Үөһээ Бүлүүгэ – Олоҥхо ыһыаҕын көрсө

Олоҥхо – саха норуотун айымньытын муҥутуур чыпчаала, духуобунай пааматынньыга буолар. 2022 сылга Үөһээ Бүлүү улууһугар Олоҥхо ыһыаҕа ыытыллыаҕа. Онон бу улахан тэрээһиҥҥэ күүстээх бэлэмнэнии үлэлэрэ ситимнээхтик буолаллар.

Бэлэмнэнии үлэлэр чэрчилэринэн Үөһээ Бүлүүтээҕи оҕо бибилэтиэкэтэ олунньу ыйтан уон ый устата “Олоҥхо дойдута – мин дойдум” диэн куйаар ситимин нөҥүө викторина күрэҕин ыытыаҕа. Хас ый аайы күрэх аата-суола, ыйытыктара уларыйа туруохтара. Викторинаҕа республикаҕа биллэр олоҥхоһуттар, чулуу тойуксуттар, оһуокайдьыттар уонна олоҥхо туһунан ыйытыктар киириэхтэрэ.

Биһиги улууска ыытыллыахтаах Олоҥхо ыһыаҕар үөһээ бүлүүлэр өйдүүн-санаалыын ох курдук оҥостон, биир санаанан салайтаран, Олоҥхобут тула түмсүөҕүҥ!

Олоҥхоҕо аналлаах бастакы викторинаҕа кыттыан баҕалаах Сахабыт сирин бары олохтоохторо сааһыттан тутулуга суох бу сигэни баттаан киирэн кыттыаххытын сөп https://www.instagram.com/p/CLipeZxAAZu/?igshid=bgd7g6fa2uxz

***

Валентина ФИЛИППОВА