Өлөр да сыаналаах

Орто дойдуга букатын кэлбит икки атахтаах суох. Олох сокуона оннук. Ытаан да, ыллаан да эргиллибэккин.

Ый анараа өттүгэр Ытык Күөлгэ алдьархай тахсан эдэр дьон суорума суолламмытара. Сүтүктээхтээхтэр дьоннорун кистиир түбүккэ түһэн аймаммыт, хомойбут, хоргуппут суруктара бассаабынан тарҕаммыта:

“Илин эҥэргэ кэлэн күтүөттээн дуу, кийииттээн дуу атаххын тэҥнээтэххэ киһи өйүгэр баппат ороскуот эбит. Заречье өттүгэр Майаҕа эрэ паталогоанатом баара сөхтөрдө. Киэһэ 5 чаас кэннэ өлүк аҕаллаххына, сарсыарда 9 чааска диэри труп таһырдьа уочараттаан сытар. Онтон аны бэйэҥ көтөҕөн киллэрэн остуолга сытыараҕын, санитар эҥин диэн штатка көрүллүбэт дуу, үөдэн дуу?! Күҥҥэ 4-5 эрэ өлүгү вскрытиелыыллар, со5отох паталогоанатом онтон элбэ5и кыаммат.

Хата Майа моргун аттыгар турар ритуальнай услугалар маладьыастар эбит, бэйэлэрэ кээмэй ыла охсон, хоруоп оҥоро охсон, веноктары хомуйан, суруйан бэлэмнээн биэрэллэр эбит, сыаналара да куораттааҕар 3 төгүл чэпчэки.

Талах курдаах Таатталар кылабыыһалара киһи өйүгэр баппат сыаналарынан сөхтөрдө, 2 киһи миэстэтэ уонна иинин хаһаллара 170 000, иэдээн. Ханна да инник сыананы көрө да, истэ да иликпин, саллыы”.

Тааттаҕа анараа дойдуга аттаммыт киһини кистээһин сыаната улахан орускуоттааҕын туһунан хас да киһи суруйда. Биир иини бэлэмниир – 85 000 солк. эбит. Билигин СВОнан даҕаны сылыктаатахха ити бизнес “сайдан” турар буолуохтаах.

Егор ПАВЛОВ, Ытык Күөл баһылыга:

-Сыана оннук, ыарахан. Ыраатта итинник улахан сыаналаммыппыт, ким да буолунан хаспат. Буор хаһыыта, ис-тас маһа, икки венок сыаната киирэр. Кылабыыһаҕа сир биэрии босхо. ИП дьарыктанар. Ытык Күөлгэ эрэ буолбакка нэһилиэктэринэн сылдьан эмиэ өҥө оҥороллор. Ис маһын, быстах тас күрүөтүн эмиэ оҥорор буолан дьон син улаханнык саҥарбат курдук.

Дьиҥэ ыалларбыт чурапчылар тарыыптара чэпчэки эбит да, кинилэр күнүнэн кэлэн буорун эрэ хаһан баран бараллар эбит. Дьон бэйэтэ хаптаһын биэрдэҕинэ иһин маһын олордоллор быһыылаах.

Оттон судмедэксперт суоҕа дьэ улахан кыһалҕа. Майаҕа төттөрү-таары илдьэргэ-аҕаларга, кэтэһиннэрэн сытыарарга ороскуотун ааһан сүтүктээхтэргэ санаа-хараастыы өттүнэн олус ыарахан, – диэн баһылык этэр.

Дьэ, итинник балаһыанньа.

***

Aartyk.Ru

Фото varandej.livejournal.com