Ким тугу бэлэхтээтэ?

“Киин куорат” хаһыат суруналыыстара эр дьоҥҥо дьахталлар тугу бэлэхтииллэрин туһунан сураспыттар. 

Бэлэх-туһах

-Биир дьүөгэм ыраах Кэбээйи улууһугар учууталлыыр. Кини кылааһын уолаттарыгар лего уонна билииккэ сакалаат, уолугар 3Д магнитнай конструктор уонна пазл, кэргэнигэр кыргыттара массыына докумуонугар уонна пааспарыгар аналлаах хах, бэйэтэ футболка уонна джемпер ылбыт”

-Биир дьүөгэм кэргэнигэр эр киһи туттар тэрилин, малын-салын бэлэхтиир үгэстээхпин диир.

-Тус бэйэм ыал буолуохпутуттан кэргэммэр күн-ый талбытын барытын бэлэхтээн кэллим. Эдэрбиттэн саҕалаан бултуур тэрилинэн, таҥаһынан-сабынан барытынан хааччыйдым. Монголлар сэлиэччиктэрэ, наскылара, ыстааннара, үрүсээк, бинуокул, саппыкы, атах таҥаһа, кэлин футболка, сибиитэрэ, ис таҥас, тас таҥас, кинигэ о.д.а. Бу кэлин, хата, сертификат диэни булан, олуһун диэн астына сылдьабын. Урут наар биир булт маҕаһыыныттан ылар буоллахпына, кэлин “Одарич” диэни сэҥээрдим. Маны дьиэм эр дьонугар барыларыгар биэрэбин. Быйыл Саҥа дьылга эмиэ биэрбиппин туттубакка сытыараллар эбит, онно эбии ыллахтарына, суумата элбээн тахсар. Онон бэйэлэрэ да сөбүлэһэн, үөрэ-көтө кэтэһэллэр.

-Кэргэним төбөтө тоҥмотун диэн анаан-минээн сакаастаан сылаас бэргэһэ бэлэхтээбиппэр наһаа үөрбүтэ, массыынаҕа эҥин кэтэригэр олус табыгастаах. Кыһыммыт уһун, тымныы диэн наар ичигэс таҥас биэрэ сатыыбын. Эр киһим элбэх, уолаттарым Ньургун уонна Николай, сиэннэрим Дархан уонна Матвей диэннэр. Аҕабыт бултуур буолан, булка кэтэригэр эмиэ ичигэс таҥас, утуйар мөһөөччүк, манок, балаакка эҥин биэрээччибин. Уопсайынан, бэйэлэригэр туһалааҕы бэлэхтии сатыыбын. Быйыл кэргэммэр бэргэһэ, улахан уолга булка аналлаах туох эмит, кырабар остуол оонньуута, сиэннэрбэр саастарынан көрөн эмиэ оонньуур бэлэхтиэм.

Мааны астаах сандалы

-Мин ол күн тугу астыахтаахпын эрдэттэн былаанныыбын. Былырыын уолбар, күтүөппэр уонна бырааппар анаан ас нобуора бэлэмнээбиппин кэлэн үөрэ-көтө ылан барбыттара. Онно быырпах, духуопкаҕа буспут убаһа оһоҕоһо, хартаттан шашлык, кырдьаҕас этэ буһаран биэрбитим. Быйыл да эт-ас, бэрэски буһарар санаалаахпын, быырпахпын хайаан да эрдэттэн туруорабын, тоҥ балык, эт, индигирка баар буолуоҕа.

-Аҕабыт эттээх бэрэскини сөбүлүүр, онон хайаан да буһарабын, истээх собо, салаат оҥортуом.

Үгүс хаһаайкалар, биллэн турар, эр дьонноругар эттээх оливье салаат, бэрэски, харта, хаан, убаһа этэ, тоҥ ас, муорус, собо, чыыр бэлэмнииллэр. Ол быыһыгар рестораҥҥа да ыҥырааччылар бааллар. Быйыл үс күннээх өрөбүл буолан, дэриэбинэҕэ дьоммутугар тахсабыт, эбэтэр ыалдьыттыы барабыт дэһэллэр. Халлаан туругун көрөн-истэн, куорат таһыгар шашлыктыы, сибиэһэй салгыҥҥа күүлэйдии, дуоһуйа сынньана бараары оҥосто сылдьааччылар даҕаны аҕыйаҕа суохтар.

Онон, ким тугу былааннаабыта барыта туолуохтун, кылаабынайа, эр дьоммутун, уолаттарбытын үөрдэ-көтүтэ, уһун кыһын кэнниттэн санааларын көтөҕөн, бэлэх-туһах биэрэн, тото аһатан, эһиилгэ диэри өйдүү-саныы сылдьалларын курдук бырааһынньыкпытын тэрийиэххэ.

Аралдьытыы

-Былырыын тирга билиэт ылбыппыт. Маннык миэстэ куораппытыгар аҕыйах буолан, эрдэттэн сакаастаан кэбиһэр ордук эбит. Биһиэхэ билиэт нэһиилэ көстүбүтэ. Уолаттарбыт олус астынан, ытыалаан, күрэхтэһэн кэлбиттэрэ. Кэлээттэрин кытта остуол толору астаах көрсүбүппүт. Онон маннык тэрээһин бэрт эбит этэ.

-Киинэҕэ, кэнсиэртэргэ  билиэт.

-Эр дьон доҕотторун, табаарыстарын кытта атын сиргэ баран бырааһынньыктыылларыгар көҥүл биэрии.

-Дьиэҕэ олорон киинэ көрүү, ол кэннэ салгыҥҥа дьаарбайыы.

***

“Киин куорат” хаһыат матырыйаалыттан ылылынна.

Андрей Чикачев уруһуйа