Курс валют
$
66.43
0.18
75.39
Курс валют
Курс валют
$
66.43
0.18
75.39
Меню
Поиск по сайту

Айсен НИКОЛАЕВ Ил Дархан солотугар киирдэ

27.09.2018 20:23 0
Айсен НИКОЛАЕВ Ил Дархан солотугар киирдэ

Өрөспүүбүлүкэ күнүн бырааһынньыга олохтонуоҕуттан Саха сирэ төрдүс салайааччытын үрдүкү дуоһунаска талла. Бүгүн, балаҕан ыйын 27 күнүгэр, Айсен НИКОЛАЕВ Ил Дархан солотугар киирэр дьоһун сиэрэ-туома буолан ааста.

Опера уонна балет государственнай театрын иһинэн-таһынан үлүгэрдээх дьон муһунна.

Саала иһигэр дойдубут араас муннуктарыттан салайааччылар, дьокутааттар, ыалдьыттар, общественность бэрэстэбиитэллэрэ, ааттаах-суоллаах дьон  кэлбиттэр. Бүттүүн норуот быыбарын түмүгүнэн үрдүк итэҕэли ылбыт Айсен Николаев Саха Өрөспүүбүлүкэтин Ил Дарханын үрдүк солотугар киирэр дьоротун туоһулаатылар.

 

Айсен Николаевка Ил Дархан дастабырыанньатын тутта, Конституционнай суут бэрэссэдээтэлэ Александр Ким-Кимэн Ил Дархан солотун тутуу андаҕарын бэрээдэгин биллэрдэ.

Саҥа Ил Дархан икки тылынан андаҕар биэрдэ:

“Саха өрөспүүбүлүкэтин Ил дарханын эбээһинэһин үтүө суобастаахтык толоруом, Арассыыйа Федерациятын Төрүт сокуонун уонна федеральнай  сокуоннары, Саха Өрөспүблүкэтин Төрүт сокуонун уонна сокуоннарын  тутуһуом, Өрөспүүбүлүкэ национальнай судаарыстыба быһыытынан анал туругун уонна элбэх  норуотун интэриэһин көмускуөм, киһи уонна гражданин быраабын ытыктыам диэн бэйэм үтүө ааппынан уонна дьоһуммунан андаҕайабын”.

Өрөспүүбүлүкэ бастакы бэрэсэдьиэнэ  Михаил Николаев Айсен Николаевка  Ил Дархан мэҥэ бэлиэтин туттарда.

Айсен Николаев, бастатан туран, харда тыл этэригэр ис сүрэҕиттэн бар дьонугар эрэллэрин, итэҕэллэрин иһин махтанна. Саалаҕа баар чугас дьонун, учууталларын, кэргэнин, оҕолорун  иннигэр  улахан эппиэтинэс сүгэрин эттэ. Ону таһынан, аҕа саастаах бииргэ үлэлээбит дьонугар, элбэх киһиэхэ —  Өлөөн туундаратыттан Кириэмил кэбиниэттэригэр тиийэ өйөбүл буолбуттарын иһин, күүс-уох биэрбиттэригэр махтанна.

“Туох баар билиибин күүспүн-уохпун төрөөбүт дойдубут инники сайдыытыгар аныаҕым. Түөрт ыйы супту бүттүүн өрөспүүбүлүкэни кэрийэн тыһыынчанан сахам дьоно инникигэ эрэллээхтэрин, уларыйыы тахсарын кэтэһэллэрин көрдүм. Күүскэ үлэлэһэн баай-дуол, ситиһиилээх өрөспүүбүлүкэҕэ олоруохтарын баҕаралларын көрдөрдүлэр. Хас биирдии киһи байылыат олоххо олорор кэмэ кэллэ», — диэн Ил Дархан эттэ.

Түмүгэр бастакы ыйааҕынан “Саха Өрөспүүбүлүкэтин экологическай туругун туһунан” буолбутун биллэрдэ.

Айсен Николаевы Уһук Илин федеральнай уокурукка Президент боломуочунайа Юрий Трутнев эҕэрдэлээтэ. Саха салайааччыта дойду үрдүнэн саамай элбэх куолаһы ылан быыбарга кыайбытын бэлиэтээтэ. Айсен Николаев Саха сирин олоҕун тупсарарыгар күүс-көмө буолуом диэн эрэннэрдэ.

Ил Дархан үрдүк солотугар киирэр сиэрэ түмүктэниитэ, Айсен Николаев кэргэнинээн Людмила Николаеваны кытары Доҕордоһуу  болуоссаттыгар тахсан кинини айхаллыыр дьоҥҥо ис сүрэҕиттэн махтанан  тыл эттэ. Ол кэнниттэн бырааһынньыктааҕы оһуохай ыраахха диэри ньиргийдэ.

Саха сирэ Өрөспүүбүлүкэ күнүгэр төрдүс Ил Дарханнанна.

***

Дана СЕМЕНОВА,

Aartyk.Ru.

Оставить комментарий