ЫАМ ЫЙЫН 22 КҮНЭ – САЙЫЛЫК КҮНЭ

Бу күнү көрсө хаһаайыстыбалар тустаах сайылыктарыгар сүөһүлэрин көһөрөн, сайылык иһэ сэргэхсийэн айылҕа көһөн кэлбит дьону эҕэрдэлии көрсөр. Арҕааттан үрэр тымныы тыал намыраан, сыыйа-баайы тыал хайысхата уларыйан, аны соҕурууттан үрэн барар. Ол аайы сааскы тымныы күннэр сылаас күннэринэн солбуллан иһэллэр. Айылҕа дьэ уһуктан от-мас тута көҕөрөн барар, көтөр-сүүрүр саҥата алааһы кыйа үүммүт тыаны толорон биһэр. Сайын саҕаланнаҕа ол.

«Туймаада» Агрохолдинг биир бөдөҥ хаһаайыстыбатын «Бөртө сылгы собуота» ХЭУо сүөһүлэрин сайылыкка арыый эрдэ таһаарар үгэстээхтэр. Ол курдук быйыл муус устар 28 күнүгэр 350 субан сүөһүнү көһөрөн бу күннэргэ хайыы-үйэ 150 оҕуһу аттаабыттар.

Онтон ыанньык ынаҕы ыам ыйын саҥатыгар көһөрбүттэр. Ол курдук Куоһаҕаска 134 ынаҕы таһаарбыттар. Манна 3 ыанньыксыт, 2 бостуук, 1 осеменатор уонна 1 оператор үлэлииллэр. Онтон Мондурахха 136 ынаҕы туруорбуттар. Манна эмиэ 3 ыанньыксыт, 2 бостуук, 1 оператор үлэлии сылдьаллар. Уу Көхсө сайылыкка 130 ынаҕы сайылата аҕалбыттар. Бу сайылыкка 3 ыанньыксыт, 2 бостуук, 1 осеменатор, 1 оператор, 2 үүт сыаҕын үлэһитэ уонна суоппар олохсуйан үлэлииллэр. Сайылыктарга эрдэ сиилэс, от тиэллэн аһылык баар.

Онтон 310 ньирэйи халлаан сылыйарын кэтэһэн ыам ыйын 18 күнүгэр сайылыктарын буллардылар. Онон сайылыктар ынах маҥырааһынынан, ньирэй мэҥирээһининэн туолан биир кэм оргуйа түстэ. Сотору сайыҥҥы каникул саҕаланан оҕо бөҕөтө кэлиэ. Ити курдук сайылык ураты тыынынан тыыныа, бэйэтэ туһунан олоҕо тигинии түһүө.

***
Прокопий ХАБАРОВ