов, оттон горнайдартан – кулуба Никита Андреев уонна улуустааҕы чаччыыналар тойонноро Алквиад Тарасов эбиттэр.
Уос өһүллүүтэ оҥорон бастаан Георгий Гаврильев Дьокуускай куорат дьаһалтатын аатыттан Горнай улуус тэриллибитэ 90 сыллаах ытык-мааны сааһынан итии-истиҥ тылы эппит. Спорт төрүт көрүҥнэригэр куоталаһыы XXI-с спартакиадата Горнай үбүлүөйүн ситэрэн-хоторон биэриэ диэн ис сүрэҕиттэн эрэммит.
Горнайдар буоллаҕына киин куорат эргиэмсиктэрэ, атыыһыттара дьороҕо кыттан аһы-үөлү, табаары, өйдөбүнньүк малы-салы тэнитиэхтэрэ, атыы-тутуу ыытыахтара диэн төттөрү эрэммиттэр. Харантыыҥҥа хаайтарбыт саха дьоно барахсан аны сайын Бэрдьигэстээххэ тоҕо анньан тиийиэхтэрэ, олору барытын сылаастык чэйдэтэн, хонуктарын тэрийиэххэ наада. Улахан түбүк, биир улуус холугар кыайтарыа суоҕун сөп.
Дьокуускайтан Бэрдьигэстээххэ диэри икки чааһынан таас суолунан сырылатан тиийиэххэ сөп, онон күүтэбит диэн улуус кулубата Никита Андреев тоһоҕолоон эппит. Ааҕан-суоттаан көрбүттэрэ 20 тыһ. тахса ыалдьыт кэлиэх курдук эбит.
Константин Бурцев, спорт уонна физкультура управлениетын салайааччыта, Дьокуускай хамаандатыттан спартакиадаҕа 60 киһи кыттыахтаах диэн аахпыт. Ону таһынан уонча тренер, бэрэстэбиитэл барыахтаах диир.
Санатар эбит буоллахха, Дьокуускай хамаандата эрдэ Бүтүн Россиятааҕы ГТО тургутуутун ааспыттара. Онно кинилэри кытары Дьокуускай баһылыгын э.т. Евгений Григорьев көрсөн сүбэ-соргу, көх-нэм буолбуттааҕа.
Ону таһынан горнайдар дьокуускайдарга аралдьытар туристическай өҥөнү оҥоруохтарын сөбүн, бэйэлэрэ оҥорбут астарын-үөллэрин атыылыахтарын сөбүн кэпсээбиттэр. Уопсайынан эргиччи туһалаах кэпсэтии барда диэн мээрийэ пресс-сулууспата кэпсээн бөҕө буолла.
***
Aartyk.Ru
Уу сахалыы кэпсээн буолбут👍🏻👍🏻👍🏻