ТУЙМААДАЛАР СААСКЫ ЫҺЫЫ ХАМПААННЬАТЫГАР БЭЛЭМНЭНЭЛЛЭР

Бу күннэргэ «Туймаада» Агрохолдинг хаһаайыстыбалара ыһыы хампаанньатыгар бэлэмнэнии бүтэһик түһүмэҕэр үлэлии сылдьаллар. Ол курдук сиэмэ, удобрение аҕалыллан хаһаайыстыбаларга тиэрдиллэн турар. Техника өрөмүөнэ бара турар. Онтон быйылгы ыһыы былаана кырата суох. Ол курдук агрохолдинг хаһаайыстыбалара барыта 2972 гектарга ыһыы ыытыахтаахтар.

“Өлүөхүмэ кыладабыайа” ХЭУо быйылгы хампаанньаҕа 805,6 гектар сиргэ ыһыы ыытыахтаах. Ол иһигэр биир сыллаах оту 755,6 гектарга уонна 50 гектарга элбэх сыллаах оту ыһарга былааннанар. Билиҥҥи туругунан 505 гектарга хаар типтэрбиттэр.

Агрохолдинг биир улахан хаһаайыстыбата «Туймаада» Экоферма былаана 826 гектар. Бу хаһаайыстыба сүрүннээн биир сыллаах оту ыһарга соруктаах. Тэрилтэ отделениеларынан ылар буоллахха, Нөмүгүгэ 382 гектарга ыһыы ыытыллыахтаах. Онтон хаһаайыстыба Дьокуускайдааҕы отделениетыгар 354 гектарга уонна Намнааҕы салааҕа 90 гектарга биир сыллаах оту ыһарга былааннаналлар. Итини таһынан “Победа” ХЭУо бу сылга 133 гектарга ыһыы ыытарга былааннаах. “Бөртө сылгы собуота” ХЭУо быйылгы былаана 750 гектар. Манна эмиэ барытыгар биир сыллаах от ыһыллыахтаах. Уонна «Новай сопхуос» АУо былааннаммыт 457 гектарыттан 367 гатыгар биир сыллаах оту уонна 90 гаҕа элбэх сыллаах оту ыһарга былаан оҥостор. Манна эбэн эттэххэ новайдар бу сыл олунньу ыйыгар 20 га эбии сир оҥостубуттар. Онтон агрохолдинг үрдүнэн ыллахха билигин 798 га сиргэ хаар типтэриитэ ыытыллыбыт. Онтон ыам ыйыгар 1615 гектар сиргэ сиик саптарыыта ыытыллара сабаҕаланар. Быйылгы хампаанньаҕа 85 техника араас көрүҥэ туһаныллара былааннанар.

“Туймаада” Агрохолдинг сүөһүнү сүмэһиннээх аһылыгынан хааччыйыыга хаһан тэриллиэҕиттэн сыал-сорук оҥостон үлэлиир. Ол да иһин хаһаайыстыбалар сиилэс, сенаж бэлэмнээһинигэр быйыл кырата суох былааннаахтар. Быйылгы сайын агрохолдинг үрдүнэн уопсайа 13506 тн сүмэһиннээх аһылык бэлэмнэниэхтээх. Ол иһигэр 12880 тн сиилэс уонна 626 тн сенаж бэлэмниир былаан баар. Итини таһынан 7766 тн от бэлэмниир сорук турар.

Онтон билигин  Туймаада хаһаайыстыбалара сааскы ыһыы хампаанньатыгар тэринэн күнү сөпкө туһанан  кэмигэр киирэргэ бэлэмнэр диэн түмүккэ кэлиэххэ сөп.

***
«Туймаада» Агрохолдинг