Валентина РОМАНОВА-Чыскыырай: Эстрада театрыттан бэйэм баҕабынан уурайбытым

Дьон-сэргэ сөбүлүүр ырыаһыттара, артыыстара Эстрада театрыттан ууратылыннылар диэн сурах төһө оруннаҕый?

Айар дьону салайар сыанан аҕаабат. Онон театр директорын Татьяна Чаранскаяны өйдүөххэ сөп, бүгүн ким тугунан тыынан туруон сэрэйэр уустук.

Фокусник, иллюзионист Алексей Гольдеров “ууратыллыбыт” артыыс ахсааныгар Валентина Романованы-Чыскыырайы киллэрбит. Ол гынан баран Валентина Aartyk.Ru эппитинэн, кини театртан баҕа өттүнэн уурайбыт.

-Театртан бэйэм барбытым, – диир Чыскыырай.

-Москваҕа көһөн барар диэн сурах олохтоох дуо?

-Москваҕа көһөрүм биллибэт ээ. Күһүҥҥэ диэри туох буоларын сэрэйэр уустук. Иэрэҥ-саараҥ кэм. Көннөрү биир нэдиэлэҕэ бара сылдьыахтаахпын. Көһөн буолбатах.

-Театрга төһө өр үлэлээтиҥ?

-Театрга 31 сыл үлэлээтим, сөп буолуо. Эдэр-сэнэх эрдэхпинэ бэйэм бырайыакпар үлэлиэм этэ. “Үс кут ырыата” диэн бырайыактаахпын, онтубун сайыннарыам. Үөрэтиэм, уһуйуом.

***

Aartyk.Ru