Айаал Бурцев Тааттаҕа – Тапталы, Эрэли, Итэҕэли биллэрдэ

@Aartyk.ru телеграм-канал кэпсииринэн, Таатта улууһугар кэлэр 2024 сыл – Таптал, Эрэл, Итэҕэл сылынан биллэриллибит.

Таатта улууһун баһылыгыттан Айаал Бурцевтан кэлэр сыл тиэмэтин хайдах талбытын туһунан ыйыттыбыт:

-Эһигини бука барыгытын үүнэр 2024 сылынан, саргылаах Саҥа дьылынан итиитик-истиҥник эҕэрдэлиибин. Саҥа сыл үүнээри турдаҕына үгэс быһыытынан ааспыт сыл түмүктэрин таһаарар, кэлэр сылга былааннары оҥорор кэммит.

Ааһан эрэр сыл Дойдуга – Учуутал уонна уһуйааччы, өрөспүүбүлүкэҕэ уонна улууспутугар Үлэ сыла биллэриллэн, бары кыахпытын холбоон, дойдубут инники сайдыытын туһугар үлэни-хамнаһы өрө тутан кэллибит. Үгүс социальнай объектар тутуллан үлэҕэ киирдилэр, тыа хаһаайыстыбатыгар, үөрэхтээһиҥҥэ, культураҕа, доруобуйа харыстабылыгар, спортка уо.д.а олох бары эйгэтигэр үрдүкү кирбиилэр ылылыннылар.

2025 сылга буолуохтаах Манчаары оонньууларын көрсө баараҕай объектарбыт сыыйа тэтимнэрин күүһүрдэн тутулла тураллар. Бу хаалбыт кылгас кэм иһигэр ханнык да ыарахан үлэттэн чаҕыйбакка, бука бары биир сыал тула түмсэн, туруоруммут сорукпутун ситиһиэхпит диэн эрэнэбин.

Кэлэр 2024 сыл дойдуга – Дьиэ-кэргэн, Саха сиригэр – Оҕо, Тааттаҕа – Таптал, Эрэл, Итэҕэл сыла биллэрилиннэ.

Таптал – дьиэ-кэргэҥҥэ иитиллэн тахсар истиҥ иэйии. Сылаас, иһирэх тапталга бигэнэн улааппыт оҕо олоххо бөҕө тирэхтээх, төрөөбүт дойдуга бэриниилээх, төлөһүйэ улааппыт сиригэр дьиҥнээх хаһаайын буолан сириэдийэн тахсыаҕа.

Эрэл – ханнык да ыарахан сатыылаан кэллэҕинэ, кыра да эрэл кыыма уһугуннарар, киһиэхэ күүһү-уоҕу, олоххо бигэ туругу биэрэр сүдү күүстээх. Бары бииргэ сомоҕолоһон эрэллээхтик олохпут уйгутун оҥоһуннахпытына табыллыы, тупсуу, сайдыы кэлиэҕэ.

Итэҕэл – киһини бэрээдэктиир, чиэһинэй, иллээх буоларга иитэр. Таптал, Эрэл, Итэҕэл үйэлэр тухары сүппэт биир ситимнээх өйдөбүллэр. Кэлэр сылга орто дойду оҕолоро буоларбытынан, олох орто сүнньүн тутаммыт, өй-санаа, духуобунас өттүнэн бөҕөх туруктанан, дьиэ-кэргэммитигэр иллээх-эйэлээх сыһыаны олохтоон, дьиэ-кэргэнтэн саҕалаан төрөөбүт дойдуга дириҥ тапталы уйалаан өрө көтөҕүллүү олохтоноругар ис сүрэхпиттэн эрэнэбин.

Ийэ сирбит чиэһин көмүскүү сылдьар уолаттарбыт биһиги бөҕөх турукпутуттан күүс-көмө ыланнар бары тургутуулары чиэстээхтик туораан, эбии күүһүрэн, кыаҕыран, булгуруйбат санааларынан кыайыыны аҕалыахтарыгар саарбахтаабаппын.

Үүнэн иһэр 2024 сыл биһиэхэ үтүө уларыйыылары, улахан ситиһиилэри тосхойуо, таһаарыылаах буолуо, саҥа кыахтары үөскэтиэ диэн эрэнэбин! Модун кыахтаах, үтүө тыыннаах-айылгылаах дойдубутугар эйэ уонна өйдөһүү баар буоллун!

***

Aartyk.Ru