ТЫА СИРИН ДАЛБАР ХОТУНА НАДЕЖДА СЕРАФИМОВНА ВАСИЛЬЕВА

Бэс ыйа күн уьаан, куйаас күннэр саҥа түһэн, от-мас ситэн күөх өссө хойдон самаан сайыммыт, били сэһэннэргэ этиллэринии сатыылаабыт кэмэ.

“Бөртө сылгы собуота” ХЭУо биир бастыҥ үлэлээх “Уу Көхсө” сайылыга өссө тупсубукка дылы. Алааһы кылдьыылыы үүммүт мастар сайыҥҥы ибир тыалга хоҥкуҥнаһан ылаллар. Илин диэки турар тыа хонууга түспүт күлүгэ кылгаатар кылгаан иһэр. Ол аайы күн чаҕылхай сардаҥалара элбээтэр элбээн, оттон мастан тирэнэн сири-дойдуну биир гына тилийэ сүүрэн сайыҥҥы чаҕылхай сарсыарда үүннэ. Сайылык кэчигирэһэн турар дьиэлэрин илин өттүгэр турар титиик хотон аттыгар ыанньыйбыт ынахтар маҥыраһаллара иһиллэр. Дьиэлэр диэкиттэн ыанньыксыттар тиэтэйэн хаамсан иһэллэрэ көһүннэ. Сотору соҕус кэминэн мотор холбонон биир кэм куугунас тыас иһилиннэ. Сарсыардааҥҥы ыам саҕаланнаҕа ити.

Васильева Надежда Серафимовна “Бөртө сылгы собуота” тэрилтэҕэ осеменаторынан үлэлээбитэ балайда буолла. Сылтан сыл аайы үлэтин ымпыгын-чымпыгын билэрэ улаатан, уопутуран үлэҕэ көрдөрүүлэрэ тупсан иһэр. Ол курдук Надежда Серафимовна үлэлиир “Уу Көхсө” фермата 130 ыанар ынага 90% ууланан сыл аайы урдук көрдөрүүлэри ситиһэллэр. Биллэн турар онтон сиэттэрэн төрүөх ылыыта улаатар, уут ыаһына үрдүүр. Итиннэ барытыгар Надежда үлэтин, сыратын түмүгэ көстөр. Үлэһит киһи сыаналаныахтаах. Быйыл сайылык күнүгэр Надежда Серафимовна СӨ Тыатын хаһаайыстыбатын туйгуна аатын ылан бииргэ үлэлиир дьүөгэлэрэ, тэрилтэ үлэһит дьоноүөрүөхтэрин үөрбүттэрэ. Ону таһынан бэс ыйыгар Өрөспүүбүлүкэ осеменатордарынкуонкурустарыгар бастакы миэстэни ылан бастыҥ исписэлиис буоларын көрдөрдө.

Надежда 5 оҕолоох, 4 сиэннээх. Улахан кыыһа Кэрэчээнэ Николаевна дьонун батыһан сылгы собуотугар киирэн зоотехнигынан үлэлээбитэ хаһыс да сыла.Кини эдэрин аахсыбакка туран үлэҕэ ситиһиилэрэ көстөн эрэр. Ол курдук Кэрэчээнэ Николаевна Өрөспүүбүлүкэҕэ ыытыллыбыт зоотехниктаркуонкурустарыгар кыттан билиитинэн-көрүүтүнэн бастыҥын көрдөрөн бастакы миэстэни ылбыта. Ол түмүгэр Россиягаыытыллыбыт куонкуруска ситиhиилээхтик кыттыбыта. Кэргэнэ Дьулустан агроном идэлээх, эмиэ агрономунан ситиһиилээхтик үлэлии сылдьар.

Надежда Серафимовна иккис кыыьа Мичийээнэ кэргэнинээн Юрийдыын тарбыйах көрөллөр.  Надежда улахан уола үрдүк үөрэҕин бүтэрэн балык собуотугарисписэлииһинэн үлэлии сылдьар. Онон оҕолор улаатан дьоннорун суолларын батыһан тыа хаһаайыстыбатыгар үлэлии сылдьаллара төрөппүттэр оҕолорун кыра эрдэхтэриттэн үлэҕэ сыһыаран улаатыннарбыттарын бэлиэтэ буолар. Икки оскуолаҕа үөрэнэр кыргыттарын эмиэ үлэҕэ иитэн , Сахайаана ветеринар үөрэҕэр киириэн саныыр, кулун тутар ыйга агрооскуолалар куонкурустарыгар ситиһиилээхтик, сатабыллаахтык кыттан бастаан тэрилтэттэн балаакканы бириис быһыытынан туппута.

Надежда Серафимовна үлэтин таһынан ас астыырын, оҕуруот, сибэкки олордорун сөбүлүүр, кэтэх ынахтардаах, сибиэһэй аһынан, сир астаан оҕолорун иитэр. Кини курдук тыа хаһаайыстыбатыгар бэриниилээх далбар хотуттар тыа сиригэр үксүү тураллара тыа сирин инники кэскилин акылаата буолар.

***
Прокопий ХАБАРОВ