УРБААННЬЫТ ДЬЯЧКОВСКАЙДАР

Дьону кытта көрсөргө бириэмэ тиийбэтэ эрэй эбит. Дьарыктаах дьон кэпсиирэ интэриэһинэйин, элбэҕин. Миэхэ элбэҕи билэргэ көрөргө олус туһалаах. Ону иһиттэххэ, кэпсэттэххэ… дириҥээн бара турар. Ол оннук биир ыалынан Дьячковскайдар буолан биэрдилэр.

Бэрдьигэстээххэ 2024 сылга сонун туристическай киин үөскээбит. Сынньалаҥҥа тахсыбыт уһуйаан үлэһитэ Антонина Николаевна уонна уопуттаах суоппар Валерий Моисеевич олорон хаалбакка эрэ Дьиэ-кэргэн түмэлин тэрийбиттэр. Дьиэ хаһаайына 62-гэр диэри суоппардаан баран силистэри, мастары кытта үлэлээн дьиибэ оҥоһуктарын оҥороро үксээбит. Бириэмэ көһүннэҕэ дии. Кэргэнэ сүүрэн-көтөн, компьютеры баһылаан, араас тэрилтэлэри кытта алтыһан грант, кредит, эбии үп булар-талар эбит.

Кырдьар саастарыгар кэлэн самозанятай, биирдиилээн урбаанньыт буолбуттар. Бу куттанан, саллан олорбокко! Ону даҕаны биир дойдулаахтара, араас бизнес-инкубатор, МФЦ, ресурснай киин курдук тэрилтэлэр үлэһиттэрэ туора турбакка харса суох көмөлөһөллөр диэн Антонина Николаевна ирэ-хоро кэпсиир.

Билигин Гонконг, Москва, Петербург уо.д.а. куораттартан турист бөҕө кэлэр үһү. Бу сотору Чурапчыттан дьон кэлээри сайаапкаламмыттар.
«Ыарахаттардаах эрээри ылыстахха киһи син кыайар. Өйөбүл баар. Сүрүнэ бэйэбит дьарыктаахпыт, дьон интэриэһиргиир»,
– кэпсиир Валерий Моисеевич Дьячковскай – Сиэн Харах.

Бэрдьигэстээххэ баар саха балаҕаныгар бэрт дьикти корнепластика түмэлин үлэтэ сайыннары-кыһыннары барар. Антонина Николаевна кэпсээнэ элбэҕин, интэриэһинэйин!

***
Василий Егоров  «Макс» каналыттан